ମୁମ୍ବାଇ ୭।୧୧: ମହାରାଷ୍ଟ୍ରରେ ସରକାର ଗଠନ ନେଇ ଅଚଳାବସ୍ଥା ଜାରି ରହିଛି । ଶନିବାର ମହାରାଷ୍ଟ୍ର ବିଧାନସଭାର କାର୍ଯ୍ୟକାଳ ପୂରିବାକୁ ଯାଉଛି । କିନ୍ତୁ ଏଯାଏ ବାହାରିପାରୁନି ସରକାର ଗଠନ ଫର୍ମୁଲା ।
{"id":180296}ଶିବସେନା ଓ ବିଜେପି ଅଲଗା ଅଲଗା ଭାବେ ଗୋଟି ଚାଳନା କରୁଛନ୍ତି । ଆଜି ଶିବସେନା ପ୍ରମୁଖ ଉଦ୍ଧବ ଠାକରେଙ୍କ ଘରେ ନବ ନିର୍ବାଚିତ ୫୬ ଜଣ ବିଧାୟକଙ୍କୁ ହାଜର ହେବା ପାଇଁ ଡକା ଯାଇଥିବା ବେଳେ, ସେପଟେ ବିଜେପି ରାଜ୍ୟପାଳଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ବରିଷ୍ଠ ବିଜେପି ନେତା ଚନ୍ଦ୍ରକାନ୍ତ ପାଟିଲ ଓ ସୁଧୀର ମୁଙ୍ଗାନ୍ତିୱାର, ରାଜ୍ୟପାଳ ଭଗତ ସିଂ କୋଶୟାରୀଙ୍କୁ ରାଜ୍ୟପାଳଙ୍କୁ ଭେଟି ସରକାର ଗଠନ ପାଇଁ ଦାବି ଜଣାଇବେ । ମହାରାଷ୍ଟ୍ର ମୁଖ୍ୟମନ୍ତ୍ରୀ ଭାବେ ଦେବେନ୍ଦ୍ର ଫଡନାଭିସ୍ ଶନିବାର ଶପଥ ନେବେ ବୋଲି ସୂଚନା ମିଳୁଛି । ତେବେ ବାଚସ୍ପତି ନିର୍ବାଚନ ସମୟରେ ଫଡନାଭିସ୍ ୧୪୫ ବିଧାୟକଙ୍କ ସମର୍ଥନ ଜୁଟାଇ ପାରିବେ କି ନାହିଁ ତାହା ହିଁ ଏବେ ସବୁଠାରୁ ବଡ଼ ପ୍ରଶ୍ନ ।
{"id":180297}ଶିବସେନା ମଧ୍ୟ ନିଜ ଜିଦରେ ଅଟଳ ରହିଛି । ମନ୍ତ୍ରିମଣ୍ଡଳରେ ବିଜେପି ସହ ସମାନ ସଂଖ୍ୟା ମନ୍ତ୍ରୀ ସହ ଅଢ଼େଇ ବର୍ଷ ପାଇଁ ମୁଖ୍ୟମନ୍ତ୍ରୀ ଚୌକି ଦାବି କରୁଛି ଶିବସେନ । ଏସବୁ ଭିତରେ ଦଳ ସରକାର ଗଠନ ପାଇଁ ପ୍ରସ୍ତୁତ ଥିବା କହିଛନ୍ତି ସାଂସଦ ସଞ୍ଜୟ ରାୱତ । ତେଣୁ ଏଭଳି ସ୍ଥିତିରେ ଏନସିପି ଓ କଂଗ୍ରେସ ଶିବସେନାକୁ ସମର୍ଥନ ଦେବେ କି ନାହିଁ ତାହା ମଧ୍ୟ ସସପେନ୍ସ ଭିତରେ ରହିଛି । ସେପଟେ ଗତକାଲି ଏନସିପି ବିରୋଧୀ ଦଳରେ ବସିବାକୁ ପ୍ରସ୍ତୁତ ଥିବା ପାର୍ଟି ମୁଖ୍ୟ ଶରଦ ପାୱାର ସ୍ପଷ୍ଟ କରିସାରିଛନ୍ତି ।