ହାଇକୋର୍ଟଙ୍କ ନିର୍ଦେଶ ଅନୁଯାୟୀ ଶ୍ରୀମନ୍ଦିର ଜୟ ବିଜୟ ଦ୍ୱାରର ମରାମତି କାମ ଆରମ୍ଭ କରାଯିବ | ଏ ସମ୍ପର୍କରେ ଗୁରୁବାର ସେବାୟତ ନିଯୋଗ ସହ ଆଲୋଚନା କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ପ୍ରଦୀପ ଜେନା | ମରାମତି ସମୟରେ ଯେଭଳି ମହାପ୍ରଭୁଙ୍କ ନୀତିରେ କୌଣସି ପ୍ରକାର ବ୍ୟାଘାତ ନହେବ ସେଥିପାଇଁ ପ୍ରୟାସ କରାଯିବ | ଆସନ୍ତା ରଥଯାତ୍ରା ସମୟରେ ମହାପଭୁ ଗୁଣ୍ଡିଚା ଘରେ ବିଜେ କରୁଥିବା ବେଳେ ମରାମତି କାର୍ଯ୍ୟ ବିନା ବାଧାରେ କରାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି | ଅନ୍ୟ ପଟେ ଶ୍ରୀଜିଉଙ୍କୁ ଦାନରେ ମିଳୁଥିବା ବସ୍ତ୍ର ଓ ଲୁଗା ନିଲାମ କରାଯିବା ନେଇ ନିଷ୍ପତ୍ତି ନିଆଯାଇଛି | ନିଲାମ ବସ୍ତ୍ର ଗୁଡିକୁ ଭକ୍ତମାନେ କିଣି ପାରିବେ | ତେବେ ମହାପ୍ରଭୁଙ୍କୁ ପିନ୍ଧାଯାଇଥିବା ବସ୍ତ୍ର ନିଲାମ କରାଯିବ ନାହିଁ ବୋଲି ଶ୍ରୀମନ୍ଦିର ପ୍ରଶାସନ ସ୍ପଷ୍ଟ କରିଛି |