ବ୍ରିଜ୍ ଉପରୁ ମହାନଦୀକୁ ଯାତ୍ରୀବାହୀ ବସ ଖସିପଡିବା ଘଟଣା: NHAI ଦାୟୀ !
Published By : Prameya-News7 Bureau | November 22, 2018 IST
କଟକ ୨୨/୧୧ :ବ୍ରିଜ୍ ଉପରୁ ମହାନଦୀକୁ ଯାତ୍ରୀବାହୀ ବସ ଖସିପଡିବା ଘଟଣାର ଆରମ୍ଭ ହୋଇଛି ଛାନଭିନ୍ । ଦୁର୍ଘଟଣା ପାଇଁ କିଏ ଦାୟୀ, କେଉଁଠି ରହିଲା ତ୍ରୁଟି, ସବୁ ଦିଗକୁ ନେଇ ଚାଲିଛି ତଦନ୍ତ । ଏମ୍ଭିଆଇ, NHAI ଯନ୍ତ୍ରୀ, ଜଗତପୁର ଥାନା ଆଇଆଇସି ଓ ରୋଡ ସେପ୍ଟି ସୋସାଇଟି ସଦସ୍ୟ ଓ ଟାଟା ମୋଟର୍ସ ର ବୈଷୟିକ ଅଧିକାରୀ ଘଟଣାସ୍ଥଳ ଅନୁଧ୍ୟାନ କରିଛନ୍ତି । ତେବେ ବସରେ କୌଣସି ଯାନ୍ତ୍ରୀକ ତ୍ରୁଟି ନଥିବା ଏମଭିଆ କହିଥିବା ବେଳେ ଦୁର୍ଘଟଣା ପାଇଁ NHAIକୁ ଦାୟୀ କରିଛି ରୋଡ ସେଫଟି ସୋସାଇଟି । ଗତକାଲି ବସ ମାଲିକ ସଂଘ ମଧ୍ୟ NHAI କୁ ଦାୟୀ କରିଥିଲା…
ମହାନଦୀ ବସ ଦୁର୍ଘଟଣାର କାରଣ ଖୋଜୁଛି ତଦନ୍ତକାରୀ ଟିମ୍ । ମଇଁଷି ପାଇଁ ଦୁର୍ଘଟଣା ଘଟିଲା ନା ବସରେ ଯାନ୍ତ୍ରୀକ ତ୍ରୁଟି ଥିଲା ? ଏହାର ଛାନଭିନ୍ ଚାଲିଛି । ତଦନ୍ତକାରୀ ଟିମ୍ ଦୁର୍ଘଟଣାସ୍ଥଳ ଅନୁଧ୍ୟାନ କରିଛନ୍ତି । ଡଙ୍ଗା ଯୋଗେ ଟିମ୍ ପହଞ୍ଚିଥିଲା ଦୁର୍ଘଟଣାଗ୍ରସ୍ତ ବସ୍ ନିକଟରେ । ସାଙ୍ଗରେ ଥିଲେ ଜଗନ୍ନାଥ ବସ୍ ମାଲିକ । ତେବେ ପ୍ରାଥମିକ ତଦନ୍ତରୁ ବସରେ କୌଣସି ଯାନ୍ତ୍ରୀକ ତ୍ରୁଟି ନଥିବା ଏମଭିଆଇ କହିଛନ୍ତି । ବସଟି ୨୦୧୬ ମସିହାର । ଏଥିରେ ସ୍ପିଡ୍ କଂଟ୍ରୋଲର ଲଗାଯାଇଥିଲା । ତେଣୁ ଘଣ୍ଟା ପ୍ରତି ୮୦ କିମିରୁ ଅଧିକ ବେଗରେ ଏହି ଗାଡିକୁ ଚାଳକ ଚଳାଇପାରିବେ ନାହିଁ ବୋଲି ତଦନ୍ତକାରୀ କହିଛନ୍ତି । ମଇଁଷିକୁ ବଞ୍ଚାଇବାକୁ ଯାଇ ବସ୍ ମହାନଦୀ ପୋଲ ତଳକୁ ଖସି ପଡିଥାଇପାରେ ବୋଲି ତଦନ୍ତକାରୀ ଦଳ ସୂଚନା ଦେଇଛନ୍ତି ।
ଦୁର୍ଘଟଣା ପାଇଁ କିନ୍ତୁ ସିଧାସଳଖ ଜାତୀୟ ରାଜପଥ ପ୍ରାଧିକରଣ ବା NHAIକୁ ଦାୟୀ କରିଛନ୍ତି ରୋଡ ସେଫଟି ସୋସାଇଟି ସଦସ୍ୟ । ତାଙ୍କ କହିବା କଥା, ମଇଁଷି ରାସ୍ତାରେ ବହୁ ସମୟ ଧରି ଶୋଇ ରହିଥିଲା । ଅନ୍ଧାରରେ ଡ୍ରାଇଭର ଶୋଇଥିବା ମଇଁଷିକୁ ଦେଖିପାରିବା ସମ୍ଭବ ନୁହେଁ । ଅନ୍ୟପଟେ ବ୍ରିଜ୍ର ଯେଉଁ ସ୍ଥାନରେ ଦୁର୍ଘଟଣା ଘଟିଛି ସେଠାରେ ଲାଇଟ୍ ବ୍ୟବସ୍ଥା ନାହିଁ । ତେଣୁ ଏହି ସବୁ କାରଣ ପାଇଁ ଜାତୀୟ ରାଜପଥ ପ୍ରାଧିକରଣ ହିଁ ଦାୟୀ ।
ରୋଡ୍ ସେଫ୍ଟି ସେଲର ଯୁଗ୍ମ କମିସନରଙ୍କ ନିକଟରେ ରିପୋର୍ଟ ଦାଖଲ କରିବ ତଦନ୍ତକାରୀ ଟିମ୍ । ରିପୋର୍ଟର ଏକ ନକଲ ବଡ ବଡ ଦୁର୍ଘଟଣାର ଅନୁଧ୍ୟାନ ପାଇଁ ସୁପ୍ରିମକୋର୍ଟଙ୍କ ଦ୍ବାରା ଗଠିତ ରାଧାକ୍ରିଷ୍ଣନ୍ କମିଟିକୁ ମଧ୍ୟ ପ୍ରଦାନ କରାଯିବ ।