ଆଜି ହେଉଛି ମହାବିଶୁବ ସଂକ୍ରାନ୍ତି ବା ପଣା ସଂକ୍ରାନ୍ତି । ଓଡ଼ିଆ ନୂଆ ବର୍ଷରେ ଶ୍ରୀଜିଉଙ୍କ ଠାରେ ଲାଗିହେବ ନୂଆ ପାଞ୍ଜି । ଉତ୍କଳୀୟ ପରମ୍ପରା ଅନୁସାରେ ପଣା ସଂକ୍ରାନ୍ତି ଦିନ ଠାକୁରଙ୍କୁ ପଣା ଓ ଛତୁଆ ଭୋଗ କରିବାର ପରମ୍ପରା ରହିଛି । ଆଜି ମଧ୍ୟ ହନୁମାନ ଜୟନ୍ତୀ । ତେଣୁ ଆଜି ସକାଳୁ ହନୁମାନ ମନ୍ଦିର ଏବଂ ଅନ୍ୟ ଦେବାଦେବୀଙ୍କ ମନ୍ଦିରରେ ଶ୍ରଦ୍ଧାଳୁମାନେ ଧୂପ ଦୀପ ଓ ପଣା ନୈବେଦ୍ୟ ଦେଇ ପୂଜାର୍ଚ୍ଚନା କରୁଛନ୍ତି ।  ରାଜ୍ୟର ପ୍ରାୟ ସବୁ ଶୈବପୀଠ ଏବଂ ଶକ୍ତି ପୀଠଗୁଡ଼ିକରେ ସକାଳୁ ସକାଳୁ ଶ୍ରଦ୍ଧାଳୁଙ୍କ ଭିଡ଼ ବଢ଼ିବାରେ ଲାଗିଛି । ଆଜି ଓଡ଼ିଆ ନବବର୍ଷ ହୋଇଥିବାରୁ ଏହି ଦିନ ଉତ୍କଳବାସୀ ନିଜ ନିଜ ଇଷ୍ଟ ଦେବଦେବୀଙ୍କ ପାଖରେ ପୂଜାର୍ଚ୍ଚନା କରୁଛନ୍ତି |