ନୂଆଦିଲ୍ଲୀ: ମଧ୍ୟ ପ୍ରଦେଶ ବିଧାନସଭା ନିର୍ବାଚନ ପାଇଁ ସମସ୍ତ ୨୩୦ ଆସନରେ ମତଦାନ ମଧ୍ୟରେ ଅନେକ ସ୍ଥାନରୁ ହିଂସା ଘଟଣା ସାମନାକୁ ଆସିଛି । ଇନ୍ଦୋର ଓ ମୁରେନାର କିଛି ସ୍ଥାନରେ ପଥରମାଡ଼ ଓ ଗୁଳିମାଡ଼ ଘଟଣା ସାମନାକୁ ଆସିଛି । କିଛି ପ୍ରାର୍ଥୀଙ୍କୁ ମାଡ ଖବର ଆସିଥିବା ବେଳେ ଶାନ୍ତି ବଜାୟ ରଖିବା ପାଇଁ ସମସ୍ତ ପ୍ରାର୍ଥୀଙ୍କୁ ନଜରବନ୍ଦୀ କରି ରଖାଯାଇଛି । ନିର୍ବାଚନୀ ହିଂସାରେ ଅପରାହ୍ଣ ଦୁଇଟା ଯାଏ ଏକ ଡର୍ଜନରୁ ଅଧିକ ଆହତ ହୋଇଛନ୍ତି । ଅନ୍ୟପଟେ ଛତରପୁରରେ କଂଗ୍ରେସର ମୁସଲିମ୍ କର୍ପୋରେଟରଙ୍କ ମୃତ୍ୟୁ ହୋଇଛି । ତାଙ୍କୁ ଗାଡ଼ି ଚଢାଇ ହତ୍ୟା କରାଯାଇଥିବା ଜଣାପଡ଼ିଛି ।

ଇନ୍ଦୋରର ମହୂ ବିଧାନସଭା କ୍ଷେତ୍ରରେ ଶୁକ୍ରବାର ମତଦାନ ସମୟରେ ବିଜେପି ଓ କଂଗ୍ରେସ କର୍ମୀ ମୁହାଁମୁହିଁ ହୋଇଥିଲେ । ଦୁଇ ଗୋଷ୍ଠୀର ଲୋକ ପରସ୍ପରକୁ ଖଣ୍ଡାରେ ଆକ୍ରମଣ କରିଥିଲେ । ଏଥିରେ ୪ ଜଣ ଆହତ ହୋଇଥିବା ଖବର ସାମନାକୁ ଆସିଛି  । ଖବର ପାଇ ପୋଲିସ ଘଟଣସ୍ଥଳରେ ପହଞ୍ଚି ସ୍ଥିତିକୁ ନିୟନ୍ତ୍ରଣ କରିବା ପାଇଁ ବଳ ପ୍ରୟୋଗ କରିଥିଲା ।

ଇନ୍ଦୋରର ସିନ୍ଧି କଲୋନୀରେ ବିଜେପି ଓ କଂଗ୍ରେସ କର୍ମକର୍ତ୍ତାଙ୍କ ମଧ୍ୟରେ ମାରପିଟ୍ ଖବର ଆସିଥିଲା । ବିବାଦ ପରେ ପୋଲିସ ପହଞ୍ଚି ଉପଦ୍ରବୀଙ୍କୁ ସେଠାରୁ ହଟାଇଥିଲା । ମଧ୍ୟ ପ୍ରଦେଶରେ ନିର୍ବାଚନ ହିଂସା ଗୁରୁବାର ରାତିରୁ ଆରମ୍ଭ ହୋଇଥିଲା । ଇନ୍ଦୋରର ରାଉ ବିଧାନସଭା କ୍ଷେତ୍ରରେ ବିଳମ୍ୱିତ ରାତିରେ କଂଗ୍ରେସ ଓ ବିଜେପି କର୍ମୀଙ୍କ ମଧ୍ୟ ମାରପିଟ୍ ହୋଇଥିଲା । ଭମ୍ୱରକୁଆଁ ଥାନା ବାହାରେ ଏକାଠି ହୋଇ ହଙ୍ଗାମା କରୁଥିବା ଲୋକଙ୍କୁ କାବୁ କରିବା ପାଇଁ ପୋଲିସ ଲୁହ ବୁହା ଗ୍ୟାସ ବ୍ୟବହାର କରିଥିଲା । ଚମ୍ୱଲ ଅଞ୍ଚଳର ଭିଣ୍ଡରେ ମଧ୍ୟ ହିଂସା ହୋଇଛି । ଜିଲ୍ଲାର ମେହଗାଓଁ ବିଧାନସଭା ଆସନ ପାଇଁ ବିଜେପି ପ୍ରାର୍ଥୀଙ୍କ ଉପରେ ଆକ୍ରମଣ କରାଯାଇଛି । ବିଜେପି ପ୍ରାର୍ଥୀ ରାକେଶ ଶୁକ୍ଲାଙ୍କୁ ଉପଦ୍ରବୀ ପଥରମାଡ଼ କରିଥିଲେ । ସୁରକ୍ଷାକର୍ମୀ ବ୍ଲାଙ୍କ ଫାୟାରିଂ କରି ତାଙ୍କୁ ସେଠାରୁ ବାହର କରିଥିଲେ ।

Also Read: ମଧ୍ୟପ୍ରଦେଶ ଓ ଛତିଶଗଡ଼ରେ ବିଧାନସଭା ନିର୍ବାଚନ, ସକାଳ ୭ଟାରୁ ମତଦାନ ଜାରି