ନୂଆଦିଲ୍ଲୀ: ହାଇଦ୍ରାବାଦ ଲୋକସଭା ପ୍ରାର୍ଥୀ ତଥା ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ଓୱେସୀଙ୍କ ବିରୋଧରେ ଇଲେକ୍ସନ କମିଶନଙ୍କ ପାଖରେ ଫେରାଦ ହେଲେ ବିଜେପି ସାଂସଦ ପ୍ରାର୍ଥୀ କୋମ୍ପେଲା ମାଧବୀ ଲତା। ଓୱେସୀ ଗୋମାଂସ ଭକ୍ଷଣକୁ ସମର୍ଥନ ଦେଇଛନ୍ତି ବୋଲି ମାଧବୀ ଲତା ଅଭିଯୋଗ କରିଛନ୍ତି।
ହାଇଦ୍ରାବାଦର ଓଲ୍ଡ ସିଟି ଏରିଆରେ ଓୱେସୀ ଗୋମାଂସ ବିକ୍ରି କରୁଥିବା ଜଣେ ଦୋକାନୀଙ୍କୁ ଭେଟି ତାଙ୍କ ସହ ଆଲୋଚନା କରିଥିଲେ। ତାଙ୍କ ଦୋକାନ ନାଁରେ ନାରା ଲଗାଇ 'ରିହାନ ବିଫ୍ ସଫ ଜିନ୍ଦାବାଦ' କହିଥିଲେ। ଏହାପରେ କିଛି ସମୟ ଆଲୋଚନା ପରେ 'ଏମିତି କାଟି ଚାଲ' ବୋଲି କହି ସେଠାରୁ ଚାଲିଯାଇଥିଲା। ଏହାର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହୋଇଥିଲା। ଓୱେସୀଙ୍କ ଏଭଳି ମନ୍ତବ୍ୟ ଗୋମାଂସ ଭକ୍ଷଣକୁ ପ୍ରଶୟ ଦେଉଛି। ଯାହା ଧାର୍ମିକ ଭାବନାକୁ ଆଘାତ ପହଞ୍ଚାଉଛି ବୋଲି ମାଧବୀ ଲତା ତାଙ୍କ ଅଭିଯୋଗରେ ଦର୍ଶାଇଛନ୍ତି।
ଅନ୍ୟପଟେ ଓୱେସୀଙ୍କ ଏଭଳି ମନ୍ତବ୍ୟକୁ କଡ଼ା ନିନ୍ଦା କରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ଓୱେସୀଙ୍କ ରାଜନୈତିକ ବୟାନବାଜି ସବୁବେଳେ ଅଶାଳୀନ। ତେଣୁ ତାଙ୍କର ଏଭଳି ମନ୍ତବ୍ୟରେ ମୁଁ ଆଶ୍ଚର୍ଯ୍ୟ ହେଉନି ବୋଲି ସୀତାରମଣ କହିଛନ୍ତି।
ସୂଚନା ଥାଉକି, ବିଜେପି ହାଇଦ୍ରାବଦ ଲୋକସଭା ପ୍ରାର୍ଥୀ ମାଧବୀ ଲତାଙ୍କ ବିରୋଧରେ ମଧ୍ୟ ମାମଲା ରୁଜୁ ହୋଇଛି। ସେ ରାମ ନବମୀ ପ୍ରୋସେସନ୍ରେ ଏକ ମସ୍ଜିଦ୍କୁ ଟାର୍ଗେଟ୍ କରି ତୀର ମାରିବର ଅଭିନୟ କରିଥିଲେ। ଯାହାର ଭିଡିଓ ମଧ୍ୟ ଭାଇରାଲ୍ ହୋଇଥିଲା। ଏହା ଧାର୍ମିକ ଭାବନାକୁ ଆଘାତ ଦେଇଥିବା ଅଭିଯୋଗ ହୋଇଛି। ହେଲେ ମାଧବୀଲ ଲତା କିନ୍ତୁ ଅଭିଯୋଗକୁ ଖଣ୍ଡନ କରିଛନ୍ତି।
ସୂଚନା ଥାଉକି ୨୦୦୪ ମସିହାରେ ଅସଦୁଦ୍ଦିନ ଓୱେସୀ ହାଇଦ୍ରାବାଦ ଲୋକସଭା ଆସନରୁ ନିର୍ବାଚନ ଲଢ଼ି ଜିତି ଆସୁଛନ୍ତି। ଏହା ପୂର୍ବରୁ ତାଙ୍କ ବିରୋଧରେ ଯେତେ ପ୍ରାର୍ଥୀ ହୋଇଛନ୍ତି ସବୁ ପରାଜିତ ହୋଇଛନ୍ତି। ଏଥର ମାଧବୀ ଲତା ହାଇଦ୍ରାବାଦରେ ଓୱେସୀଙ୍କ ବିରୋଧରେ ପ୍ରତିନ୍ଦ୍ୱନ୍ଦିତା କରିବେ। ମେ ୧୭ ତାରିଖରେ ଏଠାରେ ଭୋଟିଂ ହେବ।