ନୂଆପଡ଼ା ୩୧/୦୧: ନୂଆପଡ଼ା ଜିଲ୍ଲାର ଉପାନ୍ତ ପୁଲଚି ଘାଟି ଅଞ୍ଚଳରେ ମାଓ ପୋଷ୍ଟର ଦେଖିବାକୁ ମିଳିଛି। ସିନାପାଲି ବ୍ଲକ ନଙ୍ଗଲବୋଡ ରାସ୍ତା କଡରେ ଏକ ଫରେଷ୍ଟ ବୋର୍ଡ ଏବଂ ପଞ୍ଚାୟତ କାର୍ଯ୍ୟାଳୟ ଗେଟରେ ଏହି ପୋଷ୍ଟର ଲାଗିଛି। ଧଳା କାଗଜରେ ସବୁଜ ରଙ୍ଗରେ ଏହି ପୋଷ୍ଟର ଲେଖା ହୋଇଛି। ଏଥିରେ ମେନପୁର ନୂଆପଡ଼ା ଡିଭିଜନ ମାଓବାଦୀ କମିଟି ଲେଖା ଯାଇଛି। ପୋଷ୍ଟରରେ କେତେ ସତ୍ୟତା ରହିଛି ସେନେଇ ନୂଆପଡ଼ା ପୋଲିସ ତନାଘନା ଆରମ୍ଭ କରିଛି।

ପୋଷ୍ଟର ଲେଖା ଅନୁସାରେ, ବିଗତ ଦିନରେ ନଙ୍ଗଲବୋଡ ଅଞ୍ଚଳର ସମୁଦ୍ର ବାଗ ନାମକ ଜଣେ ବ୍ୟକ୍ତି ମହିଳା ମାଓବାଦୀଙ୍କୁ ଚିକିତ୍ସା ପାଇଁ ନେବା  ବେଳେ ଉଭୟଙ୍କୁ ନବରଙ୍ଗପୁର ଡିଭିଏଫ ପୋଲିସ ଗିରଫ କରିଥିଲା। ସେଥିରୁ ସମୁଦ୍ର ବାଗକୁ ମାଓବାଦୀ ସଙ୍ଗଠନର ସଦସ୍ୟ ବୋଲି ଦର୍ଶାଇଥିଲା। ଯାହାକୁ ମାଓବାଦୀ ସଙ୍ଗଠନ ଖଣ୍ଡନ କରିଥିବାବେଳେ ସମୁଦ୍ର ବାଗ ସଙ୍ଗଠନର ସଦସ୍ୟ ନୁହେଁ ବୋଲି ପୋଷ୍ଟରରେ ଲେଖା ହୋଇଛି। ଏହାସହ ଗିରଫ ଦୁଇ ଜଣଙ୍କୁ ୨୪ ଘଣ୍ଟା ଭିତରେ କୋର୍ଟ ଚାଲାଣ କରି ନଥିବା ପୋଷ୍ଟରରେ ଦର୍ଶାଯାଇଛି।