ନିଶ୍ଚିତକୋଇଲି ୧୩/୦୩: ଚୋରି କରି ଫେରୁଥିଲେ । ଅଧାବାଟରେ ସରିଗଲା ତେଲ । ଧରାପଡି ନିର୍ଦ୍ଧୁମ ଛେଚା ଖାଇଲେ ଲୁଟେରା । ଏଭଳି ଘଟଣା ଘଟିଛି କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା କଟକ-ଚାନ୍ଦବାଲି ରାସ୍ତା କଡ଼ରେ ଥିବା ଏକ ପେଟ୍ରୋଲ ପମ୍ପ ନିକଟରେ ।

ଲୋକେ ବାଇକ୍‌ରେ ଗୋଡ଼େଇ ଗୋଡ଼େଇ ଆସି ଦୁଇ ସୁନା ଚେନ ଲୁଟେରା କୁ ଧରିବାକୁ ଚେଷ୍ଟା କରିଥିଲେ । ହେଲେ ତାଙ୍କ ମଧ୍ୟରୁ ଜଣେ ଖସିଯିବାରେ ସକ୍ଷମ ହୋଇଥିବା ବେଳେ ଅନ୍ୟ ଜଣେ ଲୋକଙ୍କ ଠାରୁ ନିର୍ଦ୍ଧୁମ ମାଡ଼ ଖାଇଥିଲା । ଖବର ପାଇ ନିଶ୍ଚିନ୍ତକୋଇଲି ଥାନା ପୋଲିସ ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କ କବଳରୁ ଲୁଟେରାକୁ ଉଦ୍ଧାର କରି ପ୍ରଥମେ ନିଶ୍ଚିନ୍ତକୋଇଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଲୁଟେରାକୁ ଚିକିତ୍ସା କରି ଥାନାରେ ଅଟକ ରଖି ଅଧିକ ତଦନ୍ତ ଜାରି ରଖିଛି ।

ଲୁଟେରା ଠାରୁ ଗୋଟିଏ ଖେଳଣା ବନ୍ଧୁକ, ଗୋଟିଏ ଛୁରୀ, ଗୋଟିଏ ଡୁପ୍ଲିକେଟ ନମ୍ବର ପ୍ଲେଟ ସହ ଏକ ବ୍ୟାଗ୍ ଜବତ କରିଛି ପୋଲିସ । ଚେନ୍ ଲୁଟେରା ଜଣଙ୍କ ହେଉଛନ୍ତି ଯାଜପୁର ଅଞ୍ଚଳର ଶଶିକାନ୍ତ ଜେନା । ତେବେ ଖସି ଯାଇଥିବା ଲୁଟେରା ରାହୁଲ୍ ବୋଲି ପୋଲିସ୍‌କୁ ସୂଚନା ଦେଇଛି ଧରାପଡିଥିବା ଲୁଟେରା ଶଶିକାନ୍ତ । ଅଭିଯୁକ୍ତମାନଙ୍କ ନାଁରେ ଚେନ୍ ଛିଣ୍ଡା ଓ ରାହଜାନି ଭଳି ଘଟଣାରେ ସମ୍ପୃକ୍ତି ଥିବା ଜଣାପଡିଛି ।