ନୂଆଦିଲ୍ଲୀ: ସରିଲା ଚତୁର୍ଥ ପର୍ଯ୍ୟାୟ ଲୋକସଭା ନିର୍ବାଚନ । ଏହି ପର୍ଯ୍ୟାୟରେ ୯ ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳର ୯୬ ଆସନରେ ୧୭୧୭ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ୍ ହୋଇଛି । ତେବେ ନିର୍ବାଚନ କମିଶନଙ୍କ ସୂଚନା ମୁତାବକ, ମତଦାନ ହାର ୬୭.୨୫ ପ୍ରତିଶତ ରହିଛି । ୨୦୧୯ ନିର୍ବାଚନରେ ୬୮.୮ ପ୍ରତିଶତ ମତଦାନ ହୋଇଥିଲା ।
ପଶ୍ଚିମବଙ୍ଗରେ ସର୍ବାଧିକ ୭୬.୨ ଏବଂ ଜମ୍ମୁ-କାଶ୍ମୀରରେ ସର୍ବନିମ୍ନ ୩୬.୮୮ ପ୍ରତିଶତ ମତଦାନ ହୋଇଛି । ଆନ୍ଧ୍ରପ୍ରଦେଶରେ ୭୬.୫୦ ପ୍ରତିଶତ, ବିହାରରେ ୫୭.୦୬, ଝଡ଼ଖଣ୍ଡରେ ୬୫.୨, ମଧ୍ୟପ୍ରଦେଶରେ ୭୦.୯୮, ମହାରାଷ୍ଟ୍ରରେ ୫୯.୬୪, ତେଲଙ୍ଗାନାରେ ୬୪.୭୪, ଉତ୍ତରପ୍ରଦେଶରେ ୫୮.୦୫ ପ୍ରତିଶତ ମତଦାନ ହୋଇଛି ।
ନିର୍ବାଚନ ବେଳେ ପଶ୍ଚିମବଙ୍ଗ, ବିହାର ଓ ମହାରାଷ୍ଟ୍ରରେ ହିଂସାତ୍ମକ ଘଟଣା ଘଟି ୩ ଜଣଙ୍କ ମୃତ୍ୟୁ ହୋଇଛି । ପଶ୍ଚିମବଙ୍ଗର ବୋଲପୁରରେ ଜଣେ ଟିଏମ୍ସି କର୍ମୀଙ୍କୁ ହତ୍ୟା କରାଯାଇଥିଲା ବେଳେ ଦୁର୍ଗାପୁରରେ ବିଜେପି ଓ ଟିଏମ୍ସି କର୍ମୀଙ୍କ ମଧ୍ୟରେ ସଂଘର୍ଷ ଘଟିଛି । ବିହାରର ମୁଙ୍ଗେରରେ ଜଣେ ପୋଲିଂ ଅଧିକାରୀଙ୍କ ହୃଦ୍ଘାତରେ ଜୀବନ ଯାଇଛି । ମୁଙ୍ଗେରର ଏକ ବୁଥରେ ପୁଲିସ ଓ ସ୍ଥାନୀୟ ଲୋକଙ୍କ ମଧ୍ୟରେ ଗଣ୍ଡଗୋଳ ଘଟିଛି । ପୁଲିସ ଲାଠି ମାଡ କରିବା ସହ ୨ ଜଣଙ୍କୁ ଗିରଫ କରିଛି । ସେହିଭଳି ମହାରାଷ୍ଟ୍ରର ବିଡ୍ରେ ଏକ ନ୍ୟୁଜ ଚ୍ୟାନେଲର ଜଣେ ସାମ୍ବାଦିକଙ୍କର ହୃଦ୍ଘାତରେ ମୃତ୍ୟୁ ହୋଇଛି । ଆନ୍ଧ୍ରପ୍ରଦେଶ ଗୁଣ୍ଟୁରରେ ସ୍ଥାନୀୟ ବିଧାୟକ ଆନାବାଥୁନି ଶିବକୁମାର ଏକ ବୁଥରେ ଜଣେ ଭୋଟରଙ୍କୁ ଚାପୁଡା ମାରିଛନ୍ତି । ଭୋଟର ଜଣକ ମଧ୍ୟ ପାଲଟା ମାଡ ମାରିଥିଲେ । ପରେ ବିଧାୟକଙ୍କ ସମର୍ଥକ ସମ୍ପୃକ୍ତ ଭୋଟରଙ୍କୁ ମାଡ଼ ମାରିଥିବା ଜଣାପଡିଛି । ବିଧାୟକ ଧାଡ଼ିରେ ନ ଆସିବାରୁ ଯୁବକ ଜଣକ ଆପତ୍ତି ଉଠାଇଥିଲେ । ଏଥିରେ ସେ କ୍ଷୁବ୍ଧ ହୋଇପଡିଥିଲେ ।
ଚତୁର୍ଥ ପର୍ଯ୍ୟାୟରେ ଆନ୍ଧ୍ରପ୍ରଦେଶର ସମସ୍ତ ୨୫ ଓ ତେଲଙ୍ଗାନାର ସମସ୍ତ ୧୭ ଆସନରେ ଭୋଟ ଗ୍ରହଣ ଶେଷ ହୋଇଛି । ଏହା ବ୍ୟତୀତ ଉତ୍ତରପ୍ରଦେଶର ୧୩, ମହାରାଷ୍ଟ୍ରର ୧୧, ମଧ୍ୟପ୍ରଦେଶ ଓ ପଶ୍ଚିମବଙ୍ଗର ୮ ଲେଖାଏ, ବିହାରର ୫, ଓଡ଼ିଶା ଓ ଝାଡଖଣ୍ଡର ୪ ଲେଖାଏ ଏବଂ ଜମ୍ମୁ-କାଶ୍ମୀରର ଗୋଟିଏ ଆସନ ତଥା ଶ୍ରୀନଗରରେ ମତଦାନ ହୋଇଛି । ଏଥିସହ ଆନ୍ଧ୍ରପ୍ରଦେଶର ସମସ୍ତ ୧୭୫ ଓ ଓଡ଼ିଶାର ୨୮ଟି ବିଧାନସଭା ଆସନ ପାଇଁ ମଧ୍ୟ ଭୋଟ ଗ୍ରହଣ କରାଯାଇଛି । ଆଜି ଇଭିଏମ୍ରେ ସିଲ୍ ହୋଇଥିବା ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ଅଛନ୍ତି କେନ୍ଦ୍ରମନ୍ତ୍ରୀ ଗିରିରାଜ ସିଂହ, ଅଜୟ ମିଶ୍ର ଟୋନି, ନିତ୍ୟାନନ୍ଦ ରାୟ, ଜି.କିଷନ ରେଡ୍ଡୀ, ରାୟ ସାହେବ ଦାନ୍ବେ ଏବଂ ଅର୍ଜୁନ ମୁଣ୍ଡା । ଏଥିସହ ଅଖିଳେଶ ଯାଦବ, ଓମାର ଅବଦୁଲ୍ଲା, ଅଧିର ରଞ୍ଜନ ଚୌଧୁରୀ, ମହୁଆ ମୋଇତ୍ର, ଶତ୍ରୁଘ୍ନ ସିହ୍ନା, ଅସଦୁଦ୍ଦିନ ଓୱେସି ଏବଂ ୱାଇଏସ୍ ଶର୍ମିଳା ମଧ୍ୟ ଭାଗ୍ୟ ପରୀକ୍ଷା କରିଛନ୍ତି ।
