ନୂଆଦିଲ୍ଲୀ,୨୦/୦୫: ୨୦୨୪ ଲୋକସଭା ନିର୍ବାଚନର ପଞ୍ଚମ ପର୍ଯ୍ୟାୟ ମତଦାନ ଜାରି । ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ତାଲିବ ଭୋଟିଂ । ୬ ରାଜ୍ୟ ଓ ୨ କେନ୍ଦ୍ରଶାସିତ ଅଞ୍ଚଳର ମୋଟ ୪୯ଟି ଲୋକସଭା ଆସନରେ ମତଦାନ ହେଉଛି । ଏହି ପର୍ଯ୍ୟାୟରେ ରାଜନାଥ ସିଂହ, ସ୍ମୃତି ଇରାନୀ ଓ ପୀୟୂଷ ଗୋୟଲଙ୍କ ସମେତ ୯ କେନ୍ଦ୍ରମନ୍ତ୍ରୀଙ୍କ ଭାଗ୍ୟ ପରୀକ୍ଷା ହେଉଛି । ସେହିଭଳି ୟୁପିର ରାଏବରେଲି ଆସନରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭାଗ୍ୟ ପରୀକ୍ଷା ହେବ । ରାଏବରେଲି ଆସନରୁ ସୋନିଆ ଗାନ୍ଧୀ ଲଗାତର ଜିତିଆସୁଥିଲା ବେଳେ ଏଥର ତାଙ୍କ ପୁତ୍ର ରାହୁଲ ଏଠାରୁ ଲଢ଼ୁଛନ୍ତି । ତାଙ୍କୁ ଟକ୍କର ଦେଉଛନ୍ତି ବିଜେପି ପ୍ରାର୍ଥୀ ଦିନେଶ ପ୍ରତାପ ସିଂହ । ସୋମବାର ଓଡ଼ିଶାର ୩୫ ବିଧାନସଭା ଆସନରେ ବି ଏକସଙ୍ଗେ ଭୋଟ୍ ପଡ଼ିବ ।
ପଞ୍ଚମ ପର୍ଯ୍ୟାୟରେ ବିହାରର ୫, ଝାଡ଼ଖଣ୍ଡର ୩, ମହାରାଷ୍ଟ୍ରର ୧୩, ଓଡ଼ିଶାର ୫, ଉତ୍ତର ପ୍ରଦେଶର ୧୪ ଓ ପଶ୍ଚିମବଙ୍ଗର ୭ ଏବଂ ଜମ୍ମୁ-କାଶ୍ମୀର ଓ ଲଦାଖର ଗୋଟିଏ ଲେଖାଏଁ ଆସନରେ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ । ପ୍ରମୁଖ ପ୍ରାର୍ଥୀ ଭାବେ ଲକ୍ଷ୍ନୌ ଲୋକସଭା ଆସନରୁ ରାଜନାଥ ସିଂହ ଲଢ଼ୁଛନ୍ତି । ତାଙ୍କ ସାମ୍ନାରେ ସମାଜବାଦୀ ପାର୍ଟିରୁ ରବିଦାସ ମେହରୋତ୍ରୀ ପ୍ରାର୍ଥୀ ହୋଇଛନ୍ତି । ସେହିପରି ଅମେଥି ଆସନରୁ ସ୍ମୃତି ଇରାନୀ ନିର୍ବାଚନ ଲଢ଼ୁଛନ୍ତି । ତାଙ୍କ ବିରୋଧରେ କଂଗ୍ରେସ ଗାନ୍ଧି ପରିବାରର ଘନିଷ୍ଠ କେ,ଏଲ ଶର୍ମାଙ୍କୁ ଟିକେଟ୍ ଦେଇଛି । ଉଭୟଙ୍କ ମଧ୍ୟରେ କଡ଼ା ଟକ୍କର ହେବ ବୋଲି କୁହାଯାଉଛି । ସେହିପରି ଏହି ଆସନରୁ ନହ୍ନେ ସିଂହ ବିଏସପିରୁ ପ୍ରାର୍ଥୀ ହୋଅଛନ୍ତି ।
ପଞ୍ଚମ ପର୍ଯ୍ୟାୟରେ ଚର୍ଚ୍ଚିତ ଲୋକସଭା ଆସନ ରାଏବରେଲିରୁ ରାହୁଲ ଗାନ୍ଧିଙ୍କ ଭାଗ୍ୟ ପରୀକ୍ଷା ଚାଲିଛି । ଏହି ଆସନର ଉତ୍ତରପ୍ରଦେଶ ଏକମାତ୍ର ଆସନ ଯେଉଁଠି କଂଗ୍ରେସ ବିଜୟୀ ହୋଇଥିଲା । ୨୦୧୯ରେ ସୋନିଆ ଗାନ୍ଧି ଏଠାରୁ ବିଜୟୀ ହୋଇଥିଲେ । ୨୦୨୪ ନିର୍ବାଚନରେ ଏହି ଆସନକୁ ନିଜ ପୁଅ ରାହୁଲ ଗାନ୍ଧିଙ୍କ ପାଇଁ ଛାଡ଼ିଛନ୍ତି । ରାହୁଲଙ୍କ ସାମ୍ନାରେ ବିଜେପି ପ୍ରାର୍ଥୀ ଦିନେଶ ପ୍ରଦାପ ସିଂହ ରହିଛନ୍ତି ।
ପୀୟୂଷ ଗୋୟଲ ହାଇପ୍ରୋଫାଇଲ୍ ସିଟ୍ ମୁମ୍ବାଇ ନର୍ଥରୁ ନିର୍ବାଚନ ଲଢ଼ୁଛନ୍ତି । ଗୋଏଲ ଏବେ ମହାରାଷ୍ଟ୍ର ବିଜେପିରୁ ରାଜ୍ୟସଭା ସଂସଦ ରହିଛନ୍ତି । ପୀୟୂଷଙ୍କ ବିରୋଧରେ କଂଗ୍ରେସ ଭୂଷଣ ପାଟିଲ୍ ରହିଛନ୍ତି । ବିଜେପିର କରନ ଭୂଷଣ ସିଂହ କୈସରଗଞ୍ଜରୁ, ଏଲ୍ଜେପି (ଆର)ର ଚିରାଗ ପାଶ୍ୱାନ ହାଜିପୁରରୁ ଭାଗ୍ୟ ପରୀକ୍ଷା ହେଉଛି । ବିଜେପିର ରାଜଭୂଷଣ ଚୌଧୁରୀ ମୁଜାଫରପୁରରୁ ଲଢ଼ୁଥିବା ବେଳେ ବାରାମୂଳାରୁ ଲଢ଼ୁଛନ୍ତି ନ୍ୟାସନାଲ କନ୍ଫରେନ୍ସ ନେତା ଓମାର ଅବ୍ଦୁଲ୍ଲା । ପଶ୍ଚିମବଙ୍ଗର ହୁଗୁଳି ଲୋକସଭା ଆସନରୁ ଟିଏମସି ଟିକେଟରେ ଲଢ଼ୁଛନ୍ତି ଅଭିନେତ୍ରୀ ରଚନା ବାନାର୍ଜୀ ଓ ଲକେଟ୍ ଚାଟାର୍ଜୀ ବିଜେପିରୁ ଭାଗ୍ୟ ପରୀକ୍ଷା ଚାଲିଛି । ରଚନା ପ୍ରଥମ ଥର ପାଇଁ ଲୋକସଭା ନିର୍ବାଚନ ଲଢ଼ୁଥିବା ବେଳେ ଲକେଟ୍ ଏବେ ସାଂସଦ ରହିଛନ୍ତି । ଉଭୟଙ୍କ ମଧ୍ୟରେ କଡ଼ା ମୁକାବିଲା ହେଉଛି । ପଞ୍ଚମ ପର୍ଯ୍ୟାୟରେ ୪୯ ଆସନ ପାଇଁ ମୋଟ ୬୯୫ ପ୍ରାର୍ଥୀ ରହିଛନ୍ତି । ଏମାନଙ୍କ ମଧ୍ୟରୁ ୧୨% ମହିଳା ।
ସୂଚନାଯୋଗ୍ୟ, ମେ ୨୫ରେ ଷଷ୍ଠ ଓ ଜୁନ୍ ୧ରେ ସପ୍ତମ ତଥା ଅନ୍ତିମ ପର୍ଯ୍ୟାୟ ନିର୍ବାଚନ ହେବ । ଷଷ୍ଠ ପର୍ଯ୍ୟାୟରେ ୮ ରାଜ୍ୟର ଓ କେନ୍ଦ୍ରଶାସିତ ଅଞ୍ଚଳର ମୋଟ ୫୭ ଆସନରେ ମତଦାନ ହେବାକୁ ଥିବା ବେଳେ ଦୌଡ଼ରେ ୮୮୯ ପ୍ରାର୍ଥୀ ରହିଛନ୍ତି । ସପ୍ତମ ପର୍ଯ୍ୟାୟରେ ବି ୫୭ ଆସନରେ ଭୋଟ ପଡ଼ିବ ।
