ଅହମ୍ମଦାବାଦ ୫|୧୧: ଗୁଜୁରାଟ ସଚ୍ଚିବାଳୟ ମଧ୍ୟରେ ଆଜି ସକାଳୁ ସକାଳୁ ଏକ କଲରାପତରିଆ ବାଘ ପଶିଯାଇଛି । ସିସିଟିଭି ଫୁଟେଜରୁ ଏକଥା ଜଣାପଡିବା ପରେ ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଛି । ଫଳରେ ଗୁଜୁରାଟ ସଚ୍ଚିବାଳୟକୁ ବନ କର୍ମଚାରୀ ଏବଂ ପୋଲିସ କର୍ଡନ କରି ରଖିଛନ୍ତି ।  କଲରାପତରିଆକୁ ଧରିବା ପାଇଁ ଟ୍ରାଙ୍କୁଲାଇଜିଂ ଟିମକୁ ବାଘ ଧରିବା ଅଭିଯାନରେ ସାମିଲ କରାଯାଇଛି । ସିସିଟିଭିରୁ ମିଳିଥିବା ସୂଚନା ଅନୁସାରେ ଆଜି ସକାଳ ପ୍ରାୟ ୭ଟା ବେଳକୁ ସଚିବାଳୟର ୭ନଂ ଗେଟ୍ ତଳେ ଗୁରୁଣ୍ଡି ଗୁରୁଣ୍ଡି କଲରାପତରିଆ ବାଘ ସଚିବାଳୟ ପରିସରକୁ ପ୍ରବେଶ କରିଥିଲା । କଲରାପତରିଆ ପ୍ରବେଶ କରିଥିବା ବ୍ଲକ୍ ରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ରହିଛି । ସଚିବାଳୟ ଭିତରେ ବାଘ ଥିବାରୁ ଆଜି ସଚିବାଳୟ କାର୍ଯ୍ୟ ବନ୍ଦରହିଛି । ପାଖାପାଖି ୨ଶହ ବନ କର୍ମଚାରୀ ଏହି ଅପରେସନରେ ସାମିଲ ହୋଇଛନ୍ତି । ତେବେ ବାଘଟି କେଉଁଠୁ ଓ କେମିତି ଆସିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ବାଘ ସଚିବାଳୟ ପର୍ଯ୍ୟନ୍ତ ପହଞ୍ଚିବା ଭିତରେ କାହାକୁ ଆକ୍ରମଣ କରିଛି କି ନାହିଁ ତାହା ମଧ୍ୟ ପୋଲିସ ଯାଞ୍ଚ କରୁଛି ।