ବିହାର ୦୬/୧୧ : ବହୁ ଚର୍ଚ୍ଚିତ ଚାରା ଘୋଟାଲା ମାମଲାରେ ଦୋଷୀ ସାବ୍ୟସ୍ତ ହୋଇ ଜେଲଦଣ୍ଡ ଭୋଗୁଥିବା ରାଷ୍ଟ୍ରୀୟ ଜନତା ଦଳ (ଆରଜେଡି) ପ୍ରମୁଖ ଲାଲୁ ପ୍ରସାଦ ଯାଦବଙ୍କ ବେଲ୍ ମିଳିବା ନେଇ ଆଜି ଝାଡଖଣ୍ଡ ହାଇକୋର୍ଟରେ ଗୁରୁତ୍ବପୂର୍ଣ୍ଣ ଶୁଣାଣି ହେବ । ଲାଲୁଙ୍କୁ ବେଲ୍ ମିଳିବ ନା କୋର୍ଟରୁ ନିରାଶ ହେବେ ସେ ନେଇ ସମର୍ଥକ ମାନଙ୍କ ମଧ୍ୟରେ ସସପେନ୍ସ ଲାଗି ରହିଛି । ବେଲ୍ ପାଇଁ ଆବେଦନ କରିବା ପରେ ନଭେମ୍ବର ୬ ତାରିଖରେ ଶୁଣାଣି ପାଇଁ ଦିନ ଧାର୍ଯ୍ୟ କରିଥିଲେ କୋର୍ଟ ।
ଚାରା ଘୋଟାଲା ସହ ଜଡିତ ଦୁମକା ଟ୍ରେଜେରିରୁ ଅବୈଧ ଭାବେ ୧୩୯ କୋଟି ଟଙ୍କା ଉଠାଣ ଓ ୩.୧୩ କୋଟି ଟଙ୍କା ହେରଫେର ମାମଲାରେ ଲାଲୁ ଯାଦବଙ୍କୁ ୭ ବର୍ଷ ଦଣ୍ଡ ଶୁଣାଇବା ସହ ଆର୍ଥିକ ଜରିମାନା ମଧ୍ୟ ଆଦାୟ କରିଥିଲେ କୋର୍ଟ । ତେବେ ଜେଲ୍ ଦଣ୍ଡ ଭୋଗିବାର ଅଧା ବର୍ଷ ପୂରିଯାଇଥିବାରୁ ବେଲ୍ ପାଇଁ ଆବେଦନ କରିଥିଲେ ଲାଲୁଙ୍କ ଓକିଲ ପ୍ରଭାତ କୁମାର ଯାହାର ଶୁଣାଣି ଆଜି ହେବାକୁ ଯାଉଛି । ଯଦି କୋର୍ଟ ଶୁଣାଣି କରି ବେଲ୍ ପ୍ରଦାନ କରନ୍ତି ତେବେ ସେ ଜେଲରୁ ବାହାରକୁ ଆସିପାରିବେ ।
ଲାଲୁ ଯାଦବଙ୍କୁ ଚାରା ଘୋଟାଲା ମାମଲାରେ ମୋଟ ୫ଟି ରୁ ୪ଟି ମାମଲାରେ ଦୋଷୀ ସାବ୍ୟସ୍ତ କରିଥିଲେ କୋର୍ଟ । ସେହି ୪ ମାମଲା ମଧ୍ୟରୁ ୩ଟିରେ ଲାଲୁଙ୍କୁ ବେଲ୍ ମିଳିସାରିଛି, ଯଦି ଆଜି ବେଲ୍ ମିଳିଯାଏ ତେବେ ଲାଲୁଙ୍କ ଜେଲରୁ ବାହାରିବା ଆଶା ଅଧିକ ।
