ପାଟଣାଗଡ଼: ଘର ଆଗରେ ଠିଆ ହୋଇ ଗପସପ କରୁଥିଲେ। ଚାହୁଁ ଚାହୁଁ ମାଡ଼ିଆସିଲା କାଳ, ନେଇଗଲା ଜୀବନ। ୩ ଯୁବତୀଙ୍କ ଉପରେ ଚଢ଼ିଗଲା କାର। ଏଭଳି ଦୁଃଖଦ ଘଟଣା ଘଟିଛି ପାଟଣାଗଡ ବେଲପଡ଼ା ବ୍ଲକର ନୁନହାଡ ଗ୍ରାମରେ। ଦୁର୍ଘଟଣାରେ ଜଣକର ମୃତ୍ୟୁ ହୋଇଛି। ସେହିପରି ୨ ଜଣ ଗୁରୁତର ଭାବେ ଆହତ ହୋଇଛନ୍ତି।
ଆଜି ସନ୍ଧ୍ୟା ସମୟରେ ନୁନହାଡ ଗ୍ରାମର ଭୋଲେଶ୍ୱରି ମାଝୀ, ଯେମନ୍ତ ମାଝୀ ଓ ପ୍ରତିମା ଧାରୁଆ ତାଙ୍କ ଘର ସମ୍ମୁଖରେ ଛିଡା ହୋଇଥିଲେ। ସେହି ସମୟରେ ଏକ କାର ଦ୍ରୁତ ଗତିରେ ଆସି ତିନି ଝିଅଙ୍କୁ ଧକ୍କା ଦେଇଥିଲା। ତିନି ଜଣ ଗୁରୁତର ଅବସ୍ଥାରେ ବେଲପଡ଼ା ମେଡିକାଲରେ ଭର୍ତ୍ତି ହୋଇଥିଲେ। ପରେ ଭୋଲେଶ୍ୱରି ମାଝୀ ଗୁରୁତର ହେବାରୁ ତାଙ୍କୁ ପାଟଣାଗଡ ମେଡିକାଲକୁ ସ୍ଥାନାନ୍ତର କରାଯାଇଥିଲା।
ସେଠାରେ ଡାକ୍ତର ଭୋଲେଶ୍ୱରିଙ୍କୁ ମୃତ ଘୋଷଣା କରିଥିଲେ। ଅନ୍ୟ ୨ ଜଣ ବେଲପଡା ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି। ଘଟଣା ପରେ ସ୍ଥାନୀୟ ଲୋକେ ଟାୟାର ଜାଳି ବେଲପଡ଼ା କଣ୍ଟାବାଞ୍ଜି ରାସ୍ତା ଅବରୋଧ କରିଛନ୍ତି। ଘଟଣାସ୍ଥଳରେ ବେଲପଡ଼ା ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରୁଛି। ଦୁର୍ଘଟଣା ଘଟାଇଥିବା କାର୍ ଏକ ଢାବା ମାଲିକଙ୍କ ହୋଇଥିବା ଜଣାପଡ଼ିଛି।
