ଟୋକିଓ, ୦୫/୦୮ : ଟୋକିଓ ଅଲିମ୍ପିକ୍ସର ୧୪ତମ ଦିନରେ ଭାରତୀୟ ହକି ଦଳ ପଦକ ଜିତି ଇତିହାସ ରଚିଛି । ଅନ୍ୟପଟେ କିନ୍ତୁ ଭାରତୀୟ ମହିଳା କୁସ୍ତିଯୋଦ୍ଧା ତଥା ସୁନା ଜିତିବା ପାଇଁ ଦାବିଦାର ଥିବା ଭିନେଶ ଫୋଗାଟ ପରାସ୍ତ ହୋଇଛନ୍ତି । ସେ କ୍ୱାର୍ଟର ଫାଇନାଲରେ ବେଲାରୁଷର ଭାନେସା କାଲାଜିନ୍ସକାୟାଙ୍କଠାରୁ ୯-୩ ପଏଣ୍ଟରେ ହାରିଛନ୍ତି ।
କ୍ୱାର୍ଟର ଫାଇନାଲରେ ମିଳିଥିବା ପରାଜୟ ପରେ ଭିନେଶ ସୁନା ପଦକ ରେସରୁ ବାଦ୍ ପଡିଛନ୍ତି । ସେ ୫୩ କେଜି ଫ୍ରି ଷ୍ଟାଇଲ ବର୍ଗରେ ସବୁଠାରୁ ବଡ ଦାବିଦାର ଥିଲେ । କିନ୍ତୁ ବେଲାରୁଷ ଖେଳାଳି ନିଜ ଡିଫେନ୍ସରେ ବିନେଶଙ୍କୁ ମାତ୍ ଦେଇଥିଲେ ।
ବେଲାଋଷର ଭାନେସା ପ୍ରଥମ ରାଉଣ୍ଡରୁ ହିଁ ବିନେଶଙ୍କ ଉପରେ ଭାରି ପଡିଥିଲେ । ପ୍ରଥମ ରାଉଣ୍ଡରେ ଭାନେସା ମଜବୁତ ଡିଫେନ୍ସ କରି ବିନେଶଙ୍କୁ କାଉଣ୍ଟରର ସୁଯୋଗ ଦେଇନଥିଲେ । ଏହାସହ ୩-୧ରେ ଆଗୁଆ ରହିଥିଲେ ।ଦ୍ୱିତୀୟ ରାଉଣ୍ଡରେ ଫୋଗାଟ ପ୍ରତ୍ୟାବର୍ତ୍ତନ ପାଇଁ ଜୋରଦାର କସରତ କରି ୫-୩କୁ ଆଣିଥିଲେ । କିନ୍ତୁ ସେତେବେଳେ ବେନେସା ପିନ୍ ପଏଣ୍ଟ ହାସଲ କରି ୧ ମିନିଟ ପୂର୍ବରୁ ମ୍ୟାଚ୍ ଶେଷ କରିଥିଲେ । ଏହାସହ ମୁକାବିଲାକୁ ୯-୩ରେ ଜିତି ସେମିଫାଇନାଲରେ ସ୍ଥାନ ପକା କରିଥିଲେ ।
ଏବେବି ଭିନେଶଙ୍କ ପଦକ ଆଶା ମରିନି । ଯଦି ଭାନେସା ଫାଇନାଲରେ ସ୍ଥାନ ପାଉଛନ୍ତି ତେବେ ଭିନେଶଙ୍କୁ କାଂସ୍ୟ ପାଇଁ ଲଢିବାକୁ ସୁଯୋଗ ମିଳିବ ।
