ବିଧାନସଭାରେ ବହୁମତ ସାବ୍ୟସ୍ତ କରିବାରେ ସକ୍ଷମ ହୋଇଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚ.ଡି.କୁମାରସ୍ବାମୀ | ଫଳରେ ଗତ ୧୦ ଦିନ ଧରି କର୍ଣ୍ଣାଟକରେ ଲାଗିରହିଥିବା ରାଜନୈତିକ ଅସ୍ଥିରତାର ଅବସାଦ ଘଟିଛି | ଏବେ ବଡ ଆହ୍ୱାନ ହେଉଛି ଜେଡିଏସ ଓ କଂଗ୍ରେସ ମିଳିତ ମେଣ୍ଟ ସରକାରର ସ୍ଥିରତା |
ସୂଚନାଯୋଗ୍ୟ ଯେ, କୁମାରସ୍ବାମୀ ଦ୍ୱିତୀୟଥର ପାଇଁ କର୍ଣ୍ଣାଟକର ମୁଖ୍ୟମନ୍ତ୍ରୀ ହୋଇଛନ୍ତି | ଏଥିପୂର୍ବରୁ ୨୦୦୬ ମସିହାରେ ସେ କର୍ଣ୍ଣାଟକର ମୁଖ୍ୟମନ୍ତ୍ରୀ ହୋଇଥିଲେ | ୯ ଅକ୍ଟୋବର ୨୦୦୭ ପର୍ଯ୍ୟନ୍ତ ସେ ୩ ବର୍ଷ ମୁଖ୍ୟମନ୍ତ୍ରୀ ଭାବେ କାମ କରିଥିଲେ | ଏଥର ଭଳି ୨୦୦୪ ମସିହା ବିଧାନସଭା ନିର୍ବାଚନରେ ମଧ୍ୟ ଝୁଲା ଅବସ୍ଥା ସୃଷ୍ଟି ହୋଇଥିଲା | ଜେଡିଏସ ୪୧ ଆସନରେ ବିଜୟୀ ହୋଇଥିଲା | ଜେଡିଏସ କଂଗ୍ରେସକୁ ସମର୍ଥନ ଦେବା ଫଳରେ କଂଗ୍ରେସ ସରକାର ଗଠନ କରିଥିଲା | କଂଗ୍ରେସ ନେତା ଧରମ ସିଂ ମୁଖ୍ୟମନ୍ତ୍ରୀ ହୋଇଥିଲେ | କିନ୍ତୁ ୨୦୦୬ ମସିହାରେ ୪୨ ବିଧାୟକଙ୍କୁ ନେଇ ଏଚ.ଡି.କୁମାରସ୍ବାମୀ କଂଗ୍ରେସ ଠାରୁ ସମର୍ଥନ ପ୍ରତ୍ୟାହାର କରିଥିଲେ | ଫଳରେ କଂଗ୍ରେସ ସରକାରଙ୍କ ପତନ ଘଟିଥିଲା ଏବଂ କୁମାରସ୍ବାମୀ ମୁଖ୍ୟମନ୍ତ୍ରୀ ହୋଇଥିଲେ | ତେଣୁ କୁହାଯାଇପାରେ କଂଗ୍ରେସ ଓ ଜେଡିଏସ ମଧ୍ୟରେ ଲବ ଏଣ୍ଡ ହେଟ ରିଲେସନର ପୁରୁଣା ଇତିହାସ ରହିଛି | ଏଥର ମଧ୍ୟ କଂଗ୍ରେସ ଜେଡିଏସ ମେଣ୍ଟ ହିଁ କର୍ଣ୍ଣାଟକରେ ସରକାର ଗଠନ କରିଛନ୍ତି | ତେବେ ସରକାରର ସ୍ଥାୟୀତ୍ୱ ନେଇ ସମସ୍ତଙ୍କ ମନରେ ସ୍ୱାଭାବିକ ଆକାଂକ୍ଷା ରହିଛି |
୧୬ ଡିସେମ୍ବର ୧୯୫୯ ମସିହାରେ ରାଜନୈତିକ ପରିବାରରେ ଜନ୍ମିତ ଏଚ.ଡି.କୁମାରସ୍ବାମୀ ଏବେ ୫୮ ବର୍ଷ ବୟସ୍କ | ପିତା ଏଚ.ଡି.ଦେବେଗୌଡ଼ା ଭାରତର ପୂର୍ବତନ ପ୍ରଧାନମନ୍ତ୍ରୀ | କର୍ଣ୍ଣାଟକରେ ଅନ୍ୟାନ୍ୟ ପଛୁଆ ବର୍ଗ ଭାବେ ପରିଗଣିତ ଭୋକାଳୀଗା ସମ୍ପ୍ରଦାୟର ଅଟନ୍ତି କୁମାରସ୍ବାମୀ | ତତ୍କାଳୀନ ମହୀଶୂର ରାଜ୍ୟର ହରଡା ହୋଲିରେ ଜନ୍ମଗ୍ରହଣ କରିଥିଲେ କୁମାରସ୍ବାମୀ | ତାଙ୍କ ଘର ନାଁ ହେଲା କୁମାରାନ୍ନା |
୧୯୯୬ ମସିହାରେ ରାଜନୀତିକୁ ପ୍ରବେଶ କରିବା ପୂର୍ବରୁ କୁମାରାନ୍ନା ଫିଲ୍ମ ପ୍ରଯୋଜକ ଭାବେ ବେଶ ସଫଳ ହୋଇଥିଲେ | ବହୁ କନ୍ନଡ ଫିଲ୍ମର ସେ ପ୍ରଯୋଜନା କରିଛନ୍ତି | ତାଙ୍କ ପ୍ରଯୋଜିତ ଫିଲ୍ମ ଗୁଡିକ ମଧ୍ୟରୁ ଚନ୍ଦ୍ରଚକୋରି ସବୁଠୁ ବଡ ହିଟ ଫିଲ୍ମ ଥିଲା | ପ୍ରେକ୍ଷାଳୟରେ ଏକକାଳୀନ ୩୬୫ ଦିନ ପ୍ରଦର୍ଶିତ ହୋଇ ରେକର୍ଡ ସୃଷ୍ଟୁଇ କରିଥିଲା |
୧୯୯୬ ମସିହା ସାଧାରଣ ନିର୍ବାଚନରେ କର୍ଣ୍ଣାଟକର ରାମନଗଡ଼ ଜିଲ୍ଲାରେ ଥିବା କନକପୁରା ଲୋକସଭା ଆସନରୁ ପ୍ରାର୍ଥୀ ହୋଇ ରାଜନୀତି ଜୀବନ ଆରମ୍ଭ କରିଥିଲେ | ଏହି ନିର୍ବାଚନରେ ସେ ଲୋକସଭାକୁ ନିର୍ବାଚିତ ମଧ୍ୟ ହୋଇଥିଲେ | ତେବେ ୧୯୯୮ ଓ ୧୯୯୯ ମସିହାରେ ଏହି ନିର୍ବାଚନ ମଣ୍ଡଳୀରୁ କୁମାରସ୍ବାମୀ ଶୋଚନୀୟ ଭାବେ ପରାଜୟ ବାରଣ କରିଥିଲେ | ତେବେ ୨୦୦୪ ମସିହାରେ ରାମନଗଡ଼ ବିଧାନସଭା ଆସନରୁ ସେ ବିଧାୟକ ଭାବେ ନିର୍ବାଚିତ ହୋଇଥିଲେ | ତା’ ପରଠୁ ୨୦୦୯,୨୦୧୪ ବିଧାନସଭା ନିର୍ବାଚନରେ ସେ ଏହି ଆସନରୁ ଲଗାତାର ବିଜୟୀ ହୋଇଥିଲେ | ନିକଟରେ ସରିଥିବା ନିର୍ବାଚନରେ ସେ ୨ଟି ଆସନରୁ ବିଧାୟକ ଭାବେ ନିର୍ବାଚିତ ହୋଇଛନ୍ତି | ୨୦୧୩ ମସିହାରେ ସେ କର୍ଣ୍ଣାଟକ ବିଧାନସଭାରେ ବିରୋଧୀଦଳ ନେତା ଭାବେ ନିର୍ବାଚିତ ହୋଇଥିଲେ | ତାଙ୍କ ରାଜନୈତିକ ଜୀବନର ମୁଖ୍ୟ ଶତ୍ରୁ ବୋଲି ବିଜେପି ନେତା ୟେଦୁରପ୍ପାଙ୍କୁ ବିଚାର କରନ୍ତି |
ମୁଖ୍ୟତଃ ଦୁଇଟି ପ୍ରସଙ୍ଗରେ କୁମାରସ୍ବାମୀ ବିବାଦୀୟ ହୋଇପଡିଥିଲେ | ପ୍ରଥମତଃ କର୍ଣ୍ଣାଟକରେ ଖଣି ଦୁର୍ନୀତିରେ ସେ ସଂପୃକ୍ତ ଥିବା ଅଭିଯୋଗ ହୋଇଥିବା ବେଳେ ନିଜ ପାରିବାରିକ ଜୀବନକୁ ନେଇ ମଧ୍ୟ ସେ ବିବାଦୀୟ ଥିଲେ | କୁମାରସ୍ବାମୀ ୧୯୮୬ ମସିହାରେ ଅନିତାଙ୍କୁ ବିବାହ କରିଥିଲେ ମଧ୍ୟ ୨୦୦୬ ମସିହାରେ ଫିଲ୍ମ ତାରକା ରାଧିକାଙ୍କୁ ବିବାହ କରିଥିଲେ | ହିନ୍ଦୁ ବିବାହ ଆଇନ ୧୯୫୫କୁ ଉଲଂଘନ କରି ପ୍ରଥମ ପତ୍ନୀକୁ ଛାଡପତ୍ର ନଦେଇ ଦେ ଦ୍ୱିତୀୟ ବିବାହ କରିଛନ୍ତି |
ଏହାବ୍ୟତୀତ ୨୦୦୬ ମସିହାରେ ତତ୍କାଳୀନ କଂଗ୍ରେସ ସରକାରରୁ ସମର୍ଥନ ପ୍ରତ୍ୟାହାର କରିବାପରେ ସେ ବିଜେପି ସହ ମେଣ୍ଟ ଓ ମହାୟତାରେ ମୁଖ୍ୟମନ୍ତ୍ରୀ ହୋଇଥିଲେ | ବିଜେପି ସହିତ କୌଣସି ବୁଝାମଣା ନକରିବା ପାଇଁ ପିତା ଏଚ.ଡି.ଦେବେଗୌଡ଼ାଙ୍କ କଥାକୁ ସେ ରଖିନଥିଲେ | ଫଳରେ ପିତା ପୁତ୍ରଙ୍କ ମଧ୍ୟରେ ସମ୍ପର୍କ ତିକ୍ତ ହୋଇଥିଲା | ଚଳିତ ନିର୍ବାଚନ ପୂର୍ବରୁ ମଧ୍ୟ ଦେବେଗୌଡ଼ା ଆଶଙ୍କା କରୁଥିଲେ ଯେ, କୁମାରସ୍ବାମୀ ହୁଏତ ବିଜେପି ସହିତ ମେଣ୍ଟ କରିପାରନ୍ତି | ତେଣୁ ଦେବେଗୌଡ଼ା କହିଥିଲେ ଯେ,କୁମାରାନ୍ନା ଯଦି ବିଜେପି ସହିତ କୌଣସି ବୁଝାମଣା କରନ୍ତି ତାହେଲେ ସେ କୁମାରାନ୍ନାଙ୍କୁ ତେଜ୍ୟପୁତ୍ର କରିବେ |
ନିର୍ବାଚନ ପୂର୍ବରୁ ଜେଡିଏସ ବା କୁମାରସ୍ବାମୀ ଏଥର କିଙ୍ଗ ମେକର ହେବେ ବୋଲି ବିଭିନ୍ନ ରାଜନୈତିକ ସମୀକ୍ଷକ ଆକଳନ କରୁଥିଲେ |ହେଲେ କୁମାରସ୍ବାମୀ କିନ୍ତୁ କହୁଥିଲେ ଯେ, କିଙ୍ଗ ମେକର ନୁହେଁ ସେ କିଙ୍ଗ ହେବେ ଏବଂ ତାହା ସତ ହେଲା ଓ ସେ କର୍ଣ୍ଣାଟକର ଅଷ୍ଟାଦଶ ମୁଖ୍ୟମନ୍ତ୍ରୀ ହେଲେ |
କୁମାରସ୍ବାମୀ ତାଙ୍କ ପ୍ରଥମ ପତ୍ନୀ ଅନିତାଙ୍କ ବିରୋଧରେ ଆଉ ଏକ ବଡ ଦୁର୍ନୀତି ଅଭିଯୋଗ ରହିଛି | ନିର୍ଦ୍ଧିଷ୍ଟ ବିଲଡରଙ୍କୁ ନିଜ ପଦର ଅପବ୍ୟବହାର କରି ୮୦ ଏକର ମୂଲ୍ୟବାନ ଜମି ପ୍ରଦାନ କରିଥିବା ଅଭିଯୋଗ ହୋଇଥିଲେ |