ନୂଆଦିଲ୍ଲୀ: ଭାରତର ବିଶ୍ୱ ପ୍ରସିଦ୍ଧ କୋହିନୂର ହୀରାକୁ ନେଇ ବ୍ରେଟନ ପୁଣି ଏକ ଷଡଯନ୍ତ୍ର ରଚିବାକୁ ଯାଉଛି । ଉପନିବେଶ କାଳର ହୀରା କୋହିନୂରକୁ ମଇ ମାସରେ ଟାୱର ଅଫ୍ ଲଂଣ୍ଡନରେ ଏକ ସାର୍ବଜନୀନ କାର୍ଯ୍ୟକ୍ରମରେ ବିଜୟର ପ୍ରତୀକ ଭାବେ ପ୍ରଦର୍ଶିତ କରାଯିବ । ବ୍ରିଟେନର ହିଷ୍ଟୋରିକ୍ ରୟାଲ ପ୍ୟାଲେସ୍ ଚଳିତ ସପ୍ତାହରେ କହିଥିଲା ଯେ ପ୍ରଦର୍ଶନୀରେ କୋହିନୂରର ଇତିହାସ ମଧ୍ୟ ପ୍ରଦର୍ଶିତ କରାଯିବ । ଦିବଙ୍ଗତ ମହାରାଣୀ ଏଲିଜାବେଥ ଦ୍ୱିତୀୟଙ୍କ ମୁକୁଟରେ ଏହି ହୀରା ସ୍ଥାନ ପାଇଛି । ଉଲ୍ଲେଖଯୋଗ୍ୟ ଯେ ନୂଆ ମହାରାଣୀ କ୍ୟାମିଲା ଏହି ମୁକୁଟକୁ ପିନ୍ଧିବାକୁ ମନା କରିଥିଲେ ।
ବର୍ତ୍ତମାନ ଏହି ମୁକୁଟକୁ ଟାୱର ଅଫ୍ ଲଂଣ୍ଡନରେ ରଖାଯାଇଛି । ଚଳିତ ବର୍ଷ ମଇ ମାସରେ ମହାରାଜା ଚାଲର୍ସ ଦ୍ୱିତୀୟ ଏବଂ ତାଙ୍କ ପତ୍ନୀ କ୍ୟାମିଲାଙ୍କ ରାଜାଭିଷେକ ହେବ, ଯେଉଁଠାରେ କ୍ୟାମିଲା ଏହି ମୁକୁଟ ପିନ୍ଧିବେ ନାହିଁ । ଏଚଆରପି ନୂଆ ପ୍ରସ୍ତାବିକ ଯୋଜନା ବିଷୟରେ ଉଲ୍ଲେଖ କରି କହିଛି ଯେ, ମହାରାଣୀ ଏଲିଜାବେଥଙ୍କ ମୁକୁଟରେ ଥିବା କୋହିନୂରର ଇତିହାସକୁ ବିଜୟର ପ୍ରତୀକ ରୂପେ ପ୍ରଦର୍ଶିତ କରାଯିବ । ଏଥିରେ ସେହି ଇତିହାସକୁ ମଧ୍ୟ ସାମିଲ କରାଯିବ, ଯେତେବେଳେ ଏହି ହୀରା ମୋଗଲ ସାମ୍ରାଜ୍ୟ, ଇରାନର ରାଜା, ଆଫଗାନିସ୍ତାନର ଧନୀ ଏବଂ ଶିଖ ମହାରାଜାଙ୍କ ଶୋଭା ବଢାଉଥିଲା ।
ଫରାସୀ ଭାଷାରେ କୋହିନୂରର ଅର୍ଥ ଆଲୋକର ପର୍ବତକୁ ବୁଝାଇଥାଏ । ଏହି ହୀରା ମହାରାଜା ରଣଜୀତ ସିଂଙ୍କ ରାଜକୋଷରେ ସାମିଲ ଥିଲା, କିନ୍ତୁ ମହାରାଣୀ ଭିକ୍ଟୋରିଆ ଭାରତର ରାଣଈ ହେବାର କିଛି ବର୍ଷ ପୂର୍ବେ ଏହା ତାଙ୍କ କବଜାକୁ ଚାଲି ଯାଇଥିଲା । ଅତୀତରେ ବ୍ରିଟେନରେ ହୋଇଥିବା ରାଜାଭିଷେକରେ ଏହି ହୀରା ଆକର୍ଷଣର କେନ୍ଦ୍ର ରହିଥିଲା ।
କୋହିନୂର ହୀରା ଭାରତର ଆନ୍ଧ୍ର ପ୍ରଦେଶ ରାଜ୍ୟର ଗୋଲକୁଣ୍ଡାରୁ ମିଳିଥିଲା । ସେହି ସମୟରେ ଏହା ଓଜନ ୭୯୩ କ୍ୟାରେଟ୍ ରହିଥିଲା । ତେବେ ବର୍ତ୍ତମାନ ପୂର୍ବ ତୁଳନାରେ ଏହା ଛୋଟ ହୋଇ ସାରିଛି । ବ୍ରିଟେନର ଦାବି ଯେ ପଞ୍ଜାବର ରାଜା ଦୀଲିପ ସିଂ ଏକ ଚୁକ୍ତି ପରେ ଏହି ହୀରା ଦେଇଥିଲେ । ତେବେ ସତ ଏହା ଯେ ସେହି ସମୟରେ ଦୀଲିପଙ୍କ ବୟସ ମାତ୍ର ୧୦ ବର୍ଷ ଥିଲା । ବ୍ରିଟେନ ତାଙ୍କଠାରୁ ଏହି ହୀରା ଛଡାଇ ନେଇଥିଲା ।
