ନୂଆଦିଲ୍ଲୀ ୨୯।୯: ଗତ ପାଖାପାଖି ୧ ମାସ ହେଲା ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟରେ ହେଉଥିବା ବୃଦ୍ଧି ଯୋଗୁ ଘରୋଇ ବଜାରରେ ପେଟ୍ରୋଲ ଓ ଡିଜେଲ ଦର ମହଙ୍ଗା ହେବ ବୋଲି ଆଶଙ୍କା କରାଯାଉଛି। ଏଥିରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂହ ପୁରୀ ଶୁକ୍ରବାର ଦେଶବାସୀଙ୍କୁ ଖୁସି କରିବା ଭଳି ବୟାନ ଦେଇଛନ୍ତି। ସେ କହିଛନ୍ତି ଯେ ଦେଶରେ ତୈଳ ଦର ହ୍ରାସ ନ ହେଲେ ମଧ୍ୟ ବୃଦ୍ଧି ହେବନାହିଁ। ସେ କହିଛନ୍ତି ଯେ ଅଶୋଧିତ ତୈଳର ଦର ବୃଦ୍ଧି ଅଏଲ ମାର୍କେଟିଂ କମ୍ପାନୀ (ଓଏମସି)ଙ୍କ ଲାଗି ପେଟ୍ରୋଲ ଓ ଡିଜେଲ ଉଭୟ ଉପରେ ଅଣ୍ଡର ରିକୋଭରି ରହିଛି।
କେନ୍ଦ୍ରମନ୍ତ୍ରୀ କହିଛନ୍ତି ଯେ ଏଥିରେ ଦେଶରେ ପେଟ୍ରୋଲ ଓ ଡିଜେଲ ମୂଲ୍ୟ ବୃଦ୍ଧିର କୌଣସି ସମ୍ଭାବନା ନାହିଁ। ଦେଶରେ ପାର୍ବଣ ଋତୁ ପୂର୍ବରୁ କେନ୍ଦ୍ରମନ୍ତ୍ରୀଙ୍କ ବୟାନକୁ ଆଶ୍ୱସ୍ତିଭରା ବୋଲି କୁହାଯାଉଛି। ଉଲ୍ଲେଖ ଯୋଗ୍ୟ ଯେ ଗତ ଏକମାସ ହେଲା କ୍ରୁଡ ଅୟଲ ଦର ବୃଦ୍ଧିରେ ରୋକ ଲାଗୁ ନାହିଁ ଓ ଏହାର ବ୍ୟାରଲ ପିଛା ଦର ୧୦୦ ଡଲାର ପାଖାପାଖି ପହଞ୍ଚି ଗଲାଣି। ଶୁକ୍ରବାର ଡବ୍ଲୁଟିଆଇ କ୍ରୁଡ ୯୨ ଡଲାର ପ୍ରତି ବ୍ୟାରଲ କାରବାର କରୁଥିବା ବେଳେ ବ୍ରେଣ୍ଟ କ୍ରୁଡ ୯୫ ଡଲାର ସ୍ତରକୁ ପହଞ୍ଚିଛି।
{"id":850552,"sizeSlug":"full","linkDestination":"none"}![](https://www.prameyanews7.com/wp-content/uploads/2023/09/petrol-diesel-1.jpg)
କ୍ରୁଡ ଦର ଗତ ୧୩ ମାସର ସର୍ବୋଚ୍ଚ ସ୍ତରକୁ ପହଞ୍ଚିଛି। ଗତ ୩ ମାସରେ (ଜୁଲାଇ-ସେପ୍ଟେମ୍ବର) କ୍ରୁଡ ମୂଲ୍ୟରେ ୩୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି ଦେଖାଯାଇଛି। ସାଉଦୀ ଆରବ ଓ ଋଷିଆ କ୍ରୁଡ ଅଏଲ ଉତ୍ପାଦନ ଓ ଯୋଗାଣ ହ୍ରାସ କରିବା ଯୋଗୁ ଏପରି ଦରବୃଦ୍ଧି ହେଉଛି। ଉଲ୍ଲେଖଯୋଗ୍ୟ ଯେ ଦେଶରେ ଗତ ୧୬ ମାସରେ ପେଟ୍ରୋଲ ଓ ଡିଜେଲ ମୂଲ୍ୟରେ ସେପରି କୌଣସି ଉଠାପକା ଦେଖାଯାଇ ନାହିଁ। କେନ୍ଦ୍ର ସରକାର ଶେଷ ଥର ଏକ୍ସାଇଜ ଡ୍ୟୁଟି ହ୍ରାସ କରି ପେଟ୍ରୋଲ ଓ ଡିଜେଲ ଦରରେ ରିହାତି ଦେଇଥିଲେ।
ସେତେବେଳେ ରାଜଧାନୀ ଦିଲ୍ଲୀରେ ପେଟ୍ରୋଲ ମୂଲ୍ୟ ହ୍ରାସ ହୋଇ ଲିଟର ପିଛା ୯୨ଟଙ୍କା ୭୨ ପଇସା ଓ ଡିଜେଲ ମୂଲ୍ୟ ୮୯ଟଙ୍କା ୬୨ ପଇସାକୁ ଖସିଥିଲା। ଏହା ଛଡା ନୋଏଡାରେ ପେଟ୍ରୋଲ ଲିଟର ପିଛା ୯୬ଟଙ୍କା ୯୪ ପଇସା ଓ ଡିଜେଲ ୯୦ଟଙ୍କା ୧୪ ପଇସା ଦରରେ କାରବାର ହେଉଛି। ସେହିପରି ଗାଜିୟାବାଦରେ ଲିଟର ପିଛା ପେଟ୍ରୋଲ ୯୬ଟଙ୍କା ୫୮ ପଇସାରେ କାରବାର ହେଉଥିବା ବେଳେ ଡିଜେଲ ୮୯ଟଙ୍କା ୭୫ ପଇସା ରହିଛି। ଏହି ସମୟରେ ଗୁରୁଗ୍ରାମରେ ପେଟ୍ରୋଲ ଲିଟର ପିଛା ୯୭ଟଙ୍କା ୪ ପଇସାରେ କାରବାର ହେଉଥିବା ବେଳେ ଡିଜେଲ ୮୯ଟଙ୍କା ୯୧ପଇସାରେ ବିକାକିଣା ହେଉଛି।