ଅହମଦାବାଦ: ନଭେମ୍ବର ୧୯ ତାରିଖରେ ଅହମଦାବରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ବିଶ୍ୱକପ୍ ଫାଇନାଲ୍ ମ୍ୟାଚ୍ ଖେଳାଯାଉଛି। ଆଜିର ମ୍ୟାଚ୍ରେ ଏକାଧିକ ରେକର୍ଡ ସୃଷ୍ଟି ହୋଇଛି। ବିରାଟ କୋହଲିଙ୍କ ଉଭୟ ସେମିଫାଇନାଲ ଓ ଫାଇନାଲ୍ରେ ୫୦ରୁ ଅଧିକ ରନ୍ କରି ବିଶ୍ୱର ସପ୍ତମ ଓ ଭାରତର ପ୍ରଥମ ବ୍ୟାଟର ହୋଇଛନ୍ତି। ସେହିପରି କେଏଲ୍ ରାହୁଲ ମଧ୍ୟ ଆଜି ଏକ ରେକର୍ଡ କରିଛନ୍ତି।
କେଏଲ୍ ରାହୁଲ ଚତୁର୍ଥ ଭାରତୀୟ ବ୍ୟାଟର ଭାବେ ୨୦୨୩ ବର୍ଷର ଅନ୍ତର୍ଜାତୀୟ ମ୍ୟାଟ୍ରେ ୧୦୦୦ ରନ୍ ପୂରା କରିଛନ୍ତି। ଅଷ୍ଟ୍ରେଲିଆ ବିପକ୍ଷ ଫାଇନାଲ୍ ମ୍ୟାଚ୍ରେ ରାହୁଲ ଏହି ସଫଳତା ହାସଲ କରିଛନ୍ତି।
ଏହା ପୂର୍ବରୁ ଭାରତୀୟ ବ୍ୟାଟର ଭାବେ ଶୁଭମନ ଗିଲ୍, ବିରାଟ କୋହଲି ଓ ରୋହିତ ଶର୍ମା ଚଳିତ ବର୍ଷ ଅନ୍ତର୍ଜାତୀୟ କ୍ରିକେଟ୍ରେ ୧୦୦୦ ରନ୍ ପୂରା କରି ସାରିଛନ୍ତି। ତେବେ ବିଶ୍ୱରେ ୩୬ ଜଣ ବ୍ୟାଟର ଚଳିତ ବର୍ଷ ଏହି ରେକର୍ଡ କରିଛନ୍ତି।
ଆଜିର ମ୍ୟାଚ୍ରେ ଅଷ୍ଟ୍ରେଲିଆ ବିପକ୍ଷରେ ଭାରତ ବ୍ୟାଟିଂ ଦୁର୍ବଳ ରହିଥିଲା। ଶୁଭମନ ଗିଲ୍, ରୋହିତ ଓ ଶ୍ରେୟସ ଆୟରଙ୍କ ୱିକେଟ୍ ଯିବା ପରେ ବ୍ୟାଟିଂ କରିବାକୁ ଆସିଥିଲେ କେଏଲ୍ ରାହୁଲ। ଆଜିର ମ୍ୟାଚ୍ରେ ସେ ୮୬ ବଲ୍ରେ ଅର୍ଦ୍ଧଶତକ ହାସଲ କରିଥିଲେ। ଚଳିତ ବିଶ୍ୱକପ୍ ସଂସ୍କରଣରେ ଆଜି ପ୍ରଥମ ଥର ଏତେ ମନ୍ତର ଗତିରେ ଅର୍ଦ୍ଧଶତକ ହାସଲ କରିଥିଲେ ରାହୁଲ୍। ଚତୁର୍ଥ ୱିକେଟ୍ ପାଇଁ ଉଭୟ ବିରାଟ ଓ ରାହୁଲ ୬୪ ରନ୍ ଯୋଡ଼ିଥିଲେ।
ଏହା ପୂର୍ବରୁ ନେଦରଲାଣ୍ଡ ବିପକ୍ଷରେ କେ ଏଲ୍ ରାହୁଲ ପ୍ରଥମ ଭାରତୀୟ ବ୍ୟାଟର ଭାବେ ଦିନିକିଆ ବିଶ୍ୱକପ୍ରେ ଦ୍ରୁତ ଗତିରେ ଶତକ ହାସଲ କରିଥିଲେ। ବେଙ୍ଗାଲୁରୁର ଚିନ୍ନାସ୍ୱାମୀ ଷ୍ଟାଡିୟମ୍ରେ ମାତ୍ର ୬୨ ବଲ୍ରେ ଶତକ ମାରିଥିଲେ ରାହୁଲ୍।
ଅଷ୍ଟ୍ରେଲିଆ ବିପକ୍ଷରେ ଗତ ୮ ତାରିଖରେ ପ୍ରଥମ ବିଶ୍ୱକପ୍ ମ୍ୟାଚ୍ ଖେଳିଥିଲେ ରାହୁଲ। ଏଥିରେ ବି ସେ ଟିମ୍ ଇଣ୍ଡିଆ ପାଇଁ ସଂକଟମୋଚନ ହୋଇଥିଲେ। ଭାରତର ୩ଟି ୱିକେଟ୍ ଯାଇ ସାରିଥିବା ବେଳେ ରାହୁଲ ରକ୍ଷଣଶୀଳ ଭାବେ କ୍ରିକେଟ୍ ଖେଳି ୯୭ ରନ୍ କରି ନଟ୍ ଆଉଟ୍ ରହିଥିଲା। ଏଥିସହିତ ରାହୁଲ ବିଶ୍ୱକପ୍ରେ ଇଂଲଣ୍ଡ, ନ୍ୟୁଜିଲାଣ୍ଡ ଏବଂ ବାଂଲାଦେଶ ବିପକ୍ଷରେ ଯଥାକ୍ରମେ ୩୯,୨୭ ଓ ୩୪ ରନ୍ କରି ନଟ୍ ଆଉଟ୍ ରହିଥିଲେ।
ସୂଚନା ଥାଉକି ଆଜିର ମ୍ୟାଚ୍ରେ ଅଷ୍ଟ୍ରେଲିଆ ଟସ୍ ଜିତି ବୋଲିଂ ନିଷ୍ପତ୍ତି ନେଇଛି। ଭାରତ ପ୍ରଥମେ ବ୍ୟାଟିଂ କରି ମାତ୍ର ୨୪୦ ରନ୍ କରି ଅଲ୍ ଆଉଟ୍ ହୋଇଯାଇଛି। ଦଳ ପକ୍ଷରୁ ରୋହିତ ଶର୍ମା ୪୭, ବିରାଟ କୋହଲି ୫୪, କେଏଲ୍ ରାହୁଲ ୬୬ ରନ୍ କରିଛନ୍ତି।
