ଟିମ୍ ଇଣ୍ଡିଆର ଦୂର ହେଲା ମିଡିଲ ଅର୍ଡର ସମସ୍ୟା, ବିଶ୍ୱକପ୍ ପୂର୍ବରୁ ଫର୍ମକୁ ଫେରିଲେ ଦୁଇ ଷ୍ଟାର ବ୍ୟାଟର
26/09/2023 at 11:17 AM
ମୁମ୍ବାଇ ୨୬।୦୯ : ଫର୍ମକୁ ଫେରିଛନ୍ତି ଭାରତୀୟ ଖେଳାଳି । ରୋହିତ ଶର୍ମାଙ୍କ ଅଧିନାୟକତ୍ୱରେ ପ୍ରଥମେ ଏସିଆ କପ୍କୁ କବ୍ଜା କରିଛି ଟିମ୍ ଇଣ୍ଡିଆ । ଆଉ ପରେ ଅଷ୍ଟ୍ରେଲିଆ ବିପକ୍ଷ ସିରିଜ୍କୁ ମଧ୍ୟ ନିଜ ନାଁରେ କରିଛି ଟିମ୍ ଇଣ୍ଡିଆ । ବରିଷ୍ଠ ଖେଳାଳିଙ୍କୁ ବିଶ୍ରାମ ସତ୍ତ୍ୱେ ବି ଟିମ୍ ଦମ୍ଦାର ପ୍ରଦର୍ଶନ କରିଛି । ଖାସ୍ କରି ମିଡିଲ ଅର୍ଡର ବ୍ୟାଟସମ୍ୟାନ୍ ମାନେ ପୁରା ଫର୍ମକୁ ଫେରିଛନ୍ତି । ଯାହାକି ଏବେ ଟିମ୍କୁ ଧର୍ମସଙ୍କଟରେ ପକାଇଛି । ଆଗାମୀ ବିଶ୍ୱକପ୍ରେ ମିଡିଲ ଅର୍ଡର କିଏ ଖେଳିବ । ସେନେଇ ଟିମ୍ ମ୍ୟାନେଜମେଣ୍ଟ ଚିନ୍ତାରେ ।
ଖବର ଅନୁଯାୟୀ, ଆହତ ସମସ୍ୟା ଲାଗି ଟିମ୍ରୁ ବାଦ୍ ପଡିଥିଲେ କେଏଲ୍ ରାହୁଲ । ଶେଷରେ ଏସିଆ କପ୍ରେ ପ୍ରତ୍ୟାବର୍ତ୍ତନ କରିଥିଲେ କେଏଲ୍ ରାହୁଲ । ପାକିସ୍ତାନ ବିପକ୍ଷ ମ୍ୟାଚ୍ରେ ଶତକ ହାସଲ କରିଥିଲେ ରାହୁଲ୍ । ଦୀର୍ଘ ଦିନ ମିଡିଲ୍ ଅର୍ଡର ନେଇ ଚାଲିଥିବା ଦ୍ୱନ୍ଦରେ ପୂର୍ଣ୍ଣଚ୍ଛେଦ ଲାଗିଛି । କେଏଲ ରାହୁଲ ଲଗାତର ଭାବେ ମିଡିଲ୍ ଅର୍ଡରରେ ସ୍କୋର କରୁଛନ୍ତି । ଏହାସହିତ ଟିମ୍ ପାଇଁ ଆବଶ୍ୟକ ଥିବାର ସମୟରେ ରନ୍ ମଧ୍ୟ କରୁଛନ୍ତି ।
ଅନ୍ୟପଟେ ଏସିଆ କପ୍ରେ ବିଫଳ ହୋଇଥିବା ଶ୍ରେୟସ ଆୟର ବି ଫର୍ମକୁ ଫେରିଛନ୍ତି । ଅଷ୍ଟ୍ରେଲିଆ ବିପକ୍ଷ ସିରିଜରେ ଶତକ ହାସଲ କରିଛନ୍ତି ଶ୍ରେୟସ । ଯାହାଦ୍ୱାରା ଟିମ୍ ଏକ ବିଶାଳ ସ୍କୋର ମଧ୍ୟ କରିଥିଲା । ଆଉ ଏହା ବଳରେ ଟିମ୍ ଇଣ୍ଡିଆ ଅଷ୍ଟ୍ରେଲିଆ ବିପକ୍ଷରେ ସିରିଜ୍ ବିଜୟୀ ହୋଇଛି । ନମ୍ବର ୩ରେ ବ୍ୟାଟିଂ କରି ଶ୍ରେୟସ ଆୟର ୧୧ଟି ମ୍ୟାଚ୍ରେ ୬୪୨ ରନ୍ ସଂଗ୍ରହ କରିଛନ୍ତି । ଏଥିରେ ଗୋଟିଏ ଶତକ ଏବଂ ୬ଟି ଅର୍ଦ୍ଧଶତକ ରହିଛି ।
ସେହିପରି ଆଉଟ୍ ଫର୍ମରେ ଚାଲୁଥିବା ସୂର୍ଯ୍ୟକୁମାର ଯାଦବ ବି ଫର୍ମକୁ ଫେରିଛନ୍ତି । ଅଷ୍ଟ୍ରେଲିଆ ବିପକ୍ଷ ସିରିଜର ଦୁଇଟି ମ୍ୟାଚ୍ରେ ଲଗାତର ଭାବେ ଅର୍ଦ୍ଧଶତକ ହାସଲ କରିଥିଲେ । ପ୍ରଥମ ମ୍ୟାଚ୍ରେ ଅର୍ଦ୍ଧଶତକ ହାସଲ କରିଥିବା ବେଳେ ୨ୟ ମ୍ୟାଚ୍ରେ ଖେଳିଥିଲେ ବିସ୍ଫୋରକ ପାରି । ମାତ୍ର ୩୭ ବଲ୍ରେ କରିଥିଲେ ୭୨ ରନ୍ । ଯାହାବଳରେ ଟିମ୍ ଏତେ ବଡ଼ ବିଶାଳ ସ୍କୋର କରିଥିଲା ।
