ବରଗଡ, ୧୨/୧୨: ବରଗଡର ପ୍ରସିଦ୍ଧ ଧନୁଯାତ୍ରା ମହୋତ୍ସବରେ ବଳରାମ ଭୂମିକାରେ ଅଭିନୟ କରିବେ କିଷନ ବିର୍ତ୍ତିଆ । ଗୋପପୁର ସାଜୁଥିବା ଅମ୍ବାପାଲି ଗ୍ରାମରେ ଆଜି ବୈଠକ ଅନୁଷ୍ଠିତ ହେବା ପରେ କିଷନଙ୍କ ନାମ ଘୋଷଣା କରାଯାଇଛି । ଧନୁଯାତ୍ରାରେ ବଳରାମ ଭୂମିକାରେ ଅଭିନୟ ପାଇଁ ପୂର୍ବରୁ ବାଳ କଳାକାର ଶ୍ରେୟସ ପୂଜାରୀଙ୍କୁ ମନୋନୀତ କରାଯାଇଥିଲା । ମାତ୍ର ଗତ ୯ ତାରିଖରେ ତାଙ୍କର ଅକାଳ ବିୟୋଗ ଘଟିଥିଲା। ଏଣୁ ଧନୁଯାତ୍ରାରେ ତାଙ୍କ ସ୍ଥାନରେ ଅଭିନୟ ପାଇଁ ନୂତନ କଳାକାର ଖୋଜାଯାଇଥିଲା ।
ଆଜି ସଂଧ୍ୟାରେ ଅମ୍ବାପାଲି ଗ୍ରାମରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଅମ୍ବାପାଲି ଗ୍ରାମବାସୀ, ଗୋପପୁର କମିଟିର ସମସ୍ତ ସଦସ୍ୟ, ଧନୁଯାତ୍ରା କମିଟିର ସଦସ୍ୟଗଣ ଅଂଶଗ୍ରହଣ କରିଥିଲେ । ସର୍ବସମ୍ମତି କ୍ରମେ ଅମ୍ବାପାଲି ଗ୍ରାମର ଶିଶୁକଳାକାର କିଷନ ବିର୍ତ୍ତିଆଙ୍କୁ ଚୟନ କରାଯାଇଥିଲା । ଆସନ୍ତାକାଲିଠାରୁ ସେ ଆଖଡ଼ାଶାଳରେ ଅଭ୍ୟାସ ଆରମ୍ଭ କରିବେ ବୋଲି ଜଣାପଡିଛି।
