ନୂଆଦିଲ୍ଲୀ: ଅଯୋଧ୍ୟାରେ ରାମ ମନ୍ଦିର ସମେତ ହିନ୍ଦୁ ମନ୍ଦିର ଉପରେ ଟାର୍ଗେଟ କରିବାକୁ ଖଲିସ୍ତାନୀ ଆତଙ୍କବାଦୀ ଗୁରୁପତବନ୍ତ ସିଂ ପନ୍ନୁ ଧମକ ଦେଇଛି। ବ୍ୟାନ ହୋଇଥିବା ଶିଖ୍ ଫର ଜଷ୍ଟିସ୍ (SFJ) ସଂଗଠନ ଦ୍ୱାରା ପ୍ରସାରିତ ଏକ ଭିଡିଓରେ ପନ୍ନୁ ୧୬ ଏବଂ ୧୭ ନଭେମ୍ବରରେ ହେବାକୁ ଥିବା ଆକ୍ରମଣ ବିଷୟରେ ଚେତାବନୀ ଦେଇଛି। କାନାଡାର ବ୍ରମ୍ପଟନ୍ରେ ରେକର୍ଡ ହୋଇଥିବା ଏହି ଭିଡିଓର ଉଦ୍ଦେଶ୍ୟ ହେଉଛି ହିନ୍ଦୁ ଧର୍ମାନୁଷ୍ଠାନ ସ୍ଥାନ ଉପରେ ହିଂସା ସୃଷ୍ଟି କରିବା।
ପନ୍ନୁ ତା ବିବୃତ୍ତିରେ କହିଛି, 'ଆମେ ହିନ୍ଦୁତ୍ୱ ଚିନ୍ତାଧାରାର ଜନ୍ମସ୍ଥାନ ଅଯୋଧ୍ୟାର ମୂଳଦୁଆକୁ ହଲାଇବୁ', ଯାହାକି ଭାରତର ଏକ ପବିତ୍ର ସ୍ଥାନ। ଏହି ଭିଡିଓରେ ପ୍ରଧାନମନ୍ତ୍ରୀ ମୋଦୀ ଚଳିତ ବର୍ଷ ଜାନୁଆରୀରେ ପ୍ରାଣ ପ୍ରତିଷ୍ଠା ସମୟରେ ରାମ ମନ୍ଦିରରେ ପ୍ରାର୍ଥନା କରୁଥିବା ଚିତ୍ର ଦେଖାଯାଇଛି। ପନ୍ନୁ କାନାଡାର ଭାରତୀୟମାନଙ୍କୁ ମଧ୍ୟ ହିନ୍ଦୁ ମନ୍ଦିର ଠାରୁ ଦୂରେଇ ରହିବାକୁ ଚେତାବନୀ ଦେଇଛି।
ଗତ ମାସରେ, ପନ୍ନୁ ନଭେମ୍ବର ୧ ରୁ ୧୯ ମଧ୍ୟରେ ଏୟାର ଇଣ୍ଡିଆ ବିମାନରେ ଉଡ଼ାଣ ନକରିବାକୁ ଯାତ୍ରୀମାନଙ୍କୁ ଚେତାବନୀ ଦେଇଥିଲା। ପନ୍ନୁ ଦାବି କରିଛି ଯେ 1984 “ଶିଖ ଜନଶୁଣାଣି” ଠିକ୍ ଏହି ସମୟ ହିଁ ହୋଇଥିଲା। ଭାରତୀୟ କୂଟନୀତିଜ୍ଞଙ୍କ ବିରୋଧରେ ହିଂସା ପାଇଁ ପନ୍ନୁ ମଧ୍ୟ ଆହ୍ୱାନ କରିଛି।
ପୃଥକ ପୃଥକ ରାଷ୍ଟ୍ରର ଧାରଣାକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ପନ୍ନୁର SFJ ଭାରତ ବିରୋଧୀ କାର୍ଯ୍ୟକଳାପରେ ଜଡିତ ଅଛି। ସାମ୍ପ୍ରଦାୟିକ ସୌହାର୍ଦ୍ଦ୍ୟକୁ ଅସ୍ଥିର କରିବାକୁ ଲକ୍ଷ୍ୟ ରଖି ପନ୍ନୁ ଅନେକ ହିଂସାତ୍ମକ ବିବୃତ୍ତି ଜାରି କରିଛି। ଜୁଲାଇ ୨୦୨୦ରେ ପନ୍ନକୁ ବେଆଇନ କାର୍ଯ୍ୟକଳାପ ନିବାରଣ ଆଇନ (UAPA) ଅନୁଯାୟୀ ଆତଙ୍କବାଦୀ ଭାବରେ ତାଲିକାଭୁକ୍ତ କରାଯାଇଥିଲା। ଗିରଫ ପାଇଁ ଭାରତ ସରକାର ମଧ୍ୟ ଅନେକ ୱାରେଣ୍ଟ ଜାରି କରିଛନ୍ତି। ତେବେ ସେ ଆମେରିକା ଏବଂ କାନାଡାରୁ ଅପରାଧିକ କାର୍ଯ୍ୟକଳାପ ଜାରି ରଖିଛି।
