ନୂଆଦିଲ୍ଲୀ: ବ୍ରିଟେନରେ ଖଲିସ୍ତାନୀ ସମର୍ଥକଙ୍କ ଉତ୍ପାତ । ଖଲିସ୍ତାନୀ ଉଗ୍ରବାଦୀ ସ୍କଟଲାଣ୍ଡରେ ଭାରତ ବିରୋଧରେ ନାରାବାଜି କରିଛନ୍ତି । ସ୍କଟଲାଣ୍ଡରେ ନିଯୁକ୍ତ ଭାରତୀୟ ରାଷ୍ଟ୍ରଦୂତ ବିକ୍ରମ ଦୋରଈସ୍ବାମୀଙ୍କୁ ଶୁକ୍ରବାର ଏକ ଗୁରୁଦ୍ବାରରେ ପ୍ରବେଶ କରିବାକୁ ଦେଇନାହାନ୍ତି ।  ଏମିତି ଦୋରଈସ୍ବାମୀଙ୍କୁ କାର୍‌ରୁ ଓହ୍ଲାଇବାକୁ ଦେଇନାହାନ୍ତି ଖଲିସ୍ତାନୀ ।

ଖଲିସ୍ତାନୀ ସମର୍ଥକଙ୍କ ଜଣେ ଶିଖ୍ କର୍ମକର୍ତ୍ତାଙ୍କ କହିବା ଅନୁଯାୟୀ, ସ୍କଟଲାଣ୍ଡର ଆଲବର୍ଟ ଡ୍ରାଇବ୍‌ରେ ଥିବା ଗ୍ଲାସଗୋ ଗୁରୁଦ୍ବାର କମିଟି ସହିତ ବିକ୍ରମ ଦୋରଈସ୍ବାମୀଙ୍କ ବୈଠକ ଥିଲା, ହେଲେ ଖଲିସ୍ତାନୀ ସମର୍ଥକ ଏହି ଖବର ଆଗୁଆ ପାଇଥିଲେ । ତେବେ ଭାରତୀୟ ରାଷ୍ଟ୍ରଦୂତ ଗୁରୁଦ୍ବାର ନିକଟରେ ପହଞ୍ଚିବା ପରେ ସେଠାରେ ଖଲିସ୍ତାନୀ ଉଗ୍ରବାଦୀ ନାରାବାଜି କରିବା ସହିତ ତାଙ୍କୁ ଗାଡ଼ିରୁ ଓହ୍ଲାଇ ଦେଇନଥିଲେ ।

ଖଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜରଙ୍କ ହତ୍ୟାକୁ ନେଇ କାନାଡ଼ା ସହ ଭାରତର ସମ୍ପର୍କ ଖରାପ ହୋଇଛି । ନିଜ୍ଜର ହତ୍ୟା ପରେ ବ୍ରିଟିଶ୍ ଖଲିସ୍ତାନୀଙ୍କୁ ଟାର୍ଗେଟ୍ କରାଯାଉଥିବା ସେମାନେ ଅଭିଯୋଗ କରିଛନ୍ତି । ଯାହାଫଳରେ ସେମାନେ ସ୍କଟଲାଣ୍ଡରେ ଗୁରୁଦ୍ୱାର ଯାଉଥିବା ଭାରତୀୟ ରାଷ୍ଟ୍ରଦୂତଙ୍କୁ ଅକଟାଇଛନ୍ତି ।

ତେବେ ପ୍ରଥମଥର ପାଇଁ ବ୍ରିଟେନରେ ଖଲିସ୍ତାନୀ ସମର୍ଥକ ଏଭଳି ଉଦ୍ୟମ କରି ନାହାନ୍ତି । ଏହା ପୂର୍ବରୁ ଅନେକ ଥର ବ୍ରିଟିଶ ଖଲିସ୍ତାନୀଙ୍କ ଏଭଳି କାର୍ଯ୍ୟ ଦେଖିବାକୁ ମିଳିଛି । ଗତ ମାର୍ଚ୍ଚ ମାସରେ ଲଣ୍ଡନରେ ଭାରତୀୟ ଦୂତାବାସ ଉପରେ ଆକ୍ରମଣ ହୋଇଥିଲା । ଖଲିସ୍ତାନୀ ସମର୍ଥକ ଭାରତର ଦୂତାବାସରୁ ତ୍ରିରଙ୍ଗା କାଢ଼ି ଦେଇ ଖଲିସ୍ତାନୀ ପତାକା ଲଗାଇବାକୁ ଉଦ୍ୟମ କରିଥିଲେ ।