ପାଟନା: ୨୦୨୪ ଲୋକସଭା ନିର୍ବାଚନ ବିଜେପିକୁ ଏକ ଘଡ଼ି ସନ୍ଧି ମୁହୂର୍ତ୍ତିରେ ଛାଡ଼ି ଦେଇଛି। କାଳେ ସହଯୋଗୀ ଦଳମାନେ ନାଲି ଆଖି ଦେଖାଇବେ ଏଥିପାଇଁ ବିଜେପିକୁ ସଯତ୍ନ ହେବାକୁ ପଡ଼ୁଛି। କାରଣ ଦଳକୁ ଏଥର ସ୍ପଷ୍ଟ ବହୁମତ ମିଳି ନାହିଁ। ବିଜେପିର ସବୁଠାରୁ କମ୍ ଭରସା ଯୋଗ୍ୟ ସହଯୋଗୀ ଦଳ ହେଲା ଜେଡିୟୁ। କାରଣ ରାଜନୀତିରେ ପଲ୍ଟୁରାମ ବୋଲି କୁହାଯାଉ ଥିବା ନୀତୀଶ କେତେବେଳେ ବି ବଦଳି ଯାଇପାରନ୍ତି। ତା’ର ଆଭାସ ବି ଏବେ ମିଳିଲାଣି।
ବିହାରରେ ବିଜେପି ଅପେକ୍ଷା ଜେଡିୟୁକୁ ଅଧିକ ଲୋକସଭା ଆସନ ମିଳିଛି। ଆଉ ଦଳ ଏହାର ପାୱାରର ଦେଖାଇବା ଆରମ୍ଭ କରିଛି। ଏନ୍ଡିଏ ସରକାର ଗଠନ ନ ହେବା ପୂର୍ବରୁ ବଡ଼ ଦାବି କରିଛି ଜେଡିୟୁ। ଦଳର ନେତା କେସି ତ୍ୟାଗୀ କହିଛନ୍ତି ଯେ ଅଗ୍ନିପଥ ସ୍କିମ୍କୁ ନଇ ଦେଶରେ କ୍ରୋଧ ରହିଛି। ଯାହା ନିର୍ବାଚନରେ ଦେଖିବାକୁ ମିଳିଲା। ତେଣୁ ଏହାର ପୁନଃ ସମୀକ୍ଷା ପାଇଁ ଦଳ ସରକାରଙ୍କ ପାଖରେ ଦାବି କରିବ ବୋଲି ଜେଡିୟୁ ନେତା କେସି ତ୍ୟାଗୀ କହିଛନ୍ତି।
ଶ୍ରୀ ତ୍ୟାଗୀ କହିଛନ୍ତି “ଆମେ ଏ ବିଷୟରେ କୌଣସି ତର୍କବିତର୍କ କରିବୁ ନାହିଁ। କାରଣ ଯେତେବେଳେ ଅଗ୍ନିପଥ ସ୍କିମ୍ ଆସିଲା ସେତେବେଳେ ସେନା ମଧ୍ୟରେ ବହୁତ ଲୋକ ଅସନ୍ତୋଷ ପ୍ରକାଶ କରିଥିଲେ। ନିର୍ବାଚନ ସମୟରେ ସେମାନଙ୍କ ପରିବାର ମଧ୍ୟ ବିକ୍ଷୋଭ ପ୍ରଦର୍ଶନ କରିଥିଲେ। ତେଣୁ ଏହାର ପୁନଃ ସମୀକ୍ଷା ପାଇଁ ଆମେ କହିବୁ।”
ସୂଚନା ଥାଉକି ୨୦୨୨ରେ କେନ୍ଦ୍ର ସରକାର ଅଗ୍ନିପଥ ଯୋଜନା ଆଣିଥିଲେ। ପ୍ରତିରକ୍ଷା ପେନ୍ସନ ବିଲ୍କୁ ହ୍ରାସ କରିବାକୁ କେନ୍ଦ୍ର ସରକାର ଏହି ନିଷ୍ପତ୍ତି ନେଇଥିଲେ। ଏହି ଯୋଜନା ମାଧ୍ୟମରେ ଭାରତ ଜଳ, ସ୍ଥଳ ଓ ଏୟାର ଫୋର୍ସରେ ମାତ୍ର ୪ ବର୍ଷ ପାଇଁ ନିଯୁକ୍ତି ହେବ। ବାର୍ଷିକ ନିଯୁକ୍ତିର ମାତ୍ର ୨୫ ପ୍ରତିଶତ ଯବାନଙ୍କୁ ୧୫ ବର୍ଷୀୟା ଚାକିରି କାଳ ପୂରା କରିବାକୁ ହେବ। ଏହି ଯୋଜନାକୁ ସାରା ଦେଶରେ ଅସନ୍ତୋଷ ରହିଥିଲା। ବିଶେଷ କରି ଉତ୍ତର ପ୍ରଦେଶ ଓ ବିହାରରେ ହିଂସା ଦେଖିବାକୁ ମିଳିଥିଲା।
ଗୋଟିଏ ଦେଶ ଓ ସମାନ ଆଚରଣ ସଂହିତାକୁ ନେଇ କ’ଣ କହିଲା ଜେଡିୟୁ ?
ବିଜେପିର ଗୋଟିଏ ଦେଶ ଗୋଟିଏ ନିର୍ବାଚନ ଫର୍ମୁଲାରେ ଜେଡିୟୁ ସହମତି ପ୍ରକାଶ କରିଛି। ତେବେ ନିର୍ବାଚନୀ ଇସ୍ତାହାରରେ ଥିବା ୟୁନିଫର୍ମ ସିଭିଲ କୋଡ୍କୁ ନେଇ ଦଳ ଅଧିକ ସତର୍କ ଅଛି। ୟୁସିସିରେ ସମସ୍ତଙ୍କୁ ବିଚାରକୁ ସମୀକ୍ଷା କରିବାର ଆବଶ୍ୟକତା ରହିଛି ବୋଲି ତ୍ୟାଗୀ କହିଛନ୍ତି।
ସେ କହିଛନ୍ତି “ଆଜି ମଧ୍ୟ ୟୁସିସିକୁ ନେଇ ଆମର ଆଭିମୁଖ୍ୟ ସମାନ। ଏହି ବିଷୟରେ ସମସ୍ତ ମତ ନେଇ ଏହାର ସମୀକ୍ଷା କରିବା ଉଚିତ୍। ଏନେଇ ପୂର୍ବରୁ ନୀତୀଶ କୁମାର ଲ କମିଶନଙ୍କୁ ଚିଠି ଲେଖିଥିଲେ। ନୀତୀଶ କହିଥିଲେ ଯେ ଆମେ ଏହି ନିୟମ ବିରୋଧରେ ନାହୁଁ। ତେବେ ଏ ବିଷୟରେ ବ୍ୟାପକ ଆଲୋଚନାର ଆବଶ୍ୟକତା ରହିଛି। ସମସ୍ତ ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରି ସର୍ବସହମତିରେ ନିଷ୍ପତ୍ତି ନିଆଯିବା ଉଚିତ।”
