ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ ଦିଲ୍ଲୀ ମଦ ଦୁର୍ନୀତି ମାମଲାରେ ମନୀଷ ସିସୋଦିଆଙ୍କ ପରେ ବିଆରଏସ ନେତ୍ରୀ କେ.କବିତାଙ୍କୁ ପଚରାଉଚରା କରିଛି । ଶନିବାର କେ.କବିତାଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ପ୍ରାୟ ୯ ଘଣ୍ଟା ପଚରାଉଚରା କରିଛି । ତେଲେଙ୍ଗାନା ମୁଖ୍ୟମନ୍ତ୍ରୀ କେ.ଚନ୍ଦ୍ର ଶେଖର ରାଓଙ୍କ ୪୪ ବର୍ଷୀୟ ଝିଅ ସକାଳ ୧୧ଟାରେ ଇଡି ମୁଖ୍ୟାଳୟରେ ପହଞ୍ଚିଥିଲେ ଏବଂ ଦୀର୍ଘ ୯ ଘଣ୍ଟା ପରେ ପ୍ରାୟ ରାତି ୮ଟାରେ ସେ ଇଡି କାର୍ଯ୍ୟାଳୟରୁ ବାହାରିଥିଲେ ।
ରିପୋର୍ଟ ଅନୁସାରେ ବିଆରଏସ ନେତ୍ରୀ କେ.କବିତାଙ୍କୁ ଏହି ମାମଲାରେ ପଚରାଉଚରା କରିବା ପାଇଁ ମାର୍ଚ୍ଚ ୧୬ରେ ପୁଣି ହାଜର ହେବା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ କହିଛି । ପଚରାଉଚରା ସମୟରେ ଇଡି କାର୍ଯ୍ୟାଳୟ ବାହାରେ ଦିଲ୍ଲୀ ପୋଲିସ ଏବଂ କେନ୍ଦ୍ରୀୟ ଅର୍ଦ୍ଧସାମରିକ ବଳର ଯବାନଙ୍କୁ ମୁତୟନ କରାଯାଇଥିଲା । ଅନ୍ୟପଟେ ବିଆରଏସ ନେତ୍ରୀଙ୍କ ସମର୍ଥକମାନେ ଏପିଜେ ଅବଦୁଲ କଲାମ ରୋଡରେ ବିରୋଧ ପ୍ରଦର୍ଶନ କରିଥିଲେ ।
ରିପୋର୍ଟ ଅନୁସାରେ ହାଇଦ୍ରାବାଦର ବ୍ୟବସାୟୀ ଅରୁଣ ରାମଚନ୍ଦ୍ରନ ପିଲ୍ଲାଙ୍କ ସହ ମୁହାଁମୁହିଁ ଜେରା କରାଇବା ପାଇଁ କବିତାଙ୍କୁ ହାଜର ହେବାକୁ କହିଥିଲା । ଚଳିତ ସପ୍ତାହରେ ପିଲ୍ଲାଇକୁ ଇଡି ଗିରଫ କରିଥିଲା । କବିତାଙ୍କୁ ମାର୍ଚ୍ଚ ୯ରେ ହାଜର ହେବା ପାଇଁ ଇଡି କହିଥିଲା, କିନ୍ତୁ କବିତା ନୂଆ ତାରିଖ ଦେବା ପାଇଁ ଅନୁରୋଧ କରିଥିଲେ ।
