କାଶ୍ମୀରରେ ପୁଣି ବିକ୍ଷୋଭକାରୀଙ୍କ ହିଂସା ଓ ଟେକାମାଡ଼ । ସୋମବାର ବିକ୍ଷୋଭକାରୀଙ୍କ ଟେକାମାଡରେ ଜଣେ ପର୍ଯ୍ୟଟକଙ୍କ ମୃତ୍ୟୁ ହୋଇଥିବା ବେଳେ ଆନ୍ୟ ଦୁଇଜଣ ଆହତ ହୋଇଛନ୍ତି । ଶ୍ରୀନଗର - ଗୁଲମାର୍ଗ ରାସ୍ତାରେ ଏକ ପର୍ଯ୍ୟଟକ ଦଳ କାର୍ ରେ ଯାଉଥିବା ବେଳେ ଆକ୍ରମଣର ଶିକାର ହୋଇଥିଲେ । ପ୍ରାୟ ଅଧ ଡଜନେ ଗାଡିକୁ ଆକ୍ରମଣ କରିଥିଲେ ବିକ୍ଷୋଭକାରୀ ।ଏହି ଆକ୍ରମଣରେ ଆହତ ଏକାଧିକ ପର୍ଯ୍ୟଟକଙ୍କୁ ଶେର ଇ କାଶ୍ମୀର ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇଲ୍ସରେ ଭର୍ଥ୍ତୀ କରାଯାଇଥିଲା । କିନ୍ତୁ ସେଠାରେ ଚେନ୍ନାଇର ପର୍ଯ୍ୟଟକ ଆର. ଥୁରୁମଣିଙ୍କ ମୃତ୍ୟୁ ହୋଇଛି । ତାଙ୍କ ମୁଣ୍ଡରେ ଜୋର ଆଘାତ ଲାଗିଥିଲା । ଅନ୍ୟ ଦୁଇ ଆହତ ପର୍ଯ୍ୟଟକ ଏବେ ବି ଚିକିତ୍ସାଧିନ ଅଛନ୍ତି । ପୋଲିସ ଏନକାଉଣ୍ଟରରେ ୫ ହିଜବୁଲ ଆତଙ୍କବାଦିଙ୍କ ମୃତ୍ୟୁ ଘଟଣା ପ୍ରତିବାଦରେ ବିକ୍ଷୋଭକାରୀ ମାନେ ବିକ୍ଷୋଭ କରୁଥିବା ବେଳେ ପର୍ଯ୍ୟଟକଙ୍କୁ ଆକ୍ରମଣ କରିଥିଲେ । ରବିବାର ଦିନ ସୋପିଆନ୍ ରେ ପୋଲିସ ଏନକାଉଣ୍ଟରରେ ୫ ହିଜବୁଲ ଆତଙ୍କୀଙ୍କ ମୃତ୍ୟୁ ହୋଇଥିଲା । ଗତ ୫ ଦିନ ତଳେ ବିକ୍ଷୋଭକାରୀଙ୍କ ଟେକାମାଡରେ ମୁମ୍ବାଇର ଜଣେ ପର୍ଯ୍ୟଟକ ଗୁରୁତର ଆହତ ହୋଇଥିଲେ । ସେନେଇ ତୀବ୍ର ପ୍ରତିକ୍ରିୟା ସତ୍ତ୍ୱେ ଉପତ୍ୟକାରେ ପୁଣି ଟେକାମାଡରୁ ଅଘଟଣ ଘଟିଛି । ଏହି ଘଟଣାରେ ତୀବ୍ର ପ୍ରତିକ୍ରିୟା ରଖିଛନ୍ତି ଜାମ୍ମୁ-କାଶ୍ମୀର ମୁଖ୍ୟମନ୍ତ୍ରୀ ମେହେବୁବା ମୁଫତି । ସେ କହିଛନ୍ତି, ଏହି ଘଟଣାରେ ତାଙ୍କ ମୁଣ୍ଡ ଲଜ୍ୟାରେ ନଇଁ ଯାଉଛି । ପର୍ଯ୍ୟଟକମାନେ ରାଜ୍ୟର ଅତିଥି ହୋଇଥିବା ବେଳେ ଏପରି ଘଟଣା ତାଙ୍କୁ ମର୍ମାହତ କରିଛି । ପୂର୍ବତନ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ମଧ୍ୟ ଗଭୀର ମର୍ମାହତ ହୋଇଥିବା ଟ୍ୱିଟ୍ କରିଛନ୍ତି ।