ହିନ୍ଦୀ ସିନେମା ଦର୍ଶକଙ୍କୁ ପାରିବାରିକ କାହାଣୀ ଥିବା ଫିଲ୍ମ ଭେଟି ଦେବାରେ ନିର୍ଦ୍ଦେଶକ ସୂରଜ ବଡ଼ଜାତ୍ୟାଙ୍କର ବେଶ୍ ସୁନାମ ରହିଛି । ‘ହମ୍ ଆପକେ ହେ କୌନ’, ‘ହମ୍ ସାଥ୍ ସାଥ୍ ହେ’, ‘ବିବାହ’ ଆଦି ତାହାର ଗୋଟିଏ ଗୋଟିଏ ଉଦାହରଣ । ପୁଣି ସୂରଜଙ୍କ ଅଧିକାଂଶ ଫିଲ୍ମର ମୁଖ୍ୟ ନାୟକ ସଲ୍ମାନ ଖାନଙ୍କ ଚରିତ୍ରର ନାଁ ‘ପ୍ରେମ୍’ । ‘ବିବାହ’ରେ ସାହିଦ କପୁରଙ୍କ ନାଁ ମଧ୍ୟ ଥିଲା ପ୍ରେମ୍ । ଏହି ନାଁଟି ପ୍ରତି ସୂରଜଙ୍କର ବେଶ୍ ଦୁର୍ବଳତା ରହିଛି ।
ଏ କାରଣରୁ ସୂରଜ ତାଙ୍କ ପରବର୍ତ୍ତୀ ସିନେମାର ନାଁ ମଧ୍ୟ ରଖିଛନ୍ତି ‘ପ୍ରେମ୍ କି ସାଦି ହେ’ । ଏ ଫିଲ୍ମକୁ ନେଇ ବେଶ୍ କିଛି ଦିନ ହେଲା ଚର୍ଚ୍ଚା ଲାଗିରହିଛି । ଏଥିରେ ସଲମାନ୍ ଅଭିନୟ କରିବେ ବୋଲି ପ୍ରଥମେ ଶୁଣାଯାଉଥିଲା । ପରେ ଚର୍ଚ୍ଚା ହେଲା ଯେ ଏଥିରେ ସାହିଦ କାମ କରିବେ । ଏବେ ଶୁଣିବାକୁ ମିଳିଲାଣି ଏ ଦୁଇ ଜଣ ନୁହନ୍ତି, ସୂରଜଙ୍କ ଫିଲ୍ମର ନୂଆ ‘ପ୍ରେମ୍’ ହେବେ କାର୍ତ୍ତିକ ଆର୍ଯ୍ୟନ୍ । ତେବେ ଏହି ବିଷୟ ଚୂଡ଼ାନ୍ତ ହୋଇନାହିଁ । କଥାବାର୍ତ୍ତା ଚାଲିଛି । ଯଦି ସବୁ ଠିକ୍ ରହେ ଓ କାର୍ତ୍ତିକଙ୍କ ସହ ସୂରଜଙ୍କ ଚୁକ୍ତି ଚୂଡ଼ାନ୍ତ ହୋଇଯାଏ, ତା’ହେଲେ କାର୍ତ୍ତିକ ରାଜଶ୍ରୀ ବ୍ୟାନରର ନୂଆ ପ୍ରେମ୍ ହେବେ ।
ଏ ବାବଦରେ ବର୍ତ୍ତମାନ ବିଧିବଦ୍ଧ ଭାବରେ କିଛି ଘୋଷଣା କରାଯାଇ ନାହିଁ । ‘ପ୍ରେମ୍ କି ସାଦି’ରେ ଯଦି କାର୍ତ୍ତିକ ଅଭିନୟ କରନ୍ତି, ତା’ହେଲେ ସୂରଜଙ୍କ ସହ ଏହା ତାଙ୍କର ପ୍ରଥମ ସିନେମା ହେବ । ବର୍ତ୍ତମାନ କାର୍ତ୍ତିକ ନିର୍ଦ୍ଦେଶକ କବୀର ଖାନଙ୍କ ‘ଚନ୍ଦୁ ଚାମ୍ପିୟନ’ର ପ୍ରଚାର କାର୍ଯ୍ୟରେ ବ୍ୟସ୍ତ ଅଛନ୍ତି । ଜୁନ୍ ୧୪ରେ ଏ ଫିଲ୍ମ ମୁକ୍ତିଲାଭ କରିବ ।
