ବେଜିଂ ୧୬।୦୨: ଚୀନରେ ଅସମ୍ଭାଳ ହୋଇଗଲାଣି କରୋନା ଭାଇରସ ସ୍ଥିତି ।  ଶନିବାର ସୁଦ୍ଧା ଚୀନରେ ମୃତ୍ୟୁସଂଖ୍ୟା ୧୬ଶହ ଟପିଯାଇଛି   । ଏହାସହିତ ସଂକ୍ରମିତ ବ୍ୟକ୍ତିଙ୍କ ସଂଖ୍ୟା ୬୬ ହଜାରରେ ପହଞ୍ଚିଛି ।  ଗୋଟିଏ ଦିନରେ  ଚୀନରେ ଆଉ ୧୪୩ ଜଣଙ୍କ  ମୃତ୍ୟୁ ହୋଇଥିବା ବେଳେ  ୨୬୪୧ଟି ନୂଆ ସଂକ୍ରମଣ ମାମଲା ସାମ୍‌ନାକୁ ଆସିଛି ।

କରୋନା ଭାଇରସ କେବଳ ଚୀନ ନୁହେଁ  , ଚୀନ ବାହାରେ ମଧ୍ୟ ମୃତ୍ୟୁ ଖବର ପହଞ୍ଚିବାରେ ଲାଗିଛି ।  ପ୍ୟାରିସରେ ଥିବା ଚୀନର ଜଣେ ବ୍ୟକ୍ତି ଏହି ରୋଗରେ ପଡ଼ି ମୃତ୍ୟୁବରଣ କରିଛି । ତେବେ ଚୀନର ବିଭିନ୍ନ ହସପିଟାଲରେ ଚିକିତ୍ସିତ ହେଉଥିବା ପ୍ରାୟ ୮୦୯୬ ଜଣ ବ୍ୟକ୍ତି ସୁସ୍ଥ ହୋଇ ଘରକୁ ଫେରିଛନ୍ତି ବୋଲି ଚୀନର ଜାତୀୟ ଡାକ୍ତରୀ କମିଶନ କହିଛି ।  ଅନ୍ୟପକ୍ଷରେ  ଏହି ସ୍ଥିତି ଉପରେ ସତର୍କ ଦୃଷ୍ଟି ରଖିଛି ଭାରତ ।

ଭାରତରେ ସ୍ଥିତି ନିୟନ୍ତ୍ରଣାଧୀନ ରହିଛି ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ କୁହାଯାଇଛି । ଚୀନର ଉହାନ ସହରରୁ ବ୍ୟାପିଥିବା କରୋନା ଭାଇରସ ଚୀନ ସମେତ ସମଗ୍ର ବିଶ୍ୱରେ ଚିନ୍ତାର କାରଣ ହୋଇଛି । ଏବେ ପ୍ରାୟ ୨୬ ଟି ଦେଶକୁ ଏହା ବ୍ୟାପିସାରିଲାଣି ବୋଲି ଜଣାଯାଇଛି । ଉହାନରେ ଥିବା ଏକ ପଶୁମାଂସ ବଜାରରେ ଏହି ଭୁତାଣୁ ମନୁଷ୍ୟ ଶରୀରକୁ ଆସିଥିବା ସଂଦେହ କରାଯାଉଛି ।