ଢ଼େଙ୍କାନାଳ ୧୦/୧୦: ନକଲି କମ୍ପାନୀ କରି ଠକୁଥିଲା ଲକ୍ଷ ଲକ୍ଷ ଟଙ୍କା । ଓଡ଼ିଶାର ଢ଼େଙ୍କାନାଳରୁ ଚେର ଲମ୍ବିଥିଲା କର୍ଣ୍ଣାଟକ। ଆଉ ଅଭିଯୋଗ ପାଇ କର୍ଣ୍ଣାଟକ ସାଇବର ପୋଲିସ ଜଣେ ସାଇବର ଠକକୁ ଢେଙ୍କାନାଳରୁ ଗିରଫ କରିଛି । ଏହି ସାଇବର ଅପରାଧୀକୁ ଢେ଼ଙ୍କାନାଳ ପୋଲିସ ସହାୟତାରେ ଧରିଛି କର୍ଣାଟକ ପୋଲିସ । ମିଳିଥିବା ସୂଚନା ଅନୁଯାୟୀ, କଟକ ଜିଲ୍ଲା ଖୁଣ୍ଟୁଣି ଥାନା ଅନ୍ତର୍ଗତ ଡ଼ାଳଭାଗ ଗ୍ରାମର ସୋମନାଥ ରାଉତ ନାମକ ଜଣେ ଯୁବକ ଦୀପକ ଶର୍ମା ନାମରେ ଇଣ୍ଡିଆ ସାଇନ ଗୁଡ୍ସ ଆଣ୍ଡ ଇନଫ୍ରା ପ୍ରାଇଭେଟ୍ ଲିମିଟେଡ ନାମକ ଏକ ନକଲି କମ୍ପାନୀ ଖୋଲିଥିଲା ।
ତେବେ ଏହି କମ୍ପାନୀ ସାହାଯ୍ୟରେ କର୍ଣ୍ଣାଟକର ତିମ୍ମପା ଭଟ୍ଟ ନାମକ ଜଣେ ବ୍ୟକ୍ତିଙ୍କ ଠାରୁ ୧୨ ଲକ୍ଷ ୫୦ ହଜାର ଟଙ୍କା ଠକି ନେଇଥିଲା ସୋମନାଥ ।ଏହି ସାଇବର ଠକେଇ ଘଟଣାକୁ ନେଇ ତିମ୍ମପା ଭଟ୍ଟ ଗତ ୫ ଅଗଷ୍ଟରେ କର୍ଣ୍ଣାଟକ ପୋଲିସରେ ଲିଖିତ ଅଭିଯୋଗ କରିଥିଲେ। ଏହା ପରେ ପୋଲିସ ଆଇଟି ଆକ୍ଟ ଅନୁଯାୟୀ କେସ ନଂ ୧୦୩/୨୦୨୧ରେ ମାମଲା ରୁଜୁ କରିଥିଲା । କର୍ଣ୍ଣାଟକ ପୋଲିସ ତଦନ୍ତ କରିବା ପରେ ସୋମନାଥ ଢେ଼ଙ୍କାନାଳରେ ରହୁଥିବା ଜାଣିବାକୁ ପାଇଥିଲା ।
ଆଜି ଢେ଼ଙ୍କାନାଳ ପୋଲିସ ସହାୟତାରେ ସୋମନାଥ ଷ୍ଟେସନ ବଜାରରେ ରହୁଥିବା ଭଡ଼ା ଘରୁ ଉଠାଇ ନେଇଛି କର୍ଣ୍ଣାଟକ ପୋଲିସ। ସୋମନାଥ ଠାରୁ ପୋଲିସ ଚାରୋଟି ମୋବାଇଲ ଗୋଟିଏ ଲ୍ୟାପଟପ୍ , ତାର ବ୍ୟାଙ୍କ ଏଟିଏମ, ପାସ ବୁକ ଆଦିକୁ ମଧ୍ୟ ଜବତ କରିଛି । ଗିରଫ ପରେ କର୍ଣ୍ଣାଟକ ପୋଲିସ ସୋମନାଥକୁ କର୍ଣ୍ଣାଟକ ନେଇ ଯାଇଥିବା ଜଣାପଡିଛି ।