ବେଙ୍ଗାଲୁରୁ ୧୦/୦୮: ସହମତିରେ ଶାରୀରିିକ ସମ୍ପର୍କ ରଖିଥିଲେ ଆଣିପାରିବେନି ଦୁଷ୍କର୍ମ ଅଭିଯୋଗ । ଘଟଣାର ୬ ବର୍ଷ ପରେ କୌଣସି ମହିଳା ଏପରି ଅଭିଯୋଗ କରିପାରିବେ ନାହିଁ । କର୍ଣ୍ଣାଟକ ହାଇକୋର୍ଟ ବେଙ୍ଗାଲୁରୁର ଜଣେ ମହିଳା ଦାଏର କରିଥିବା ଦୁଇଟି ଅପରାଧିକ ମାମଲା ଖାରଜ କରି ଏପରି କିଛି ରାୟ ଦେଇଛନ୍ତି ।

ସହମତିରେ ଶାରୀରିକ ସମ୍ପର୍କ ରଖିବାର ଦୀର୍ଘ ବର୍ଷ ପରେ ସମ୍ପୃକ୍ତା ମହିଳା ବଳାତ୍କାର ଅଭିଯୋଗ ଆଣିପାରିବେନି ବୋଲି କର୍ଣ୍ଣାଟକ ହାଇକୋର୍ଟ ଟିପ୍ପଣୀ ଦେଇଛନ୍ତି । ସୋସିଆଲ ମିଡିଆରେ ପରିଚୟ ହେବା ପରେ ପରସ୍ପରକୁ ଭେଟିବା ଏବଂ ଶାରୀରିକ ସମ୍ପର୍କ ରଖିବାକୁ ନେଇ ଆସିଥିବା ଏକ ମାମଲାର ଶୁଣାଣି କରି ହାଇକୋର୍ଟ ଏହା କହିଛନ୍ତି ।

ମାମଲା ଅନୁସାରେ ଅଭିଯୋଗକାରୀ ଏବଂ ଆବେଦନକାରୀଙ୍କ ମଧ୍ୟରେ ୬ ବର୍ଷ ଧରି ସମ୍ପର୍କ ରହିଥିଲା । ୨୦୧୩ରେ ସେମାନେ ପରସ୍ପରକୁ ଜାଣିଥିଲେ । ଉଭୟେ ପାଖାପାଖି ମଧ୍ୟ ରହୁଥିଲେ । ଅନେକ ସମୟରେ ମହିଳା ଜଣକ ତାଙ୍କ ପ୍ରେମିକଙ୍କ ଘରକୁ ଯାଉଥିଲେ । ସେଠାରେ ସେ ଖାଦ୍ୟ ପ୍ରସ୍ତୁତ କରୁଥିଲେ । ଉଭୟେ ମଦ୍ୟପାନ କରି ଶାରୀରିକ ସମ୍ପର୍କ ମଧ୍ୟ ରଖୁଥିଲେ । ୨୦୧୯ ଡିସେମ୍ବରରେ ସେମାନଙ୍କ ମଧ୍ୟରେ ସମ୍ପର୍କ ଫିକା ପଡ଼ିଥିଲା ।

୨୦୨୧ରେ ମହିଳା ଜଣକ ଇନ୍ଦିରାନଗର ପୁଲିସରେ ପ୍ରତାରଣା ଓ ବିବାହ ପ୍ରତିଶ୍ରୁତି ଦେଇ ବଳାତ୍କାର ଅଭିଯୋଗ କରିଥିଲେ । ତେବେ ଦୀର୍ଘ ୬ ବର୍ଷ ଧରି ଶାରୀରିକ ସମ୍ପର୍କ ରଖିବା ପରେ ଏବେ ବଳାତ୍କାର ଅଭିଯୋଗ ଆଣିବାର କୌଣସି ଆଧାର ନାହିଁ ବୋଲି ଜଷ୍ଟିସ୍‌ ଏନ୍‌ ନାଗାପ୍ରସନ୍ନା କହିଥିଲେ । ଏଥିସହ ବେଙ୍ଗାଲୁରୁର ଇନ୍ଦିରାନଗର ପୁଲିସ ଏବଂ ଦାବାନଗେରେ ମହିଳା ଥାନା ଜରିଆରେ ୨୦୨୧ରେ ରୁଜୁ ହୋଇଥିବା ଏକ ମାମଲାରେ କାର୍ଯ୍ୟାନୁଷ୍ଠାନକୁ ରଦ୍ଦ କରିଦେଇଥିଲେ । ଶୁଣାଣିବେଳେ ହାଇକୋର୍ଟ ସୁପ୍ରିମକୋର୍ଟଙ୍କ ଅନେକ ରାୟର ଉଦାହରଣ ମଧ୍ୟ ଦେଇଥିଲେ ।

you can also read…