ନୂଆଦିଲ୍ଲୀ: କର୍ଣ୍ଣାଟକ ବିଧାନସଭା ନିର୍ବାଚନ ପୂର୍ବରୁ ନେତାଙ୍କ ଦଳ ଡିଆଁ ପର୍ବ ଆରମ୍ଭ ହୋଇଛି । ଗୋଟିଏ ଦଳ ଛାଡ ଅନ୍ୟ ଦଳରେ ଯୋଗ ଦେବା ଆରମ୍ଭ କରିଛନ୍ତି । ଏହାରି ଭିତରେ ବିଜେପି ନେତା ବାବୁରାଓ ଚିଞ୍ଚାନସୁର କର୍ଣ୍ଣାଟକ ବିଧାନ ପରିଷଦ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ବିଧାନ ପରିଷଦ ସଦସ୍ୟ ପଦରୁ ଇସ୍ତଫା ପରେ ସେ ଏବେ କଂଗ୍ରେସର ସାମିଲ ହୋଇପାରନ୍ତି, ଯାହାକୁ ନେଇ ଚର୍ଚ୍ଚା ଜୋର ଧରିବାରେ ଲାଗିଛି ।

ଉଲ୍ଲେଖଯୋଗ୍ୟ ଯେ ବାବୁରାଓ ଚିଞ୍ଚାନସୁର ୨୦୧୯ ଲୋକସଭା ନିର୍ବାଚନରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କୁ ହରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ଏବେ ସେ କଂଗ୍ରେସର ହାତ ଧରିବାକୁ ପ୍ରସ୍ତୁତ ଅଛନ୍ତି । ଚିଞ୍ଚାନସୁର କଲ୍ୟାଣ କର୍ଣ୍ଣାଟକ କ୍ଷେତ୍ରର କୋଲି-କବାଲିଗା ସମୁଦାୟର ପ୍ରମୁଖ ନେତାଙ୍କ ମଧ୍ୟରେ ଜଣେ ଅଟନ୍ତି ।

ଚିଞ୍ଚାନସୁର ୨୦୦୮ରୁ ୨୦୧୮ ଯାଏ କାଲାବୁରଗି ଜିଲ୍ଲାର ଗୁରମିତ୍କାଳ ବିଧାନସଭା କ୍ଷେତ୍ରରୁ ପ୍ରତିନିଧିତ୍ୱ କରିଥିଲେ । ଏହା ପୂର୍ବରୁ ସେ ସିଦ୍ଧରମୈୟା ସରକାରରେ ସେ ମନ୍ତ୍ରୀ ଥିଲେ । ୨୦୧୮ ବିଧାନସଭା ନିର୍ବାଚନରେ ପରାଜିତ ହେବା ପରେ କଂଗ୍ରେସ ଛାଡି ବିଜେପିରେ ସାମିଲ ହୋଇଥିଲେ ।