ବେଙ୍ଗାଲୁରୁ, ୦୧/୧୦: କନ୍ନଡ଼ ଅଭିନେତାଙ୍କ ବେପରୁଆ ଡ୍ରାଇଭିଂ। ଦମ୍ପତିଙ୍କୁ ଧକ୍କାଦେବାରୁ ଜଣକର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଅଛନ୍ତି।କନ୍ନଡ଼ ଅଭିନେତା ନାଗାଭୂଷଣଙ୍କ ଗାଡ଼ି ଯାଉଥିବାବେଳେ ବାଟରେ ଯାଉଥିବା ଦମ୍ପତିଙ୍କୁ ଧକ୍କା ଦେଇଥିଲା। ଦୁର୍ଘଟଣାରେ ମହିଳା ଜଣକ ପ୍ରାଣ ହରାଇଛନ୍ତି। ତାଙ୍କ ସ୍ୱାମୀ ଏବେବି ଚିକିତ୍ସାଧୀନ ଅଛନ୍ତି। ପୋଲିସ୍ ମାମଲା ରୁଜୁ କରି ଗିରଫ କରିଛି।
ଏନେଇ ବେଙ୍ଗାଲୁରୁର କୁମାରସ୍ୱାମୀ ଟ୍ରାଫିକ୍ ପୋଲିସ ଷ୍ଟେସନ୍ରେ ମାମଲା ରୁଜୁ ହୋଇଛି। ବେପରୁଆ ଓ ଓଭରସ୍ପିଡ୍ ଡ୍ରାଇଭିଂ ଯୋଗୁଁ ଦୁର୍ଘଟଣା ଘଟିଥିବା ପୋଲିସ୍ ଏତଲାରେ ଦର୍ଶାଇଛି। ଫଳରେ ଅଭିନେତାଙ୍କୁ ଜାମିନ ମିଳିଛି। ସାଉଥ୍ ଟ୍ରାଫିକ୍ ଡିସିପି ଶିବପ୍ରକାଶ କହିଛନ୍ତି ଯେ ଆଲକହଲ ଟେଷ୍ଟ୍ ପାଇଁ ରକ୍ତ ନମୁନା ପଠାଯାଇଛି। ବ୍ରେଥ୍ଆନାଲାଇଜର୍ ଡିଭାଇସ୍(ମଦଧରା ମେସିନ୍)ରେ ମଦ୍ୟପାନ କରିନଥିବା ଜଣାପଡ଼ିଛି।
ଶନିବାର ସମୟ ପାଖାପାଖି ରାତି ୧୦ଟା। ନାଗାଭୂଷଣ ଉତ୍ତରାହାଲିରୁ କୋନନାକୁଣ୍ଟେ ଅଭିମୁଖେ ଯାଉଥିଲେ। ନିଜେ ଡ୍ରାଇଭିଂ କରି ଯାଉଥିବା ବେଳେ ବସନ୍ତପୁରା ମେନ୍ରୋଡ୍ ଫୁଟ୍ପାଥ୍ରେ ଯାଉଥିବା ବୟସ୍କ ଦମ୍ପତିଙ୍କୁ ଧକ୍କା କରିଥିଲେ। ଅଭିନେତାଙ୍କ କାର୍ ପ୍ରଥମେ ଦମ୍ପତିଙ୍କୁ ଧକ୍କା ଦେଇ ସେଠାରେ ଥିବା ଏକ ଇଲେକ୍ଟ୍ରି ଖୁଣ୍ଟରେ ପିଟି ହୋଇଯାଇଥିଲା।
ଦୁର୍ଘଟଣାର ଶିକାର ହୋଇଥିବା ପତ୍ନୀ ପ୍ରେମ ଓ ସ୍ୱାମୀ କ୍ରିଷ୍ଣା ଗୁରୁତର ଭାବେ ଆହତ ହୋଇଥିଲେ। ପ୍ରେମଙ୍କ ଅବସ୍ଥା ସଙ୍କଟାପନ୍ନ ଥିଲା। ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ସେହିପରି କ୍ରିଷ୍ଣାଙ୍କ ଗୋଡ଼, ମୁଣ୍ଡ ଓ ପେଟରେ ଗଭୀର ଆଘାତ ଲାଗିଛି। ଦୁର୍ଘଟଣା ପରେ ନିଜେ ନାଗାଭୂଷଣ ଦମ୍ପତିଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ। ନିକଟରେ ଫିଲ୍ମ 'ତାଗରୁ ପାଲ୍ୟ'ରେ ଅଭିନୟ କରିଥିଲେ ନାଗାଭୂଷଣ।
