ଇସ୍ଲାମାବାଦ ୧୮।୩:  ତୋଷଖାନା ମାମଲାରେ ପୂର୍ବତନ ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ ଶନିବାର କୋର୍ଟରେ ହାଜର ହୋଇଛନ୍ତି।  ଇମ୍ରାନ କୋର୍ଟରେ ହାଜର ହେବା ପାଇଁ ସକାଳେ ସଡ଼କ ମାର୍ଗରେ ଲୋହୋରରୁ ଇସ୍ଲାମାବାଦ ବାହାରିଥିଲେ। ତାଙ୍କ ସହ ସମର୍ଥକଙ୍କ ଶହଶହ ଗାଡି ଲାହୋର-ଇସ୍ଲାମାବାଦ ରାସ୍ତାରେ ବାହାରିଥିଲା। ଏଥିରେ ମଝି ରାସ୍ତାରେ ଏକ ଦୁର୍ଘଟଣା ଯୋଗୁ କାରକେଡର କେତେକ ଗାଡ଼ି ଓଲଟି ପଡିଥିବା ବେଳେ କିଛି ଲୋକ ଆହତ ହୋଇଥିଲେ। ତେବେ ଇମ୍ରାନ ଅଳ୍ପକେ ଦୁର୍ଘଟଣାରୁ ବର୍ତ୍ତି ଯାଇଥିଲେ। ପରେ ଇମ୍ରାନ କୋର୍ଟ ପହଞ୍ଚିଥିବା ବେଳେ ଜଜ୍‌ କୋର୍ଟ ପରିସର ବାହାରେ ଇମ୍ରାନଙ୍କ ହାଜିର ନେଇ ତାଙ୍କୁ ଫେରିଯିବାକୁ ଅନୁମତି ଦେଇଥିଲେ।

ତେବେ ଇମ୍ରାନଙ୍କ କୋର୍ଟ ହାଜର ବେଳେ ସମର୍ଥଙ୍କ ସହ ପୋଲିସର ସଂଘର୍ଷ ହୋଇଥିଲା। ସମର୍ଥକମାନେ ପୋଲିସ ଉପରକୁ ଟେକାପଥର ମାଡ଼ କରିବାରୁ, ଭିଡକୁ ନିୟନ୍ତ୍ରଣ କରିବାକୁ ଯାଇ ପୋଲିସକୁ ଫାଙ୍କା ଗୁଳି ଚଳାଇବାକୁ ପଡିଛି। ଉପୁଜିଥିବା ପରିସ୍ଥିତିରେ ପାକିସ୍ତାନ ଇଲେକ୍ଟ୍ରୋନିକ ମିଡିଆ ରେଗ୍ୟୁଲେଟରୀ ଅଥରିଟି (ପେମରା) ଇମ୍ରାନଙ୍କ କୋର୍ଟ ହାଜରର ଅନେକ ପୂର୍ବରୁ କୋର୍ଟ ପରିସରରୁ ଟେଲିଭିଜନର ଲାଇଭ ପ୍ରସାରଣ ଉପରେ ରୋକ ଲଗାଇ ଦେଇଥିଲେ। ଫଳରେ କୋର୍ଟ ଆଗରେ ଇମ୍ରାନଙ୍କ ସମର୍ଥକ ଓ ପୋଲିସ ମଧ୍ୟରେ ସଂଘର୍ଷର ଟେଲିଭିଜନ ପ୍ରସାରଣ ହୋଇ ପାରିନାହିଁ।

ପେମରା ତାଙ୍କ ଆଦେଶରେ କହିଛନ୍ତି ଯେ ମାର୍ଚ୍ଚ ୧୮ ତାରିଖରେ ଇସ୍ଲାମାବାଦର କୌଣସି ବିଚାରବିଭାଗୀୟ ପରିସର ସମେତ କୌଣସି ପାର୍ଟି, ସଙ୍ଗଠନ ବ୍ୟକ୍ତିଙ୍କ ଦ୍ୱାରା ରାଲି, ସଭା ବା ଶୋଭାଯାତ୍ରାର ଲାଇଭ ଅଥବା ରେକର୍ଡଡେଡ କଭରେଜ ହେବ ନାହିଁ। ଆଦେଶ ଅବମାନନାରେ ସଂସ୍ଥାଙ୍କ ପ୍ରସାରଣ ଲାଇସେନ୍ସ ରଦ୍ଦ କରିଦିଆଯିବ ବୋଲି ସତର୍କ କରିଥିଲେ। ସେହି ଅନୁସାରେ ଇମ୍ରାନଙ୍କ କୋର୍ଟରେ ହାଜିରର କୌଣସି ଖବର ପ୍ରସାରଣ ଦେଶରେ ହୋଇ ନାହିଁ।