ମୁମ୍ବାଇ, ୧୬|୦୪: ମୁମ୍ବାଇ କୋର୍ଟ ଗୁରୁବାର ବାନ୍ଦ୍ରାରେ ଶ୍ରମିକଙ୍କ ଗହଳିକୁ ନେଇ ମିଥ୍ୟା ସୂଚନା ଦେଇଥିବା ଅଭିଯୋଗରେ ଗିରଫ ହୋଇଥିବା ଜଣେ ସାମ୍ବାଦିକଙ୍କୁ ଜାମିନ ପ୍ରଦାନ କରିଛନ୍ତି । ଏହି ଟେଲିଭିଜନ ସାମ୍ବାଦିକ ଜଣଙ୍କୁ ମିଥ୍ୟା ଖବର ପ୍ରସାରଣ କରିଥିବା ଅଭିଯୋଗରେ ଗିରଫ କରାଯାଇଥିଲା । ସରକାର ଶ୍ରମିକଙ୍କ ଜନ ସାଧାରଣ ଟ୍ରେନ ସର୍ଭିସ୍ ଆରମ୍ଭ କରିଥିବା ସସେ କହିଥିଲେ । ଫଳରେ ବାନ୍ଦ୍ରାରେ ହଜାର ହଜାର ଶ୍ରମିକ ଏକାଠି ହୋଇଥିଲେ ।
ରାହୁଲ କୁଲକର୍ଣ୍ଣୀନାମକ ଏହି ସାମ୍ବାଦିକ ଏକ ମରାଠି ଚ୍ୟାନେଲରେ କାମ କରନ୍ତି । ତାଙ୍କୁ ମୁମ୍ବାଇ ପୋଲିସ ବୁଧବାର ଗିରଫ କରିଥିଲା । ମୁମ୍ବାଇର ବାନ୍ଦ୍ରା ଷ୍ଟେସନରେ ହଜାର ହଜାର ଶ୍ରମିକ ଏକାଠି ହେବା ପରେ ପୋଲିସ ଏହି କାର୍ଯ୍ୟାନୁଷ୍ଠାନ ନେଇଥିଲା । ରାହୁଲଙ୍କୁ ବାନ୍ଦ୍ରା ମାଜିଷ୍ଟ୍ରେଟଙ୍କ ଆଗରେ ଉପସ୍ଥିତ କରିବା ପରେ ପୋଲି ରିମାଣ୍ଡରେ ନେବାକୁ କହିଥିଲା । କିନ୍ତୁ ପୋଲିସର ଆବେଦନକୁ କୋର୍ଟ ଖାରଜ କରିଦେଇଥିଲେ । ତାଙ୍କ ଓକିଲ ସୁବୋଧ ଦେଶାଇ କୋର୍ଟରେ ଜାମିନ ଆବେଦନ କରିଥିଲେ । ଉଭୟ ପକ୍ଷର ବିତର୍କ ଶୁଣି ତାଙ୍କୁ ୧୫ ହଜାର ଟଙ୍କାର ବ୍ୟକ୍ତିଗତ ମୁଚାଲିକାରେ ଜାମିନ ପ୍ରଦାନ କରାଯାଇଛି ।