ଖୁବଶୀଘ୍ର କାର୍ଯ୍ୟକ୍ଷମ ହେବ ଝାରସୁଗୁଡା ବିମାନବନ୍ଦର |ଏଥିପାଇଁ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ବିମାନବନ୍ଦରକୁ ଲାଇସେନ୍ସ ମିଳିଛି । ଏନେଇ ଝାରସୁଗୁଡା ବାସୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି | ଆସନ୍ତା ଜୁନରୁ ଏଠୁ ବିମାନ ଉଡିବାର ସମ୍ଭାବନା ବି ରହିଛି । ଐତିହାସିକ ଝାରସୁଗୁଡା ବିମାନବନ୍ଦରକୁ ମିଳିବାକୁ ଯାଉଛି ନୂଆ ପରିଚୟ। ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଯୁଦ୍ଧଜାହାଜ ଅବତରଣ ପାଇଁ ନିର୍ମାଣ ହୋଇଥିଲା ଏହି ରନୱୋ । ପରବର୍ତ୍ତୀ ସମୟରେ ରକ୍ଷଣାବେକ୍ଷଣା ଅଭାବରୁ ଏହା ଜରାଜୀର୍ଣ୍ଣ ହୋଇ ପଡିଥିଲା । ରାଜ୍ୟ ଏବଂ କେନ୍ଦ୍ରସରକାରଙ୍କ ଆଗ୍ରହ ଫଳରେ ଏହି ବିମାନବନ୍ଦର ପୁଣିଥରେ କାର୍ଯ୍ୟକ୍ଷମ ହେବାକୁ ଯାଉଛି । ପ୍ରଥମ ପର୍ଯ୍ୟାୟରେ ୯୦୯ ଏକର ଜମି ଉପରେ ଆରମ୍ଭ ହେବାକୁ ଯାଉଛି ବିମାନବନ୍ଦର । ଏପ୍ରିଲ ମାସରେ ଡିଜିସିଏର ପ୍ରତିନିଧି ଦଳ ବିମାନବନ୍ଦର କାମ ତଦାରଖ କରିଥିଲେ । ଏବେ ଲାଇସେନ୍ସ ମିଳିବା ପରେ ସ୍ଥାନୀୟ ଲୋକେ ଖୁସି ଜାହିର କରିଛନ୍ତି । ଝାରସୁଗୁଡାର ଆର୍ଥିକ ଏବଂ ସାମାଜିକ ବିକାଶ ପାଇଁ ଏହା ସହାୟକ ହେବ ବୋଲି ଆଶା କରିଛନ୍ତି । ଝାରସୁଗୁଡା ବିମାନବନ୍ଦର ରାଜ୍ୟର ଦ୍ୱିତୀୟ ବିମାନ ବନ୍ଦର ମାନ୍ୟତା ପାଇଛି । ଆସନ୍ତା ଜୁନ ମାସରୁ ଉଡାନ୍ ଯୋଜନାରେ ରାୟପୁର, ରାଞ୍ଚୀ ଓ ଭୁବନେଶ୍ୱରକୁ ବିମାନ ଚଳାଚଳ କରିବାର ସମ୍ଭାବନା ରହିଛି ।