ଯାଜପୁରରୋଡ୍ ୧୬।୫: ଯାଜପୁର ଜିଲ୍ଲା ବ୍ୟାସନଗର ସହରର ସେନକୋ ଗୋଲ୍ଡ ଆଣ୍ଡ ଡାଇମଣ୍ଡ ସୁନା ଦୋକାନରୁ ସୋମବାର ଏକ ବଡ଼ ଧରଣର ଡକାୟତି ହୋଇଥିବା ବେଳେ ଏଯାଏଁ ଧରାପଡ଼ିନାହାନ୍ତି ଲୁଟେରା । ସୋମବାର ଦିନ ଦ୍ବିପ୍ରହରରେ ସୋରୁମକୁ ଗ୍ରାହକ ବେଶରେ ଆସି ୭ ଜଣ ଲୁଟେରା ୧୫ କୋଟିରୁ ଉର୍ଦ୍ଧ୍ବ ଟଙ୍କାର ସୁନା ଓ ହୀରା ଅଳଙ୍କାର ଲୁଟି ନେଇଥିଲେ ।

ତେବେ ପୋଲିସ ଏହାକୁ ଗୁରୁତର ସହ ନେଇ ଘଟଣାର ପୁଙ୍ଖାନୁପୁଙ୍ଖ ଯାଞ୍ଚ ଚଳାଇଥିବା ବେଳେ ଏହି ଲୁଟ୍ ଘଟଣାର ଏକ ସିସିଟିଭି ଫୁଟେଜ ସାମ୍ନାକୁ ଆସିଛି । ବାଇକରେ ଆସି ଲୁଟେରା କିପରି ଲୁଟ୍ କରି ନେଇଯାଉଛନ୍ତ ତାର ଦୃଶ୍ୟ ସିସିଟିଭିରେ କଏଦ ହୋଇଛି । ସୁନା ଦୋକାନ ସମ୍ମୁଖରେ ଥିବା ଏକ ପେଟ୍ରୋଲ ପମ୍ପରେ ଲାଗିଥିବା ସିସିଟିଭି କ୍ୟାମେରାରେ ଲୁଟେରାମାନେ ଲୁଟ କରି ଫେରାର ହେଉଥିବାର ଦୃଶ୍ୟ ରହିଛି । ପୋଲିସ ବିଭିନ୍ନ ଦିଗରୁ ସିସିଟିଭି ଫୁଟେଜ ସଂଗ୍ରହ କରିବାକୁ ପ୍ରୟାସ ଜାରି ରଖିଛି । ସୋମବାର ଦିନ ପାଖାପାଖି ୨ଟା ସମୟରେ ୭ ଜଣ ଡକାୟତ ସୋ’ରୁମ୍ ଭିତରେ ଗ୍ରାହକ ହିସାବରେ ପ୍ରବେଶ କରିଥିଲେ । ପରେ କର୍ମଚାରୀଙ୍କୁ ମାଡମାରି ବନ୍ଧୁକ ମୁନରେ ଗହଣା ସବୁ ଲୁଟି ନେଇ ବାହାରୁ ସଟର ପକାଇ ବନ୍ଦ କରି ଫେରାର ହୋଇ ଯାଇଥିଲେ । ଆକ୍ରମଣରେ ସୋ’ରୁମ୍‌ର ୨ କର୍ମଚାରୀ ଆହତ ହୋଇଥିଲେ ।

ସେପଟେ ପୋଲିସ ହାତରେ ଲାଗିଛି ୩ ଲୁଟେରାଙ୍କ ଫୋଟୋ । ଅଭିଯୁକ୍ତଙ୍କ ଫଟୋ ଜାରି କରି ଏମାନଙ୍କ ବିଷୟରେ ଖବର ଦେଲେ ପୁରସ୍କାର ମିଳିବା ନେଇ ଘୋଷଣା କରିଛି ଯାଜପୁର ପୋଲିସ । ତେବେ ପୋଲିସ ସିସିଟିଭି ଫୁଟେଜରୁ ଏହି ଫଟୋ ସଂଗ୍ରହ କରିଥିବା ଜଣାପଡିଛି । ଯାଜପୁର ପୋଲିସର ୮ଟି ଟିମ୍ ତଦନ୍ତରେ ଲାଗିଥିବା ବେଳେ ବିଭିନ୍ନ ସ୍ଥାନରୁ ସିସିଟିଭି ଫୁଟେଜ ସଂଗ୍ରହ କରାଯାଉଛି । ଏଥିସହିତ ବିଭିନ୍ନ ସ୍ଥାନରେ ପୋଲିସ ଚଢ଼ାଉ ଜାରି ରଖିଥିବା ବେଳେ ବ୍ୟାସନଗର ସହରରେ ଥିବା ବିଭିନ୍ନ ହୋଟେଲ ଯାଞ୍ଚ କରାଯାଉଛି । ଏଯାଏଁ ଲୁଟେରା ଧରାପଡ଼ି ନଥିବାବେଳେ ଘଟଣାକୁ ଗୁରୁତର ସହ ନେଇ ତଦନ୍ତକୁ ଜୋରଦାର କରିଛି ପୋଲିସ ।