ରୁଷରେ ପୁଟିନଙ୍କ ସହ ଜିନ୍‌ପିଙ୍ଗ, ଭାରତରୁ ୟୁକ୍ରେନ ଅଭିମୁଖେ ବାହାରିଲେ ଜାପାନ ପିଏମ୍

Published By : Prameya-News7 Bureau | March 21, 2023 IST

ନୂଆଦିଲ୍ଲୀ: ପୁଟିନଙ୍କୁ ଭେଟିବା ପାଇଁ ରୁଷ ଗସ୍ତରେ ଅଛନ୍ତି ଚୀନ ରାଷ୍ଟ୍ରପତି ସି ଜିନପିଙ୍ଗ । ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କୁ ଭେଟିବା ପାଇଁ ୟୁକ୍ରେନ ପହଞ୍ଚିଲେ ଜାପାନ ପ୍ରଧାନମନ୍ତ୍ରୀ ଫୁମିଓ କିଶିଦା । ୟୁକ୍ରେନର ରାଜଧାନୀରେ ରାଷ୍ଟ୍ରପତି ଭୋଲୋଡିମର ଜେଲେନସ୍କିଙ୍କୁ ଜାପାନ ପ୍ରଧାନମନ୍ତ୍ରୀଙ୍କ ଭେଟିବାର କାର୍ଯ୍ୟକ୍ରମ ରହିଛି ।

ଜାପାନ ବୈଦେଶିକ ମନ୍ତ୍ରାଳୟ କିଶିଦାଙ୍କ କିଭ୍ ଯାତ୍ରା ଉପରେ ଘୋଷଣା କରି କହିଛି, 'ରାଷ୍ଟ୍ରପତି ଜେଲେନସ୍କିଙ୍କ ନେତୃତ୍ୱରେ ନିଜ ମାତୃଭୂମିର ରକ୍ଷା ପାଇଁ ଲଢେଇ କରୁଥିବା ୟୁକ୍ରେନବାସୀଙ୍କ ସାହସ ଏବଂ ସେମାନଙ୍କ ଧୈର୍ଯ୍ୟ ପ୍ରତି ସମ୍ମାନ ଜଣାଇବେ । ଏହାସହ ଜାପାନ ଜି ୭ ଅଧ୍ୟକ୍ଷ ରୂପେ ଦେଶର ଲୋକଙ୍କ ପ୍ରତି ସମର୍ଥନ ଜଣାଇବେ ।

ମନ୍ତ୍ରାଳୟ ଏକ ବୟାନରେ କହିଛି, ଜେଲେନସ୍କିଙ୍କ ସହ ଆଲୋଚନା ସମୟରେ କିଶିଦା ୟୁକ୍ରେନ ଉପରେ ଆକ୍ରମଣ ଏବଂ ସୁରକ୍ଷା ବଳ ଜରିଆରେ ପୂର୍ବସ୍ଥିତିରେ ପରିବର୍ତ୍ତନରେ ରୁଷର ଏକତରଫା ଉଦ୍ୟମକୁ ଖଣ୍ଡନ କରିବେ । ଏହାସହ ନିୟମ ଆଧାରିକ ଅନ୍ତରାଷ୍ଟ୍ରୀୟ ବ୍ୟବସ୍ଥାର ସୁରକ୍ଷା ପାଇଁ ନିଜର ପ୍ରତିବଦ୍ଧତାକୁ ଦୋହରାଇବେ ।

ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ କ୍ରେମଲିନ ଗସ୍ତରେ ଥିବା ରାଷ୍ଟ୍ରପତି ଜିନପିଙ୍ଗଙ୍କୁ ଜୋରଦାର ସ୍ୱାଗତ କରିଥିଲେ । ଉଭୟ ଦେଶ ଏହାକୁ ନିଜ ଅସୀମିତ ବନ୍ଧୁତାକୁ ମଜଭୁତ କରିବାର ଏକ ଅବସର ବୋଲି କହିଥିଲେ ।

News7 Is Now On WhatsApp Join And Get Latest News Updates Delivered To You Via WhatsApp

Rath Yatra

Copyright © 2024 - Summa Real Media Private Limited. All Rights Reserved.