ଟୋକିଓ ୧୩/୧୦: ଜାପାନରେ ଭୂମିକମ୍ପ ସହ ପ୍ରଳୟଙ୍କରୀ ଟାଇଫୁନ ତାଣ୍ଡବ । ୬୦ବର୍ଷରେ ସବୁଠୁ ଭୟଙ୍କର ଝଡ । ଆସନ୍ନ ବିପଦକୁ ଆଖିରେ ରଖି ୭୩ଲକ୍ଷ ଲୋକଙ୍କୁ ସୁରକ୍ଷିତ ଜାଗାକୁ ସ୍ଥାନାନ୍ତର କରାଯାଇଛି । ଶନିବାର ୧୫୦ କିଲୋମିଟର ବେଗରେ ମାଡି ଆସିଥିଲା ଟାଇଫୁନ୍ ହଗିବିସ୍ ।

ଏହାର କିଛି ମିନିଟ ଆଗରୁ ଭୂମିକମ୍ପର ସାମ୍ନା କରିଥିଲା ଜାପାନ । ଜାପାନର ଇଜୁ ଉପଦ୍ୱୀପଠାରେ ସ୍ଥଳଭାଗ ଛୁଇଁଛି । ସ୍ଥଳଭାଗ ଛୁଇଁବା ପରେ ସମୁଦ୍ରରେ ଉଚ୍ଚ ଜୁଆର ଆସିଛି ଓ ପବନର ବେଗ ଘଣ୍ଟା ପ୍ରତି ୧୫୦ କିଲୋମିଟର ଟପିଯାଇଥିଲା । ଏଥିରେ ୫ଜଣଙ୍କ ମୃତ୍ୟୁ ହେବା ସହ ୯୦ରୁ ଅଧିକ ଲୋକ ଆହତ ହୋଇଥିବା ସୂଚନା ମିଳିଛି । ଆହୁରି ଅନେକ ନିଖୋଜ ଥିବାରୁ ମୃତ୍ୟୁସଂଖ୍ୟା ବଢିବାର ଆଶଙ୍କା ରହିଛି । ବାତ୍ୟା ପ୍ରଭାବରେ କେତେକ ଉପକୂଳବର୍ତ୍ତୀ ସହରରେ ବନ୍ୟା ଓ ଭୂସ୍ଖଳନ ଦେଖାଦେଇଛି ।

ଫଳରେ ପୂର୍ବ ଉପକୂଳର ଅନେକ ସହର ଜଳବନ୍ଦୀ ହୋଇ ଯାଇଛି । ଜାପାନର ଟୋକିଓ, କାନାଗାଓ୍ଵା, ସାଇଟାମା ଓ ସିବା ଅଂଚଳରେ ଥିବା ନଦୀଗୁଡ଼ିକରେ ବନ୍ୟା ଆସିଛି । ଜାପାନ ଭାଷାରେ ହଗିବିସ୍ ର ଅର୍ଥ ହେଉଛି ଗତି । ଏଥିପାଇଁ ଏହି ଝଡ ତାଣ୍ଡବ ରଚିଛି । ଝଡ ତୋଫାନ ପରେ ଉଦ୍ଧାର ଏବଂ ରିଲିଫ ପାଇଁ ୧୭ହଜାର ସେନା ମୁତୟନ ହୋଇଛନ୍ତି । ପ୍ରଭାବିତ ଇଲାକାରେ ଟ୍ରେନ ଚଳାଚଳ ବାତିଲ କରିଦିଆଯାଇଛି । ୧୯୫୮ମସିହାରେ ଏପରି ଭୟଙ୍କର ବାତ୍ୟା ଯୋଗୁ ୧୨ଶହ ଲୋକଙ୍କ ମୃତ୍ୟୁ ହୋଇଥିଲା । ତେବେ ଏଥର ବାତ୍ୟା ମୁକାବିଲା ଲାଗି ଜାପାନ ସରକାର ପ୍ରସ୍ତୁତି କରିଛନ୍ତି ।