ଜଳେଶ୍ବର: ଜଳେଶ୍ବର ପୋଲିସକୁ ମିଳିଛି ବଡ ସଫଳତା। ବ୍ୟାଙ୍କ ଲୁଟ ପାଇଁ ଯୋଜନା କରୁଥିବା ବେଳେ ୭ ଜଣିଆ ଡକାୟତ ଗ୍ୟାଙ୍ଗକୁ ଗିରଫ କରିଛି ପୋଲିସ। ସେମାନଙ୍କ ନିକଟରୁ ବିଭିନ୍ନ ପ୍ରକାରର ମାରଣାସ୍ତ୍ର ଜବତ କରାଯାଇଛି।
ସୂଚନା ଅନୁଯାୟୀ, ଜଳେଶ୍ବର ଥାନା ଅନ୍ତର୍ଗତ ଗୋବରଘାଟା ସ୍ଥିତ ଦଶହରା ପଡିଆ ନିକଟରେ ଏକତ୍ର ହୋଇ ଡକାୟତି ପାଇଁ ଯୋଜନା କରୁଥିବା ବେଳେ କୌଣସି ସୂତ୍ରରୁ ଖବର ପାଇ ଜଳେଶ୍ବର ପୋଲିସ ଟିମ ଅତର୍କିତ ଭାବରେ ଚଢଉ କରିଥିଲା। ସେମାନଙ୍କ ନିକଟରୁ ଦୁଇଟି ପିସ୍ତଲ, ଗୋଟିଏ ଦେଶୀ ବନ୍ଧୁକ, ଅଫୁଟା ଗୁଳି, ଗୋଟିଏ କାର, ୩ ଟି ବାଇକ, ଗୋଟିଏ ଗ୍ୟାସ କଟର ସହ ସିଲିଣ୍ଡର, ଲୁହା ରଡ୍, ଲଙ୍କା ଗୁଣ୍ଡ ପ୍ୟାକେଟ୍, ଗ୍ଲୋବ୍ସ, ମଙ୍କି କ୍ୟାପ୍ ,ନଗଦ ଟଙ୍କା ସମେତ ୬ ଟି ଦାମୀ ମୋବାଇଲ ଜବତ କରିଛି ପୋଲିସ।
ଗିରଫ ୭ ଜଣଙ୍କ ମଧ୍ୟରୁ ୪ ଜଣଙ୍କ ଘର ପଶ୍ଚିମବଙ୍ଗର ହୋଇଥିବା ବେଳେ ଜଣଙ୍କ ଘର ଓଡିଶାରେ ଏବଂ ଅନ୍ୟ ଜଣଙ୍କ ଘର ଦିଲ୍ଲୀରେ ବୋଲି ଜଣା ପଡିଛ। ଏହି ଡକାୟତି ଗ୍ୟାଙ୍ଗ ବିଭିନ୍ନ ଅପରାଧିକ କାର୍ଯ୍ୟକଳାପ ଏବଂ ଲୁଟ ଘଟଣାରେ ସାମିଲ ଥିବା ନେଇ ଜଳେଶ୍ବର ଥାନା ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବାଲେଶ୍ବର ଏସପି ସାଗରିକା ନାଥ। ଏହି ସମୟରେ ଏସଡିପିଓ ଦିଲୀପ କୁମାର ସାହୁ, ଆଇଆଇସି ରଞ୍ଜନ କୁମାର ସେଠୀ ଓ ଥାନାର ପୋଲିସ କର୍ମଚାରୀ ଉପସ୍ଥିତ ଥିଲେ।
