ଯାଜପୁର ୨୧।୧୧ : ଯାଜପୁର କୋରେଇରେ ମାଲଗାଡି ଦୁର୍ଘଟଣା ପରେ ଏହି ରୁଟ୍ ରେ ଯାତାୟତ ବାଧା ପାଇଛି । ଦୁର୍ଘଟଣାସ୍ଥଳରେ ରେସକ୍ୟୁ ଅପରେସନ୍ ଜାରି ରହିଛି । ଭାଙ୍ଗିରୁଜି ଯାଇଥିବା ବଗିକୁ ହଟାଇବାକୁ ଚେଷ୍ଟା କରାଯାଉଛି । ଓଲଟି ପଡିଥିବା ୮ବଗିରୁ ୭ଟି ବଗିକୁ ଲାଇନ୍ ଉପରୁ ହଟାଇ ଦିଆଗଲାଣି । ରେଳବିଭାଗର ରିଲିଫ୍ ଟ୍ରେନ୍ ଏହି ରୁଟ୍ ରେ ଯାତାୟତ ସ୍ବାଭାବିକ କରିବାକୁ ଚେଷ୍ଟା କରାଯାଉଛି । କ୍ରେନ୍ ସହାୟତାରେ ଟ୍ରେନ୍ ଲାଇନ୍ କ୍ଲିଅର କରାଯାଉଛି ।

ଖବର ଅନୁଯାୟୀ, ସୋମବାର ସକାଳ ୬ଟା ୪୪ମିନିଟରେ ଯାଜପୁର କୋରେଇ ଷ୍ଟେସନରେ ଭୟଙ୍କର ଟ୍ରେନ୍ ଦୁର୍ଘଟଣା ଘଟିଛି । ଅଚାନକ ମାଲଗାଡିର ୮ଟି ବଗି ପ୍ଲାଟଫର୍ମ ଉପରୁ ଚଢିଯାଇଥିଲା । ଫୁଟ ଓଭର ବ୍ରିଜ ଦେହରେ ପ୍ରବଳ ବେଗରେ ଧକ୍କା ଦେବା ଫଳରେ ତାହା ଭାଙ୍ଗି ଚୁରମାର ଯାଇଥିଲା । ସେତେବେଳେ ଯାତ୍ରୀ ବିଶ୍ରାମାଗାରରେ କିଛି ଯାତ୍ରୀ ବିଶ୍ରାମ ନେଉଥିଲେ ।

ଟ୍ରେନ୍ ବଗି ଧକ୍କାରେ ଯାତ୍ରୀ ବିଶ୍ରାମାଗାର ମଧ୍ୟ ଭାଙ୍ଗି ଯାଇଥିଲା । ଏଥିରେ ପ୍ଲାଟଫର୍ମର ଯାତ୍ରୀ ବିଶ୍ରାମାଗାର ଭିତରକୁ ଟ୍ରେନ ମାଡି ଯିବାରୁ ୩ ଜଣଙ୍କ ମୃତ୍ୟୁ ଘଟିଛି । ମୃତକମାନେ ହେଉଛନ୍ତି ପାର୍ବତୀ ବିନ୍ଧାଣି,କଣ୍ଡେଇ ବିନ୍ଧାଣି ଏବଂ ଅଫଜୁନ ବିବି । ଆହତ ୪ଜଣଙ୍କ ପ୍ରାଥମିକ ଚିକିତ୍ସା କରାଯାଇଛି l ବିଶ୍ରାମାଗାରରେ ସେମାନେ ଆଶ୍ରୟ ନେଇଥିବା ବେଳେ ଟ୍ରେନ୍ ମାଡ଼ି ଯାଇଥିଲା। ଦୁର୍ଘଟଣାରେ ଷ୍ଟେସନ ଭିତରକୁ ଯାଇ ୮ଟି ବଗି ମାଡି ଯାଇ ଓଲଟି ପଡିଥିଲା। ବିଶ୍ରାମାଗାରରେ ଅପେକ୍ଷା କରିଥିବା ଲୋକେ ଚାପି ହୋଇ ଯାଇଥିଲେ। ଦୁର୍ଘଟଣାସ୍ଥଳରେ ଓଡ୍ରାଫ୍ ଓ ଅଗ୍ନିଶମ ବାହିନୀ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଜେସିବି ମେସିନ୍ ଦ୍ବାରା ଭାଙ୍ଗିଯାଇଥିବା ଖଣ୍ଡଗୁଡ଼ିକୁ ଉଠାଯାଉଛି। ରେଲୱେର ବରିଷ୍ଠ ଅଧିକାରୀ ମାନେ ଦୁର୍ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ତଦାରଖ କରୁଛନ୍ତି।