ନୂଆଦିଲ୍ଲୀ, ୨୪/୦୩: ଟେକ୍ନୋଲୋଜୀ କମ୍ପାନି ବ୍ଲକ୍ ଇଙ୍କ୍ର ସହ ପ୍ରତିଷ୍ଠାତାଙ୍କୂ ନେଇ ହିଣ୍ଡନବର୍ଗର ସଦ୍ୟ ରିପୋର୍ଟ ଆସିଛି। ଯାହାକୁ ନେଇ ଏବେ ଖୁବ୍ ଚର୍ଚ୍ଚା ଲାଗିରହିଛି। ରିପୋର୍ଟରେ ବ୍ଲକ୍ ଇଙ୍କ୍ ବିରୋଧରେ ବଡ଼ ଅଭିଯୋଗ ରହିଛି। ହିଣ୍ଡନବର୍ଗ ଦାବି କରିଛି, ଜ୍ୟାକ୍ ଡୋର୍ସିଙ୍କ ନେତୃତ୍ବାଧୀନ ବ୍ଲକ୍ ଇଙ୍କ୍ ଭୁଲ୍ ଉପାୟରେ ନିଜ ୟୁଜର୍ସଙ୍କ ସଂଖ୍ୟା ବଢ଼ାଇଛି। ଅନ୍ୟପଟେ ନିଜ ଗ୍ରାହକ ଅଧିଗ୍ରହଣ ଖର୍ଚ୍ଚକୁ ମଧ୍ୟ କମ କରିଛି। ତେବେ ଏହି ରିପୋର୍ଟର ବଡ଼ ପ୍ରଭାବ ପଡ଼ିଥିବାର ଦେଖାଯାଉଛି।
ହିଣ୍ଡନବର୍ଗର ଏହି ରିପୋର୍ଟ ଆସିବା ପରେ ଡୋର୍ସିଙ୍କ ସମ୍ପତ୍ତିରେ ଗୁରୁବାର ୫୨୬.୪ ମିଲିୟନ ଡଲାର ହ୍ରାସ ହୋଇଛି। ଏହି ହ୍ରାସ ମେ ପରେ ତାଙ୍କର ସମୁଦାୟ ସମ୍ପତ୍ତିରେ ଆସିଥିବା ଗୋଟିଏ ଦିନରେ ସବୁଠୁ ବଡ଼ ହ୍ରାସ। ବ୍ଲୁମ୍ବର୍ଗ ବିଲିଓନର୍ସ ଇଣ୍ଡେକ୍ସ ଅନୁଯାୟୀ ୧୧ ପ୍ରତିଶତ ହ୍ରାସ ପରେ ଏବେ ତାଙ୍କର ସମ୍ପତ୍ତି ୪.୪ ବିଲିୟନ ଡଲାର ରହିଛି।
ସୂଚନାଯୋଗ୍ୟ, ହିଣ୍ଡନବର୍ଗ ଗୁରୁବାର ଏକ ରିପୋର୍ଟରେ ଦାବି କରିଛି ଯେ ବ୍ଲକ୍ ଇଙ୍କ୍ ଏହାର ୟୁଜର୍ସଙ୍କ ସଂଖ୍ୟା ଭୁଲ୍ ଉପାୟରେ ବଢ଼ାଇଛି। ତେବେ କମ୍ପାନି ଏହି ଅଭିଯୋଗକୁ ପ୍ରତ୍ୟାଖ୍ୟାନ କରିବା ସହ କହିଛି ଯେ ହିଣ୍ଡନବର୍ଗ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ୍ କରିବାକୁ ଯୋଜନା ପ୍ରସ୍ତୁତ କରୁଛି।