ନୂଆଦିଲ୍ଳୀ, ୦୬/୦୨: ସିକ୍କିମର ନେପାଳୀ ସମୁଦାୟ ଉପରେ ସୁପ୍ରିମକୋର୍ଟଙ୍କ ଏକ ଟିପ୍ପଣୀକୁ ନେଇ ଏବେ ଅସନ୍ତୋଷ। ଏହାର ବିରୋଧ କରି ସିକ୍କିମରେ ଜାରି ରହିଛି ପ୍ରଦର୍ଶନ। ପ୍ରକୃତରେ ଏହି ଟିପ୍ପଣୀରେ ସିକ୍କିମର ନେପାଳି ସମୁଦାୟକୁ ପ୍ରବାସୀ ବୋଲି କୁହାଯାଇଥିଲା। ଏହି ମାମଲାକୁ ନେଇ ଏବେ ଗୃହ ମନ୍ତ୍ରାଳୟ ସୁପ୍ରିମକୋର୍ଟରେ ପୁର୍ନବିଚାର ଯାଚିକା କରିଛି।

ଗୃହ ମନ୍ତ୍ରାଳୟ ସୋମବାର କହିଛି ଯେ ସିକ୍କିମର ନେପାଳୀ ସମୁଦାୟକୁ ସୁପ୍ରିମକୋର୍ଟଙ୍କ ବିଦେଶୀ କହିବା ଟିପ୍ପଣୀ ଉପରେ ପୁନର୍ବିଚାର କରାଯିବା ଦରକାର। ସୁପ୍ରିମକୋର୍ଟଙ୍କ କିଛି ଟିପ୍ପଣୀ ଏବଂ ‘ସିକ୍କିମୀ’ ଶବ୍ଦର ସ୍ପଷ୍ଟୀକରଣର ଅନୁରୋଧ କରି ଏକ ପୁର୍ନବିଚାର ଯାଚିକା ଦାୟର କରିଛନ୍ତି। ଏହା ସହ ଏହି ପ୍ରସଙ୍ଗରେ ସରକାର ନିଜର ଆଭିମୁଖ୍ୟ ରଖିବା ସହ କହିଛନ୍ତି ଯେ ସିକ୍କିମୀଙ୍କ ପରିଚୟକୁ ସୁରକ୍ଷା ଦେଉଥିବା ସମ୍ବିଧାନିକ ବ୍ୟବସ୍ଥାକୁ ଦୁର୍ବଳ କରାନଯିବା ଦରକାର।

ସିକ୍କିମରେ ନେପାଳୀ ସମୁଦାୟ ସୁପ୍ରିମକୋର୍ଟଙ୍କ ଟିପ୍ପଣୀ ବିରୋଧରେ ପ୍ରଦର୍ଶନ କରୁଛି। ୧୩ ଜାନୁଆରୀରେ ସୁପ୍ରିମକୋର୍ଟ ସିକ୍କିମର ଅଧିବାସୀଙ୍କ ପାଇଁ ଆୟକର ଛାଡ଼ ସମ୍ବନ୍ଧୀୟ ଏକ ମାମଲାର ଶୁଣାଣି ସମୟରେ ନିଜ ଆଦେଶରେ ସିକ୍କିମ ନେପାଳୀଙ୍କୁ ପ୍ରବାସୀ ବୋଲି କହିଦେଇଥିଲେ। କୋର୍ଟ କହିଥିଲେ ଯେ ଏମାନେ ସିକ୍କିମରେ ଆସି ରହିଯାଇଥିଲେ। ଏହାପର ଠାରୁ ସିକ୍କିମର ନେପାଳୀ ସମୁଦାୟ ନାରାଜ ରହିଛି।

ଏହି ମାମଲାରେ ରବିବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହ ସିକ୍କିମର ବିଜେପି ଅଧ୍ୟକ୍ଷଙ୍କ ନେତୃତ୍ବାଧୀନ ଏକ ପ୍ରତିନିଧିମଣ୍ଡଳକୁ ଆଶ୍ବାସନା ଦେଇଥିଲେ ଏବଂ ପୁର୍ନବିଚାରର ଆଶ୍ବାସନା ଦେଇଥିଲେ। ଅମିତ ଶାହ ପ୍ରତିନିଧିମଣ୍ଡଳକୁ କହିଥି​‌ଲେ ଯେ ସିକ୍କିମୀ ସମୁଦାୟର ଭାବନାରେ ସମ୍ମାନ କରାଯିବା ଦରକାର। ଏହା ସହ ଗୃହମନ୍ତ୍ରୀ ସିକ୍କିମ ଅଧିବାସୀଙ୍କୁ ଶାନ୍ତି ଏବଂ ସଦଭାବ ବଜାୟ ରଖିବାକୁ ଅପିଲ୍ କରିଛନ୍ତି। ଏବଂ ରାଜନୀତିକ ଦଳଙ୍କୁ ଏହି ସମ୍ବେଦନଶୀଳ ପ୍ରସଙ୍ଗକୁ ରାଜନୀତିକ ଲାଭ ନଉଠାଇବାକୁ ଅପିଲ୍‌ କରିଛନ୍ତି।