ନୂଆଦିଲ୍ଲୀ: ଗାଜାରେ ରକ୍ତର ହୋଲି ଖେଳୁଛି ଇସ୍ରାଏଲ ସେନା । ଖାନ୍ ୟୁନିସ୍ରେ ଥିବା ଶରଣାର୍ଥୀ ଶିବିରକୁ ଆକ୍ରମଣ କରିଛି ଆଇଡିଏଫ । ପ୍ରଚଣ୍ଡ ବୋମା ମାଡ଼ରେ ପ୍ରାୟ ୯୦ରୁ ଅଧିକ ଲୋକ ପ୍ରାଣ ହରାଇଥିବା ବେଳେ ୨୮୦ରୁ ଅଧିକ ଆହତ ହୋଇଛନ୍ତି । ଗୁରୁତରଙ୍କ ସଂଖ୍ୟା ଅଧିକ ରହିଥିବାରୁ ମୃତ୍ୟୁ ସଂଖ୍ୟା ବଢ଼ିପାରେ ବୋଲି କୁହାଯାଉଛି ।
ଖାନ୍ ୟୁନିସ୍ ସହରର ଏକ ଖୋଲା ସ୍ଥାନରେ ଶରଣାର୍ଥୀମାନେ ତମ୍ବୁ ଟାଣି ରହୁଥିଲେ । ଶନିବାର ଅଚାନକ ଇସ୍ରାଏଲ୍ ସେନା ଆକ୍ରମଣ କରିଥିଲା । ଆକାଶରୁ ଘନଘନ ବୋମା ମାଡ଼ ହୋଇଥିଲା । ହମାସ୍ ପରିଚାଳିତ ଗାଜା ସରକାର ଏହି ଆକ୍ରମଣକୁ ‘ସାଙ୍ଘାତିକ ହତ୍ୟାକାଣ୍ଡ’ ବିବେଚନା କରିଛି । ମୃତକଙ୍କ ମଧ୍ୟରେ ଜରୁରି ସେବାରେ ନିୟୋଜିତ କର୍ମୀମାନେ ବି ପ୍ରାଣ ହରାଇଛନ୍ତି । ଖାନ୍ ୟୁନିସ୍ର ପଶ୍ଚିମ ଭାଗରେ ଏହି ଶିବିର ରହିଛି । ଏହି ହମଲା ପରେ ସଫେଇ ଦେଇ ଇସ୍ରାଏଲ୍ ସେନା କହିଛି, ପ୍ରକୃତରେ ହମାସ୍ର ସେନା କମାଣ୍ଡର ମହମ୍ମଦ ଡେଇଫ୍କୁ ଟାର୍ଗେଟ୍ କରାଯାଇଥିଲା । ଭୁଲବଶତଃ ଶରଣାର୍ଥୀ ଶିବିର ପ୍ରଭାବିତ ହୋଇଥିଲା ।
ଅନ୍ୟପକ୍ଷରେ ହମାସ୍ ଏହାକୁ ଖଣ୍ଡନ କରିଛି । ଇସ୍ରାଏଲ୍ ଜାଣିଶୁଣି ଅଲ୍ମୱାସି ଶରଣାର୍ଥୀ ଶିବିରକୁ ଟାର୍ଗେଟ୍ କରିଥିଲା ବୋଲି କହିଛି ହମାସ୍ । ଏଥିରେ ନିରୀହ ତଥା ନିରସ୍ତ୍ର ସାଧାରଣ ନାଗରିକ ପ୍ରାଣ ହରାଇଛନ୍ତି । ଇସ୍ରାଏଲ୍ ପକ୍ଷରୁ ଯୋଜନାବଦ୍ଧ ଭାବେ ଏହି ଆକ୍ରମଣ ହୋଇଥିବା ହମାସ୍ କହିଛି । ଗାଜାରେ ଇସ୍ରାଏଲ୍ ପକ୍ଷରୁ ନିୟମିତ ବ୍ୟବଧାନରେ ବଡ଼ଧରଣର ଆକ୍ରମଣ କରାଯାଉଛି । ଏଥିରେ ଅନେକ ଲୋକ ମୃତାହତ ହେଉଛନ୍ତି ।
ହମାସ୍ ପରିଚାଳିତ ସ୍ୱାସ୍ଥ୍ୟ ମନ୍ତ୍ରଣାଳୟ ମୁତାବକ, ଯୁଦ୍ଧ ଯୋଗୁ ଏ ପର୍ଯ୍ୟନ୍ତ ଗାଜାରେ ୩୮ ହଜାର ୪ ଶହ ଲୋକଙ୍କ ମୃତ୍ୟୁ ଘଟିଥିବା ବେଳେ ୮୮ ହଜାର ୨୯୫ ଜଣ ଆହତ ହୋଇଛନ୍ତି । ଅକ୍ଟୋବର ୭ରେ ହମାସ୍ ଆତଙ୍କୀମାନେ ଇସ୍ରାଏଲ୍ ଉପରେ ଆକ୍ରମଣ କରିଥିଲେ । ଏହାପରେ ଇସ୍ରାଏଲ୍ ଆକ୍ରମଣ ଜାରି ରଖିଛି । ପାଲେଷ୍ଟାଇନ୍ର ବିଦେଶ ମନ୍ତ୍ରଣାଳୟ ପକ୍ଷରୁ ଇସ୍ରାଏଲ୍ର ସଦ୍ୟ ଆକ୍ରମଣକୁ ନିନ୍ଦା କରାଯାଇଛି । ସୋସିଆଲ୍ ମିଡିଆରେ ଏହା କହିଛି, ଇସ୍ରାଏଲ୍କୁ ସମର୍ଥନ କରୁଥିବା ଦେଶଗୁଡ଼ିକ ନିଜ ବିବେକ ଓ ନୈତିକତାକୁ ଉଜାଗର କରିବା ଆବଶ୍ୟକ । ଯୁଦ୍ଧକୁ ରୋକିବା ପାଇଁ ହେଉଥିବା ଅନ୍ତର୍ଜାତୀୟ ଉଦ୍ୟମକୁ ସମସ୍ତେ ସମର୍ଥନ କରିବା ଜରୁରି ।
