ନୂଆଦିଲ୍ଲୀ: ଭାରତର ବୈଦେଶିକ ମୁଦ୍ରା ଭଣ୍ଡାରରେ ଲଗାତାର ଦ୍ୱିତୀୟ ସପ୍ତାହରେ ବୃଦ୍ଧି ଦେଖିବାକୁ ମିଳିଛି । ଶୁକ୍ରବାର ଆରବିଆଇ ଦ୍ୱାରା ଜାରି ତଥ୍ୟ ଅନୁସାରେ ମାର୍ଚ୍ଚ ୨୪ରେ ଶେଷ ହୋଇଥିବା ସପ୍ତାହରେ ଦେଶରେ ବୈଦେଶିକ ମୁଦ୍ରା ଭଣ୍ଡାର ୫.୯୭୭ ବିଲିୟନ ଡଲାର ବୃଦ୍ଧି ସହ ୫୭୮.୭୭୮ ବିଲିୟନ ଡଲାର ହୋଇଛି । ଉଲ୍ଲେଖଯୋଗ୍ୟ ଯେ ପୂର୍ବ ସପ୍ତାହରେ ଭାରତର ଫୋରେକ୍ସ ରିଜର୍ଭ ୧୨.୮ ବିଲିୟନ ଡାଲର ବୃଦ୍ଧି ସହ ୫୭୨.୮ ବିଲିୟନ ଡଲାର ହୋଇଥିଲା ।

ରିଜର୍ଭ ବ୍ୟାଙ୍କ ସାପ୍ତାହିକ ଡାଟା ଅନୁସାରେ ମାର୍ଚ୍ଚ ୨୪ରେ ଶେଷ ହୋଇଥିବା ସପ୍ତାହରେ ମୁଦ୍ରାଭଣ୍ଡାରର ଗୁରୁତ୍ୱପୂର୍ଣ୍ଣ ଭାଗ, ବିଦେଶୀ ମୁଦ୍ରା ଭଣ୍ଡାରରେ ୪.୩୮ ବିଲିୟନ ଡଲାର ବଢି ୫୦୯.୭୨୮ ବିଲିୟନ ଡାଲର ହୋଇଛି ।

ରିଜର୍ଭ ବ୍ୟାଙ୍କର ତଥ୍ୟ ଅନୁସାରେ ଦେଶର ସ୍ୱର୍ଣ୍ଣ ଭଣ୍ଡାରରେ ଆଲୋଚ୍ୟ ସପ୍ତାହରରେ ୧.୩୭ ବିଲିୟନ ଡଲାର ବଢି ୪୫.୪୮ ବିଲିୟନ ଡଲାର ହୋଇଛି । ଡାଟା ଅନୁସାରେ ଏସଡିଆର ୨୦.୧ କୋଟି ଡଲାର ବଢି ୧୮.୪୧୯ ବିଲିୟନ ଡାଲର ହୋଇଛି । ଏହି ଅବଧିରେ ଅନ୍ତରାଷ୍ଟ୍ରୀୟ ମୁଦ୍ରା ପାଣ୍ଠିରେ ଥିବା ଦେଶର ମୁଦ୍ରା ଭଣ୍ଡାର ମଧ୍ୟ ୨.୭୮ କୋଟି ଡଲାର ବଢି ୫.୧୧୫ ବିଲିୟନ ଡଲାର ହୋଇଛି ।