ନୂଆଦିଲ୍ଲୀ: ମିଳିତ ଜାତିସଂଘର ୫୨ତମ ମାନବାଧିକାର ପରିଷଦର ଜେନେଭା ବୈଠକ ସମୟରେ ଭାରତର ବିକାଶ ମଡେଲର ପ୍ରଶଂସା କରାଯାଇଛି । ଏହି ସମୟରେ ଅଣ-ସରକାରୀ ସଂଗଠନଗୁଡିକ ଭାରତୀୟ ଶିକ୍ଷା ମଡେଲ ଉପରେ ଆଲୋକପାତ କରି ଏହାକୁ ପ୍ରଶଂସା କରିଛନ୍ତି । ଏହାସହ ଏହି ସମୟରେ ଅନ୍ୟ ସଦସ୍ୟ ଦେଶଗୁଡିକୁ ଏହାର ଅନୁକରଣ ପାଇଁ ଅପିଲ୍ କରାଯାଇଛି ।
ଅଧିବେଶନ ସମୟରେ ୟୁନାଇଟେଡ୍ ନେସନ ଇକୋନମିକ ଆଣ୍ଡ ସୋସିଆଲ କାଉନସିଲ ସହ ଜଡିତ ଅଣ-ସରକାରୀ ସଂଗଠନ ଇକୋ ଫୋନର ସାଇ ସମ୍ପତ ଜଣେ ପଛୁଆ ବର୍ଗର ଯୁବତୀ ରୋହିଣୀଙ୍କ କାହାଣୀ ସେୟାର କରିଛନ୍ତି । ସେ କହିଛନ୍ତି ଯେ ରୋହିଣୀ ଜେନେଭାରେ ପାଠ ପଢୁଛନ୍ତି ଏବଂ ସେ ଭାରତ ସରକାରଙ୍କ ଦ୍ୱାରା ଦିଆଯାଇଥିବା ଏକ କୋଟି ଟଙ୍କାର ଲାଭାର୍ଥୀ ଅଟନ୍ତି ।
ସମ୍ପତ କହିଛନ୍ତି, 'ଜାତିସଂଘରେ ୨୦ କୋଟି ପଛୁଆ ବର୍ଗଙ୍କ ପ୍ରତିନିଧି କରିବା ମୋ ପାଇଁ ସମ୍ମାନର ବିଷୟ ଅଟେ । ସ୍ୱିଜରଲାଣ୍ଡରେ ପିଏଚଡି କରିବା ପାଇଁ ଭାରତ ସରକାରଙ୍କ ପକ୍ଷରୁ ଦିଆଯାଇଥିବା ଛାତ୍ରବୃତ୍ତି ପାଇଁ ଧନ୍ୟବାଦ ଜଣାଉଛି' ।
ସମ୍ପତ କହିଛନ୍ତି ଯେ ଭାରତରେ ପଛୁଆ ବର୍ଗଙ୍କ ସ୍ଥିତି ଅନ୍ୟ ଦେଶରେ ସଂଖ୍ୟାଲଘୁଙ୍କ ତୁଳନାରେ ବହୁ ଭଲ ରହିଛି । ଭାରତରେ ବିଭିନ୍ନ ସମୁଦାୟ ଏବଂ ପୃଷ୍ଠିଭୂମିର ଲୋକଙ୍କ ଦ୍ୱାରା ଅସୁବିଧାକୁ ଦୂର କରାଯାଉଛି ଏବଂ ନୂଆ ସୁଯୋଗ ସୃଷ୍ଟି କରାଯାଇଛି । ଏହାସହ ସମ୍ପତ କହିଛନ୍ତି ଯେ ଭାରତର ପ୍ରଥମ ମହିଳା ଆଦିବାସୀ ମହିଳା ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆମ ସମ୍ୱିଧାନର ଶକ୍ତିର ଏକ ପ୍ରମାଣ ଅଟେ । ଏଥିରୁ ଜଣାପଡୁଛି ଯେ ଭିନ୍ନ ଭିନ୍ନ ସମୁଦାୟ ଏବଂ ପୃଷ୍ଠଭୂମିର ଲୋକଙ୍କ ଅସୁବିଧାର ଦୂର କରିପାରନ୍ତି ଏବଂ ସୁଯୋଗ ସୃଷ୍ଟି କରିପାରନ୍ତି । ଆଫ୍ରିକା ସଂଘର ପ୍ରତିନିଧିତ୍ୱ କରୁଥିବା ସୋମୟାଜୀ ମଧ୍ୟ ଭାରତର ବିକାଶ କଥା ଉଲ୍ଲେଖ କରିଛନ୍ତି । ସେ କହିଛନ୍ତି ଯେ ଭାରତର ସମ୍ୱିଧାନ ସମସ୍ତ ନାଗରିକଙ୍କୁ ମୌଳିକ ଅଧିକାରର ସଂରକ୍ଷଣ ଦେଉଛି ।
