ନୂଆଦିଲ୍ଲୀ ୧୮।୦୨: ଇଣ୍ଡିଆନ ରେଲଓ୍ବେ ହେଉଛି ଏସିଆର ଦ୍ୱିତୀୟ ଏବଂ ବିଶ୍ୱର ଚତୁର୍ଥ ବୃହତ୍ତମ ନେଟଓ୍ବର୍କ ।  ଭାରତରେ ପ୍ରତିଦିନ କୋଟି କୋଟି ଲୋକ ଟ୍ରେନରେ ଯାତ୍ରା କରନ୍ତି ।  ରେଳବାଇ ସାରା ଦେଶରେ ହଜାର ହଜାର ଟ୍ରେନ୍ ଚଳାଚଳ କରେ । ପ୍ରତ୍ୟେକ ଟ୍ରେନର ଭିନ୍ନ ନାମ ଏବଂ ସଂଖ୍ୟା ରହିଛି । ଅଧିକାଂଶ ଟ୍ରେନ୍ର ନାଁ ସେମାନଙ୍କର ବୋର୍ଡିଂ ଏବଂ ଗନ୍ତବ୍ୟସ୍ଥଳ  ଅନୁଯାୟୀ ରଖାଯାଇଥାଏ । ରାଜଧାନୀ, ଶତାବ୍ଦୀ, ଦୁରନ୍ତୋ ଭଳି ଅନେକ ପ୍ରିମିୟମ୍ ଟ୍ରେନ୍ ମଧ୍ୟ ଦେଶରେ ଚାଲିଥାଏ । କିନ୍ତୁ କେବେ ଆପଣଙ୍କ ମନରେ ପ୍ରଶ୍ନ ଆସିଛି କି କେଉଁ ଆଧାରରେ ଏହି ଟ୍ରେନର ନାମ ସ୍ଥିର ହୋଇଛି ?  ଆସନ୍ତୁ ଜାଣିବା ଟ୍ରେନ ଗୁଡିକର ନାମକରଣ ଏପରି କାହିଁକି ହୋଇଥାଏ ।

୧- ଶତାବ୍ଦୀ ଏକ୍ସପ୍ରେସ

୧୯୮୯ ମସିହାରେ ଆରମ୍ଭ ହୋଇଥିଲା ଶତାବ୍ଦୀ ଟ୍ରେନ୍ । ଶତାବ୍ଦୀର ଅର୍ଥ ହେଉଛି ୧୦୦ବର୍ଷ ।  ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ୧୦୦ ତମ ଜନ୍ମ ବାର୍ଷିକୀ ଅବସରରେ ଏହି ଟ୍ରେନର ନାମକରଣ କରାଯାଇଥିଲା । ତାଙ୍କ ଜନ୍ମବର୍ଷ ପାଳନ କରିବାକୁ ତତ୍କାଳୀନ ସରକାର ଏହି ଟ୍ରେନ୍ ଆରମ୍ଭ କରିଥିଲେ । ଏହି ଟ୍ରେନ୍ ସାଧାରଣତଃ ୪୦୦ରୁ ୫୦୦ କିଲୋମିଟର ଦୂରତା ପାଇଁ ଚାଲିଥାଏ।  ଏହି ଟ୍ରେନର ସର୍ବାଧିକ ବେଗ ଘଣ୍ଟା ପ୍ରତି ୧୬୦ କିଲୋମିଟର ରହିଛି ।

୨-ରାଜଧାନୀ ଏକ୍ସପ୍ରେସ୍

ଦ୍ବିତୀୟରେ ରହିଛି ରାଜଧାନୀ ଏକ୍ସପ୍ରେସ୍  । ଏହାର ନାମରୁ ହିଁ ଜଣାପଡେ ଦେଶର ରାଜଧାନୀ ଦିଲ୍ଲୀକୁ ଅନ୍ୟ ରାଜ୍ୟ ସହିତ ଯୋଡିଥାଏ ଟ୍ରେନ୍ । ରାଜଧାନୀ ଏକ୍ସପ୍ରେସ୍ ବହୁତ ଦୂର ଯାତ୍ରା ଅତିକ୍ରମ କରିଥାଏ ଏବଂ ଏଥିରେ ଯାତ୍ରୀଙ୍କୁ ଶୋଇବା ଓ ଏସି ସୁବିଧା ମିଳିଥାଏ ।  ତେବେ ରାଜଧାନୀ ଏକ୍ସପ୍ରେସର ସର୍ବାଧିକ ଗତି ହେଉଛି ୧୪୦କିଲୋମିଟର ।

୩- ଦୁରନ୍ତୋ ଏକ୍ସପ୍ରେସ

ଦୁରନ୍ତୋ ହେଉଛି ଏକ ବଙ୍ଗାଳୀ ଶବ୍ଦ ।  ଦୁରନ୍ତୋ ଏକ୍ସପ୍ରେସ ଟ୍ରେନର ବିଶେଷତ୍ୱ ​​ହେଉଛି ଏହା କମ୍ ଷ୍ଟେସନରେ ଅଟକି ଥାଏ ଏବଂ ଯାତ୍ରୀମାନଙ୍କୁ ଯଥାଶୀଘ୍ର ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ପହଞ୍ଚାଇଥାଏ ।  ଏହି ଟ୍ରେନର ସର୍ବାଧିକ ବେଗ ଘଣ୍ଟା ପ୍ରତି ୧୪୦ କିଲୋମିଟର ଅଟେ ।

ଉଲ୍ଲେଖନୀୟ ବିଷୟ ହେଉଛି, ରେଳବାଇ ଟ୍ରେନ ଗୁଡିକର ନାମ ବାଛିବା ପାଇଁ ଏକ ସାଧାରଣ ପଦ୍ଧତି ଅନୁସରଣ କରେ । ଅଧିକାଂଶ ଟ୍ରେନ୍ ନାମ ଏହାର ବୋର୍ଡିଂ ଏବଂ ଗନ୍ତବ୍ୟସ୍ଥଳ ଷ୍ଟେସନର ନାମ ଉପରେ ଆଧାରିତ । ଯେପରିକି ହାଓ୍ବାଡା-ମୁମ୍ବାଇ ମେଲ୍, ଲକ୍ଷ୍ନୌ- ବରୌନି ମେଲ୍, ବେଙ୍ଗାଲୁରୁ-ଚେନ୍ନାଇ ମେଲ୍ ଇତ୍ୟାଦି । ଏଥିଯୋଗୁଁ ଯାତ୍ରୀମାନେ ସହଜରେ କେଉଁ ଷ୍ଟେସନରୁ ଟ୍ରେନ୍ ଛାଡିବେ ତାହା ବିଷୟରେ ସହଜରେ ଜାଣିପାରିବେ ।