ନୂଆଦିଲ୍ଲୀ: ଦେଶରେ କରୋନା ପୁଣି ଥରେ ତାର କାୟ ମେଲାଇବାରେ ଲାଗିଛି । ଏହାରି ଭିତରେ ନୂଆ ଏକ ସଂକ୍ରମଣ ମାମଲା ସାମନାକୁ ଆସିଛି । ତେବେ ଆଶ୍ଚର୍ଯ୍ୟ ବିଷୟ ଏହା ଯେ ଏହି ସଂକ୍ରମଣ ଫଙ୍ଗସରୁ ବ୍ୟାପିଛି । କୋଲକାତାରୁ ଏହି ପ୍ରକାର ଦୁନିଆର ପ୍ରଥମ ମାମଲା ଚିହ୍ନଟ ହୋଇଛି । ଏହି ଫଙ୍ଗସ୍ ଇନଫେକ୍ସନ ଅତ୍ୟନ୍ତ ଘାତକ ବୋଲି କୁହାଯାଉଛି । ପଶ୍ଚିମ କୋଲକାତାର ଜଣେ ୬୧ ବର୍ଷୀୟ ବ୍ୟକ୍ତି ପ୍ଲାଣ୍ଟ ଫଙ୍ଗସରେ ସଂକ୍ରମିତ ହେବାରେ ଦୁନିଆରେ ପ୍ରଥମ ହୋଇଛନ୍ତି ।

ବ୍ୟକ୍ତି ଜଣକ ପ୍ଲାଣ୍ଟ ମାଇକ୍ରୋଲଜିଷ୍ଟ । ଗତ ତିନି ମାସ ଧରି ସେ କାଶ, କର୍କଶ ସ୍ୱର, ଗଳା ଦରଜ ଏବଂ ଶୀଘ୍ର ହାଲିଆ ଅନୁଭବ କରୁଥିଲେ । ପରୀକ୍ଷଣ ପରେ ସେ ପ୍ଲାଣ୍ଟ ଫଙ୍ଗସରେ ସଂକ୍ରମିତ ଥିବା ଜଣା ପଡ଼ିଥିଲା । ଅଧ୍ୟୟନକାରୀଙ୍କ କହିବା ଅନୁସାରେ ଏହା ଦର୍ଶାଉଛି ଯେ ପ୍ଲାଣ୍ଟ ଫଙ୍ଗସ୍ ସହ ଲଗାତାର ସମ୍ପର୍କରେ ରହିବା ଦ୍ୱାରା ଏହା ମଣିଷକୁ ବ୍ୟାପିଥାଏ ।

ମାଇକ୍ରୋଲଜିଷ୍ଟ ଫଙ୍ଗସ ବା କବକଙ୍କ ମଧ୍ୟରେ ରହି କାମ କରିଥାନ୍ତି । ଏଥିରେ ଛତୁ ଆଦି ସାମିଲ ରହିଥାଏ । ସଂକ୍ରମିତ ବ୍ୟକ୍ତିଙ୍କୁ ଡାଇବେଟିସ୍, ଏଚଆଇଭି, କିଡନୀ ସହ ଜଡିତ କୌଣସି ରୋଗ ନଥିଲା । ଜର୍ଣ୍ଣଲ ମେଡିକଲ ମାଇକ୍ରୋଲୋଜି କେସ ରିପୋର୍ଟ ଅନୁସାରେ ଡାକ୍ତର କହିଛନ୍ତି ଯେ ପୀଡିତ ବ୍ୟକ୍ତି ଛତୁ ଏବଂ ଅନ୍ୟ କବକ ମଧ୍ୟରେ ଦୀର୍ଘ ସମୟ ଯାଏ ନିଜ ଗବେଷଣା ପାଇଁ କାମ କରୁଥିଲେ । ଚିକିତ୍ସା ସମୟରେ ଏକ୍ସ-ରେ ଏବଂ ସିଟି ସ୍କାନ କରାଯାଇଥିଲା । ଏକ୍ସ-ରେ ରିପୋର୍ଟ ସାଧାରଣ ରହିଥିବା ବେଳେ ସିଟି ସ୍କାନ ରିପୋର୍ଟରେ ଗଳା ଭିତର ଫୁଲି ଥିବା ଦେଖିବାକୁ ମିଳିଥିଲା । ଏହା ଏତେ ବିପଦଜନକ ଯେ ଶ୍ୱାସ ନଳୀକୁ ମଧ୍ୟ ବ୍ଲକ୍ କରି ଦେଇଥାଏ । ସଠିକ୍ ସମୟରେ ବ୍ୟାକ୍ତିଙ୍କୁ ଚିକିତ୍ସା ନ ମିଳିଳେ ଜୀବନ ଯିବାର ଭୟ ମଧ୍ୟ ରହିଛି । ବ୍ୟକ୍ତିଙ୍କ ନମୂନାକୁ ବିଶ୍ୱ ସ୍ୱାସ୍ଥ୍ୟ ସଂଗଠନ ସହ ଜଡ଼ିତ ଫଙ୍ଗସ୍ ରିସର୍ଚ୍ଚ ସେଣ୍ଟରକୁ ଅଧିକ ଗବେଷଣା ପାଇଁ ପଠାଇ ଦିଆଯାଇଛି ।