ଲଣ୍ଡନ: ଗଣତନ୍ତ୍ର ପାଇଁ ଆବଶ୍ୟକ ଥିବା ସାଙ୍ଗଠନିକ ଢାଞ୍ଚାରେ ବାଧା ସୃଷ୍ଟି କରାଯାଉଛି ଓ ଭାରତୀୟ ଗଣତନ୍ତ୍ରର ଏହି ମୂଳ ଭିତ୍ତିଭୂମି ଉପରେ ଆକ୍ରମଣ ହେଉଛି। ଗଣତନ୍ତ୍ର ସମ୍ପର୍କିତ ପ୍ରସଙ୍ଗରେ କେମ୍ବ୍ରିଜ୍ ୟୁନିଭର୍ସିଟିରେ ଛାତ୍ରଛାତ୍ରୀଙ୍କ ଉଦ୍ବୋଧନ ଦେଇ ଏପରି କହିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ।
ରାହୁଲ ବର୍ତ୍ତମାନ କେମ୍ବ୍ରିଜ ଜଜ୍ ବିଜ୍ନେସ ସ୍କୁଲ୍(କଂଗ୍ରେସ ଜେବିଏସ୍)ର ଛାତ୍ରଛତ୍ରୀଙ୍କୁ ଉଦ୍ବୋଧନ ଦେବାକୁ ଲଣ୍ଡନ ଯାଇଛନ୍ତି। ‘ଏକବିଂଶ ଶତାବ୍ଦୀରେ ଶୁଣି ଶିଖିବା’ ଶୀର୍ଷକ ପ୍ରସଙ୍ଗରେ ଉଦ୍ବୋଧନ ଦେଇ ଭାରତୀୟ ଗଣତନ୍ତ୍ରକୁ ଆକ୍ରମଣ କରାଯାଉଛି ବୋଲି ରାହୁଲ ଗାନ୍ଧୀ କହିଛନ୍ତି।
ସେ କହିଛନ୍ତି “ ଭାରତୀୟ ଗଣତନ୍ତ୍ରକୁ ବର୍ତ୍ତମାନ ଆକ୍ରମଣ କରାଯାଉଛି। ଗଣତନ୍ତ୍ର ଉପରେ ଆକ୍ରମଣକୁ ରୋକିବାରୁ ଆମେ ଚେଷ୍ଟା କରୁଛୁ।” ବିରୋଧୀ ଦଳର ନେତାଙ୍କ ବିଷୟରେ ଗୁଇନ୍ଦା ତଥ୍ୟ ହାସଲ କରିବାକୁ ସରକାର ଜାସୁସ ଆପ୍ ପେଗାସସ୍କୁ ବ୍ୟବହାର କରୁଛନ୍ତି ବୋଲି ରାହୁଲ କହିଛନ୍ତି।
ରାହୁଲ ଆହୁରି କହିଛନ୍ତି “ ମୋ ଫୋନରେ ପେଗାସସ୍ ଥିଲା। କେବଳ ମୁଁ ନୁହେଁ ବହୁ ସଂଖ୍ୟାର ନେତାଙ୍କ ଫୋନ୍ରେ ପେଗାସସ୍ ରହିଛି। ତେଣୁ କଥା ହେବା ବେଳେ ସତର୍କ ରହିବାକୁ ମୁଁ ସେମାନଙ୍କୁ କହିଛି।”
ଭାରତ ସରକାର ବର୍ତ୍ତମାନ ଗଣମାଧ୍ୟମ ଓ ନ୍ୟାୟପାଳିକାକୁ ଅକ୍ତିଆର କରିନେଇଛନ୍ତି। ବ୍ୟକ୍ତିଙ୍କ ଉପରେ ଗୁଇନ୍ଦା ଭାବେ ନଜର ରଖାଯାଉଛି। ଲୋକଙ୍କୁ ଧମକ ଚମକ ଦେବା, ସଂଖ୍ୟାଲଘୁଙ୍କ ଉପରେ ଆକ୍ରମଣ ଦଳିତ ଓ ଆଦିବାସୀଙ୍କ ମୁହଁ ବନ୍ଦ କରିଦିଆଯାଉଛି ବୋଲି ରାହୁଲ ପିଲାଙ୍କୁ କହିଛନ୍ତି।
ସୂଚନା ଥାଉକି ରାହୁଲ ବର୍ତ୍ତମାନ ସପ୍ତାହେ ପାଇଁ ବ୍ରିଟେନ୍ ଗସ୍ତରେ ଯାଇଛନ୍ତି। ସେଠାରେ ସେ ବିଗ୍ ଡାଟା, ଗଣତନ୍ତ୍ର ଓ ଭାରତ-ଚୀନ ସମ୍ପର୍କକୁ ନେଇ କେମ୍ବ୍ରିଜ୍ ୟୁନିଭର୍ସିଟିର ଛାତ୍ରଛାତ୍ରୀଙ୍କୁ ଶ୍ରେଣୀଗୃହରେ ଉଦ୍ବୋଧନ ଦେବେ। ତା ସହିତ ୟୁକେରେ ରହୁଥିବା ଭାରତୀୟ କଂଗ୍ରେସ କର୍ମୀ- ଇଣ୍ଡିଆନ ଓଭରସିଜ୍ କଂଗ୍ରେସର ପ୍ରତିନିଧୀଙ୍କ ସହ ଆଲୋଚନା କରିବେ। ସପ୍ତାହ ଶେଷ ବେଳକୁ ରାହୁଲ ଗାନ୍ଧୀଙ୍କର ୟୁକେରେ ଥିବା ପ୍ରବାସୀ ଭାରତୀୟଙ୍କ ସମ୍ମିଳନୀକୁ ସମ୍ବୋଧନ କରିବାର କାର୍ଯ୍ୟକ୍ରମ ରହିଛି।