ଓ୍ବାସିଂଟନ ୦୭।୦୨; ଦ୍ବିତୀୟ ଥର ପାଇଁ ବିଶ୍ବର ସବୁଠାରୁ ପ୍ରତିଭାଶାଳୀ ଛାତ୍ରୀ ହେଲେ ନତାଶା ପେରିଆନାୟଗମ୍ । ଏନେଇ ଘୋଷଣା କରିଛି ଆମେରିକାର ଜନ୍ ହପକିନ୍ସ ସେଣ୍ଟର ଫର ଟ୍ୟାଲେଣ୍ଟେଡ୍ ୟୁଥ୍ (CTY) । ବିଶ୍ବର ୭୬ଟି ଦେଶର ପ୍ରାୟ ୧୫ ହଜାରରୁ ଅଧିକ ଛାତ୍ରଙ୍କ ମଧ୍ୟରୁ ନତାଶା ପେରିଆନାୟଗମ୍ଙ୍କୁ ପ୍ରତିଭାଶାଳୀ ଛାତ୍ରୀ ଭାବେ ଚୟନ କରାଯାଇଛି । ଏଥିପାଇଁ ଏକ ପରୀକ୍ଷା କରାଯାଏ ଏବଂ ଏହି ପରୀକ୍ଷାର ମାର୍କ ଆଧାରରେ ଦୁନିଆର ସବୁଠାରୁ ଯୋଗ୍ୟ ଛାତ୍ର ଚୟନ କରାଯାଇଥାଏ ।
ସୂଚନା ଅନୁଯାୟୀ, ୧୩ ବର୍ଷିୟ ନତାଶା ପେରିଆନାୟଗମ୍ ନ୍ୟୁ ଜର୍ସିର ଫ୍ଲୋରେନ୍ସ ଏମ ଗୋଡିନିୟର ମିଡିଲ ସ୍କୁଲର ଛାତ୍ର । ନତାଶା ୨୦୨୧ମସିହାରେ CTYର ପରୀକ୍ଷା ଦେଇଥିଲେ। ସେତେବେଳେ ସେ ପଞ୍ଚମ ଶ୍ରେଣୀର ଛାତ୍ର ଥିଲେ । ମୌଖିକ ଏବଂ ବିଷୟଭିତ୍ତିକ ଯୋଗ୍ୟତାରେ ନତାଶା ଅଷ୍ଟମ ଶ୍ରେଣୀରେ ୯୦ ପ୍ରତିଶତ ନମ୍ବର ରଖିଥିଲେ। ଯେଉଁ କାରଣରୁ ନତାଶାଙ୍କୁ ସେହି ବର୍ଷ ପାଇଁ ମେରିଟ୍ ଲିଷ୍ଟରେ ସ୍ଥାନ ଦିଆଯାଇଥିଲା । ବିଶ୍ୱବିଦ୍ୟାଳୟ କହିଛି, "ଚଳିତ ବର୍ଷ SAT, ACT, ସ୍କୁଲ ଏବଂ କଲେଜ ଦକ୍ଷତା ପରୀକ୍ଷା କିମ୍ବା CTY ଟ୍ୟାଲେଣ୍ଟ ସର୍ଚ୍ଚ ପରୀକ୍ଷାରେ ନତାଶାଙ୍କ ବେଶ ସଫଳତାର ସହ କୃତକାର୍ଯ୍ୟ କରିଛନ୍ତି। ନତାଶା ପେରିଆନାୟଗମଙ୍କ ପିତାମାତା ଚେନ୍ନାଇର ଅଟନ୍ତି ।
ଉଲ୍ଲେଖନୀୟ କଥା ହେଉଛି, CTY ସମଗ୍ର ବିଶ୍ୱରେ ଦକ୍ଷ ଛାତ୍ରମାନଙ୍କୁ ଚିହ୍ନିବା ଏବଂ ସେମାନଙ୍କର ଶିକ୍ଷାଗତ ଦକ୍ଷତାକୁ ମୂଲ୍ୟାଙ୍କନ କରିବା ପାଇଁ ଉଚ୍ଚ-ସ୍ତରୀୟ ପରୀକ୍ଷା କରିଥାଏ । ତାଙ୍କର ସଦ୍ୟତମ ପ୍ରୟାସରେ ନତାଶା ପେରିଆନାୟଗମ୍ ସମସ୍ତ ପ୍ରାର୍ଥୀଙ୍କ ମଧ୍ୟରୁ ସର୍ବୋଚ୍ଚ ଗ୍ରେଡ୍ ହାସଲ କରିଛନ୍ତି ।
