ନୂଆଦିଲ୍ଲୀ ୧୯।୦୨ : ପ୍ରଥମ ଟେଷ୍ଟ ପରେ ୨ୟ ଟେଷ୍ଟ ବି ଜିତିଲା ଟିମ୍‌ ଇଣ୍ଡିଆ । ବର୍ଡର-ଗାଭାସ୍କର ଟ୍ରଫି ୨ୟ ଟେଷ୍ଟକୁ ନିଜ ନାମରେ କରିଛି ରୋହିତ ବାହିନୀ । ନୂଆଦିଲ୍ଲୀରେ ଚାଲିଥିବା ୨ୟ ଟେଷ୍ଟକୁ ୬ ଓ୍ୱିକେଟ୍‌ ବିଜୟୀ ହୋଇଛି ଟିମ୍‌ ଇଣ୍ଡିଆ । ଯାହାଫଳରେ ଏହି ସିରିଜ୍‌ରେ ୨-୦ରେ ଆଗୁଆ ରହିଛି ଟିମ୍‌ ଇଣ୍ଡିଆ ।

2ND Test. India Won by 6 Wicket(s) https://t.co/hQpFkyZGW8 #INDvAUS @mastercardindia

— BCCI (@BCCI) February 19, 2023

ଟସ୍‌ ଜିତି ପ୍ରଥମ ବ୍ୟାଟିଂ କରୁଥିବା ଅଷ୍ଟ୍ରେଲିଆ ଟିମ୍‌ ପ୍ରଥମ ଇନିଂସରେ ୨୬୩ରନ୍‌ରେ ଅଲ୍‌ଆଉଟ୍‌ ହୋଇଥିଲା। ଏହାପରେ ବ୍ୟାଟିଂ କରୁବାକୁ ପଡିଆକୁ ଓହ୍ଲାଇଥିବା ଟିମ୍‌ ଇଣ୍ଡିଆ ୨୬୨ ରନ୍‌ରେ ଅଲ୍‌ଆଉଟ୍‌ ହୋଇଯାଇଥିଲା । ଅଷ୍ଟ୍ରେଲିଆ ବୋଲର ନାଥନ ଲାୟନଙ୍କ ସ୍ପିନ୍‌ ଆଗରେ ମୁଣ୍ଡ ନୁଆଁଇଥିଲେ ଟିମ୍‌ ଇଣ୍ଡିଆ ବ୍ୟାଟର । ୨ୟ ଇନିଂସରେ ବ୍ୟାଟିଂ ଆରମ୍ଭ କରିଥିଲେ କଙ୍ଗାରୁ ବ୍ୟାଟର । ହେଲେ ଭାରତୀୟ ସ୍ପିନରଙ୍କ ଆଗରେ ଅଧିକ ସମୟ ତିଷ୍ଠି ପାରିନଥିଲେ ଭ୍ରମଣକାରୀ ଦଳ ।

ରବିଚନ୍ଦ୍ରନ ଅଶ୍ୱିନୀ ଏବଂ ରବିନ୍ଦ୍ର ଜାଡେଜାଙ୍କ ବୋଲିଂ ଭାଙ୍ଗି ଦେଇଥିଲା ଅଷ୍ଟ୍ରେଲିଆର ମେରୁଦଣ୍ଡ । ୨ୟ ଇନିଂସରେ ରବିନ୍ଦ୍ର ଜାଡେଜା ୭ଟି ଓ୍ୱିକେଟ୍‌ ନେଇଥିବା ବେଳେ ରବିଚନ୍ଦ୍ରନ ଅଶ୍ୱିନୀ ୩ଟି ଓ୍ୱିକେଟ୍‌ ନେଇଛନ୍ତି । ଏହି ଦୁଇ ଜଣଙ୍କୁ ଛାଡି ଅନ୍ୟ କୌଣସି ବୋଲର ୨ୟ ଇନିଂସରେ ଓ୍ୱିକେଟ୍‌ ନେଇପାରିନଥିଲେ । ଏହି ସ୍ପିନର ପୋଛି ନେଇଥିଲେ କଙ୍ଗାରୁ ଓ୍ୱିକେଟ୍‌ ।

ତେବେ ୧୧୫ ରନ୍‌ର ବିଜୟଲକ୍ଷ୍ୟ ନେଇ ପଡିଆକୁ ଓହ୍ଲାଇଥିଲା ଟିମ୍‌ ଇଣ୍ଡିଆ । ଆରମ୍ଭରୁ ଲାଗିଥିଲା ଟିମ୍‌ ଇଣ୍ଡିଆକୁ ପ୍ରାରମ୍ଭିକ ଝଟ୍‌କା । ଓପନର କେଏଲ୍‌ ରାହୁଲ ମାତ୍ର ୧ ରନ୍‌ କରି ପାଭିଲିୟନ୍‌ ଫେରିଥିଲେ । ପରେ ଅଧିନାୟକ ରୋହିତ ଶର୍ମା ଏବଂ ଅଭିଜ୍ଞ ଚେତେଶ୍ୱର ପୂଜାରା ଏବେ କ୍ରିଜ୍‌ରେ ରକ୍ଷାଣତ୍ମକ ସଟ୍‌ ଖେଳିଥିଲେ । ଶେଷରେ ଦଳ ୨ୟ ଇନିଂସରେ ୨୬ ଓଭର ଖେଳି ୪ଟି ଓ୍ୱିକେଟ୍‌ ହରାଇ ଟାର୍ଗେଟ ପୂରଣ କରିଛି । ୨ୟ ଇନିଂସରେ ଅଷ୍ଟ୍ରେଲିଆ ପକ୍ଷରୁ ନାଥନ ଲାୟନ୍‌ ୨ଟି ଓ୍ୱିକେଟ୍‌ ନେଇଥିବା ବେଳେ ଟୋଡ ମୁର୍ଫି ଗୋଟିଏ ଓ୍ୱିକେଟ ନେଇଛନ୍ତି ।

ସୂଚନାଯୋଗ୍ୟ ଯେ, ବର୍ଡର-ଗାଭାସ୍କର ଟ୍ରଫିରେ ମୋଟ ୪ଟି ଟେଷ୍ଟ ମ୍ୟାଚ୍‌ ରହିଥିଲା । ହେଲେ ପ୍ରଥମ ୨ଟି ଟେଷ୍ଟ ମ୍ୟାଚ୍‌କୁ ନିଜ ନାମରେ କରିବାରେ ସଫଳ ହୋଇଛି ଟିମ୍‌ ଇଣ୍ଡିଆ । ପ୍ରଥମେ ନାଗପୁର , ଆଉ ଏବେ ଦିଲ୍ଲୀ ଟେଷ୍ଟରେ କଙ୍ଗାରୁ ବାହିନୀକୁ ଚିଟ୍‌ପଟାଙ୍ଗ କରିଛି ରୋହିତ ବାହିନୀ ।