ଅହମଦାବାଦ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ବର୍ଡର-ଗାଭାସ୍କର ଟ୍ରଫିର ଶେଷ ମୁକାବିଲା ଅହମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଉଛି । ଅଷ୍ଟ୍ରେଲିଆ ପ୍ରଥମ ଇନିଂସରେ ୪୮୦ ରନରେ ଅଲଆଉଟ୍ ହୋଇଛି । ଅଷ୍ଟ୍ରେଲିଆ ପକ୍ଷରୁ ଓପନର ଉସମାନ ଖ୍ୱାଜା ସର୍ବାଧିକ ୧୮୦ ରନ ଏବଂ କ୍ୟାମରନ ଗ୍ରୀନ ୧୧୪ ରନ କରିଛନ୍ତି । ଭାରତ ତରଫରୁ ସ୍ପିନର ରବିଚନ୍ଦ୍ରନ ଅଶ୍ୱିନ ଛଅ ଏବଂ ମହମ୍ମଦ ଶାମି ଦୁଇ ୱିକେଟ୍ ନେଇଛନ୍ତି ।

ପ୍ରଥମ ଦିନ ନିଜ ନାଁରେ କରିବା ପରେ ଦ୍ୱିତୀୟ ଦିନର ପ୍ରଥମ ସେସନ ମଧ୍ୟ ଅଷ୍ଟ୍ରେଲିଆ ନାଁରେ ରହିଥିଲା । ତେବେ ଦ୍ୱିତୀୟ ସେସନରେ ଅଶ୍ୱିନ ତିନି ୱିକେଟ୍ ହାସଲ କରି ଭାରତକୁ ମ୍ୟାଚରେ କମବ୍ୟାକ୍ କରାଇଥିଲେ । ଶୁକ୍ରବାର ଅଷ୍ଟ୍ରେଲିଆ ଟିମ୍ ୨୫୫ ରନରେ ଚାରି ୱିକେଟରୁ ନିଜ ଖେଳ ଆଗକୁ ବଢାଇଥିଲା । ଉସମାନ ଖ୍ୱାଜା ଏବଂ କ୍ୟାମରନ ଗ୍ରୀନଙ୍କ ମଧ୍ୟରେ ପଞ୍ଚମ ୱିକେଟ୍ ପାଇଁ ୨୦୮ ରନର ପାର୍ଟନରଶିପ ହୋଇଥିଲା ।

ଆଉଟ୍ ହେବା ପୂର୍ବରୁ କ୍ୟାମରନ ଗ୍ରୀନ ନିଜ ଟେଷ୍ଟ କ୍ୟାରିୟରର ପ୍ରଥମ ଶତକ ହାସଲ କରିଥିଲେ । ଚା’ ବିରତି ସୁଦ୍ଧା ଅଷ୍ଟ୍ରେଲିଆ ଟିମ୍ ୭ ୱିକେଟ୍ ହରାଇ ୪୦୯ ରନ କରିଥିଲା । ଏହାପରେ ଉସମାନ ଖ୍ୱାଜାଙ୍କୁ ବ୍ୟକ୍ତିଗତ ୧୮୦ ରନରେ ଅକ୍ଷର ପଟେଲ ଆଉଟ୍ କରାଇଥିଲେ । ଏହାପରେ ନାଥାନ ଲିୟନ ଏବଂ ଟାଡ୍ ମର୍ଫି ନବମ ୱିକେଟ୍ ପାଇଁ ୭୦ ଯୋଡିଥିଲେ । ଶେଷ ଦୁଇ ୱିକେଟ୍ ନେଇ ଅଶ୍ୱିନ ଅଷ୍ଟ୍ରେଲିଆ ଟିମକୁ ୪୮୦ ରନରେ ସୀମିତ କରାଇଥିଲେ ।

ଅଶ୍ୱିନ ଏହି ଇନିଂସରେ ମୋଟ ୬ ୱିକେଟ୍ ହାସଲ କରିଛନ୍ତି । ୩୨ ଥର ସେ ଟେଷ୍ଟ ଇନିଂସରେ ପାଞ୍ଚ ୱିକେଟ୍ ହାସଲ କରିଛନ୍ତି । ଭାରତୀୟ ମାଟିରେ ସେ ୨୬ ଥର ଏପରି କରିଛନ୍ତି । ଅଷ୍ଟ୍ରେଲିଆ ବିପକ୍ଷରେ ସପ୍ତମ ଥର ଅଶ୍ୱିନ ଟେଷ୍ଟରେ ପାଞ୍ଚ ୱିକେଟ୍ ହାସଲ କରିଛନ୍ତି ।